ஏக்கம் நுாறு [ பகுதி 17]

ஏக்கம் நுாறு [பகுதி - 17]
 
தோள்கண்டார் தோளேகண்டார் நிலையைப் போன்று

     தோகைவிழி எழிற்கண்டு நின்றேன்! மாயோன்

தாள்கண்டார் தாளேகண்டார் நிலையைப் போன்று

     தமிழவளின் விரலழகில் மயக்கம் கொண்டேன்!

வாள்கண்டார் பிழைத்திடலாம்! பாய்ந்து தாக்கும்

     வரிப்புலியை வென்றிடலாம்! காதல் நோயுள்

நாள்கண்டார் உரைத்திட்ட கவிதை யாவும்

     நான்கண்டு வாடுகிறேன்! ஏங்கும் நெஞ்சம்! 76

மங்கையவள்! மலருமவள்! மனம் செழிக்கும்

     மழையுமவள்! மதுவுமவள்! கவியாய்ப் பாயும்

கங்கையவள்! கருணையவள்! கன்னல் முற்றிக்

     கனிந்தாடும் காடுமவள்! நிலவின் சின்ன

தங்கையவள்! தமிழுமவள்! என்றன் நெஞ்சின்

     தாகமவள்! உயிர்புகுந்து காதல் எந்திச்

சங்கையவள் ஊதுகிறாள்! கண்கள் நான்கும்

     தாம்கவ்வி இன்பமுறும்! தொடரும் ஏக்கம்! 77

                                         

                                      [தொடரும்]