கம்பன் விழா 2024

 

கவிக்கோ துரை. வசந்தராசனார்

 

கவிக்கோ துரை. வசந்தராசனார்

71 ஆம் அகவை வாழ்த்து

 

பல்லாண்டு வாழ்க!

 

வண்ணத் தமிழ்காக்கும் பண்ணைத் திருவூரார்

எண்ண மனைத்தும் இனிப்பாகும்! - அண்ணாவின்

பொன்னெறி போற்றும் புகழ்ப்புலவர் வாழியவே

இன்னெறி யாவும் இசைத்து!

 

துாய கவிக்கோ துரைவசந்த ராசனார்

நேய மனத்துள் நிறைந்திருக்கும் - தாயன்பு!

பாட்டரசன் பாடுகிறேன் பல்லாண்டு! காண்கவே

நாட்டரசர் சூட்டும் நலம்!

 

விந்தைமிகு சந்தம் விளையாடும்! எந்நாளும்

சிந்தைமிகு வண்ணம் செழித்தாடும்! - செந்தமிழின்

தொண்டர் கவிக்கோ துரைவசந்த ராசனார்

கண்டார் கவிதைக் களம்!

 

பகுத்தாறிவு வாழ்வும், படிப்பகமும் கொண்டு

தொகுத்தறிவு தந்தார் தொடர்ந்து - மிகுத்தபுகழ்

தோற்றும் கவிக்கோ துரைவசந்த ராசனார்

ஆற்றும் பணியே அழகு!

 

வாழ்க வளத்துடனே! வண்டமிழ்ச் சீருடனே!

சூழ்க நிறைந்து நலமெல்லாம்! - ஏழ்பிறப்பும்

தொன்மைக் கவிக்கோ துரைவசந்த ராசனார்

நன்மை புரிவார் நமக்கு!

 

அன்புடன்

பாட்டரசர் கி. பாரதிதாசன்

தலைவர்

கம்பன் கழகம், பிரான்சு

தொல்காப்பியர் கழகம், பிரான்சு

உலகத் தமிழ்ச் சிறகம்

பாவலர் பயிலரங்கம், பிரான்சு

15.09.2024

யானைமுகன் வெண்பா

 

யானை முகத்தனை வேண்டுதல்!

 

முன்னே இருந்து முழுநலம் தந்துவக்கும்

பொன்னே! புதுத்தேனே! பூமணமே! - என்னே..யுன்

இன்னருள்! இங்கு..நீ என்னை மறந்ததுமேன்?

வன்னிருள் போக்கவே வா!

 

எலியுடை வானத்தை இன்றுடன் மாற்று!

புலியுடை வாகனம் போதும்! - உளியுடன்

வந்து வினையொழிப்பாய்! என்னை மறந்ததுமேன்?

நொந்து கிடக்குமெனை நோக்கு!

 

பாலும் தெளிதேனும் பாகும் பருப்புமிவை

நாலும் படைத்திட்டேன் நானுனக்கு! - நுாலுமே

இ்ங்கு வடித்திட்டேன்! என்னை மறந்ததுமேன்?

தொங்கு கரங்கொண்டு துாக்கு!

 

வங்கக் கடலருகே வாழ்கின்ற வள்ளலே!

தங்கத் தமிழிட்டுத் தாழ்பணிந்தேன்! -  செங்கதிராய்

எங்கும் ஒளிர்கின்றாய்! என்னை மறந்ததுமேன்?

தங்குந் துயர்போக்கித் தாங்கு!

 

யானை யுருக்கொண்டாய்! பானை வயிறுற்றாய்!

மோனைத் தொடையாக முன்னின்றாய்! - பூனையென

இங்[கி]யான் சுழல்கின்றேன்! என்னை மறந்ததுமேன்?

மங்கிய என்மனம் மாற்று!

 

அன்புடன்

பாட்டரசர் கி. பாரதிதாசன்

தலைவர்

கம்பன் கழகம், பிரான்சு

தொல்காப்பியர் கழகம், பிரான்சு

உலகத் தமிழ்ச் சிறகம்

பாவலர் பயிலரங்கம், பிரான்சு

07.09.2024

பைந்தமிழ்ப் பாமணி

 

 

பைந்தமிழ்ப்பாமணி

சரசுவதி பாற்கரனார் பிறந்தநாள் வாழ்த்து

 

தண்மனங் கொண்ட சரசுவதி பாற்கரனார்

பண்மனங் கொண்ட பழச்சுவையார்! - விண்மனங்

கண்டு வியந்து கவிதந்தேன்! பைந்தமிழைக்

கொண்டு செழிக்குங் குலம்!

 

தாலாட்டும் தாய்போல் சரசுவதி பாற்கரனார்

நுாலுாட்டும் மேன்மை நுவன்றிடுவார்! - மாலுாட்டும்

ஞான வழியுடையார்! நற்றேன் மொழியுடையார்!

மானத் தமிழ்கொண்டு வாழ்த்து!

 

தம்மை நினையாச் சரசுவதி பாற்கரனார்

செம்மைப் பணியாற்றும் சீருடையார்! - அம்மை

திருவருள் சூழ்க! செழித்தபுகழ் காண்க!

அரும்பொருள் வாழ்வை அணிந்து!

 

தாவிவரும் வண்ணம் சரசுவதி பாற்கரனார்

மேவிவரும் பாக்கள் வியப்பூட்டும்! - தேவியருள்

பெற்ற பெரும்புலமை! பேறுகள் பதினாறும்

உற்று மகிழ்க உயர்ந்து!

 

தங்க மனத்துச் சரசுவதி பாற்கரனார்

எங்கும் தமிழை யிசைக்கின்றார்! - வங்க

அலையென அன்புறும் ஆழகத்துள் என்றும்

நிலையென வாழும் நிறை!

 

பாட்டரசர் கி. பாரதிதாசன்

தலைவர்

கம்பன் கழகம், பிரான்சு

தொல்காப்பியர் கழகம், பிரான்சு

உலகத் தமிழ்ச் சிறகம்

பாவலர் பயிலரங்கம், பிரான்சு

செந்தமிழாழன்

 

சேந்தன்குடிச் செந்தமிழாழன் எழுதிய

விருத்தமாயிரம் நுாலுக்குச்

சிறப்புப் பாயிரம்

 

அன்புப் பாட்டி ஆவிடைப் பொட்டம்மாள்

நன்கு வளர்த்த நற்குடி மக்கள்

பசுந்தங் கையனும் பத்மா வதியும்

இசையுடன் இனித்த இல்லற வாழ்வில்

முன்னே பிறந்த முத்தமிழ் மைந்தன்

தன்னே ரில்லாத் தண்டமிழ்த் தொண்டன்!

சேந்தன் குடியின் சிறப்பை யேந்திக்

காந்த விசையாய்க் கவருங் கவிஞன்!

செந்தமி ழாழன் சீர்பெயர் ஏற்றுச்

சந்தம் சிந்து வண்ணம் பாடும்

புலமை மின்னும் புதுமை நெஞ்சன்!

வலிமை மிக்க மரபின் செல்வன்!

கணிதங் கற்ற முத்து லட்சுமி

மணந்து மலர்ந்த வந்தனா ஆசினி,

பால சதுர்த்தியன் பாசப் பொழிவில்

கால மினிக்க ஞாலஞ் சிறக்க

ஓதுந் தொழிலை உயிரெனக் கொண்டு 

மாதுறை பாகனை மனத்துள் கண்டு     

விருத்த மாயிரம் வியன்புகழ் நுாலைப்

பொருத்த மாகப் புனைந்த புலவன்! 

சிந்தா மணியும் சிலம்பும் வில்லும்

நந்தா விளக்காம் நற்றிரு முறைகளும்

காட்டி நெறியுள் தீட்டிய இந்நுால்

நாட்டின் நிலையை நன்றே நவிலும்!

அடிமை வாழ்வை அடியோ டகற்றும்!

குடிமை செழிக்கக் கொள்கை புகட்டும்!

மனிதம் படைக்கும்! மதவெறி உடைக்கும்!

கனிமிகு காடாய்க் கவிதை கமழும்!

முகநுால் அரங்கில் முன்னே நடக்கும்

அகநுால் புறநுால் அணிநுால் உரைக்கும்

பாட்டின் அரசன் பாரதி தாசன்

நாட்டிய அரங்கம்! நற்றேன் தரங்கம்!

பாவலர் பயிலும் பண்ணருள் சுரங்கம்!

நாவலர் போற்ற நற்கவி இயம்பும்!

என்றன் மொழியை ஏற்றங்[கு] அளித்த

இன்னுால் இந்நுால்! ஈடில் பொன்னுால்!

உலக மெங்கும் உயர்ந்த தமிழர்

குலவுந் தமிழைக் கொஞ்சிக் களிப்பதால்

ஊரின் எல்லை உயிர்நாட் டெல்லை

பேருக் குரைத்தல் பெருமை யன்று!

தமிழின் எல்லை தரணி யாகும்!

அமுதின் எல்லை தமிழே யாகும்!

இருமுறை ஆயிரம் ஒருமுறை ஐம்பது

திருநிறை ஐந்து சேர்ந்த ஆண்டு

வள்ளுவர் பெயரை வாழ்த்தி வழங்கும்!

உள்ளுந் தமிழை ஓங்கி முழங்கும்!

குயிலுடைப் புலவனும் குளிர்ந்த தமிழ்மேல்

உயிருடை வேந்தனும் உலவிய கவியூர்!

சாலை யழகும் சோலை யழகும்

காலை யழகும் ஆலை யழகும்

கொண்ட புதுவையில் கூத்தும் பாட்டும்

கண்ட அரங்கில் கற்றோர் முன்னே

களமே புகுந்தும் வளமே அளந்தும்

உளமே நிறைந்தும் ஒளிர்ந்த இந்நுால்

மரபைக் காக்கும் அரணாய் இருக்கும்!

வரமாய் நமக்கு வழங்கும் நலமே!

 

பாட்டரசர் கி. பாரதிதாசன்

தலைவர்

கம்பன் கழகம், பிரான்சு

உலகத் தமிழ்ச் சிறகம்

தொல்காப்பியர் கழகம், பிரான்சு.

பாவலர் பயிலரங்கம், பிரான்சு

28.07.2024

28.07.2024