mercredi 15 août 2018

வெண்பா மேடை - 103


வெண்பா மேடை - 103
  
தொன்மை ஒற்று வெண்பா!
  
ஒரு செய்யுளில் எல்லா எழுத்துகளும் புள்ளியுடையனவாக வருவது 'பிந்துமதி' என்று முன்னே வழங்கப்பட்டது.
  
முன்னே எகர ஒகரங்கள் புள்ளி வைத்து எழுதப்பட்டன. ['எ்', 'ஒ்'] , நன்னுால் இதனை உரைக்கிறது.
  
தொல்லை வடிவின எல்லாம் எழுத்தும் ஆண்டு
எய்தும் எகர ஒகரமெய் புள்ளி [நன்னுால் - 43]
  
எல்லா எழுத்தும் தொன்மைக்கால முறைப்படி எழுதப்பட்டு வருகின்றன. எகரமும் ஒகரமும் மெய்யெழுத்தும் தலைபோல் புள்ளிவைத்து எழுதப்பெறும். [எ் - குறில்] [எ - நெடில்] [ஒ் - குறில்] [ஒ - நெடில்] இன்று எ, ஏ, ஒ, ஓ, என எழுதுகிறோம். இவ்வாறு மாற்றி எளிமைப்படுத்தியவர் வீரமாமுனியர். இம் மாற்றம் மிக இயல்பானதால் ஏற்கப்பட்டது.
  
எகர இனமும், ஒகர இனமும், மெய்யெழுத்துகளும், இம்மூன்று இனம் மட்டும் இடம் பெறும் பாடலை ஒற்றுப்பாட்டென முன்னோர் வழங்கினர். இவ்வகைப் பாடல் சித்திரக் கவிதையில் மிகத் தொன்மையாக இருக்கலாம். இன்று எகரம் ஒகரம் தலைமேல் புள்ளி பெறுவதில்லை. இதன் தொன்மையைக் கருதி இவ்வகையை எழுதி மகிழ்வோம்.
  
மெய்கொண்டென் தெண்கொண்டென் வெல்கொண்டென் வெண்கொண்டென்
பொய்கொண்டென் பொன்கொண்டென் பெண்கொண்டென் - செய்கொண்டென்
மென்கொண்டென் சொல்கொண்டென் செம்கொண்டென் தொன்தென்எள்
என்கொண்டென் என்கொண்டென் எண்!
  
[பாட்டரசர் கி. பாரதிதாசன்]
  
பாடல் விளக்கம்
    
உடல் பெற்று என்ன பயன்? தெளிவு பெற்று என்ன பயன்? வெற்றி பெற்று என்ன பயன்? துாய உள்ளம் பெற்று என்ன பயன்? பொய்யால் வாழ்ந்து என்ன பயன்? பொன் பெற்று என்ன பயன்? அழகிய பெண்ணைப் பெற்று என்ன பயன்? நிலத்தைப் பெற்று என்ன பயன்? மென்மையைப் பெற்று என்ன பயன்? உரையாற்றி என்ன பயன்? சிறப்பைப் பெற்று என்ன பயன்? தொன்மையான தென்மொழியாகியத் தமிழைப் பழிக்கின்றவர்கள் என்ன பெற்றும் என்ன பயன்?
  
மேற்கண்ட வெண்பாவில், முன்னை மரபில் தலையில் புள்ளி பெற்ற எகரமும் ஒகரமும், என்றும் தலையில் புள்ளி பெற்றுவரும் மெய்யும் வந்துள்ளன.
  
இவ்வாறு அமைந்த 'தொன்மை ஒற்று வெண்பா' ஒன்றை விரும்பிய பொருளில் பாடுமாறு அன்புடன் வேண்டுகிறேன்
  
"பாவலர் பயிலரங்கம்" என்ற குழுவில் இணைந்து தொன்மை ஒற்று வெண்பாவைத் தனிப்பதிவாகப் பதிவிட வேண்டுகிறேன்!
  
அன்புடன்
  
பாட்டரசர் கி. பாரதிதாசன்
தலைவர்:
கம்பன் கழகம் பிரான்சு
உலகத் தொல்காப்பியத் தலைமை மன்றம்
14.08.2018

mardi 14 août 2018

வெண்பா மேடை - 102


வெண்பா மேடை - 102
  
அடி மறி நேரிசை வெண்பா!
  
1.
அணிகமழும் அங்கம் அழகு! வணங்கும்
பணிகமழும் பாவை படைப்பு! - கணிந்தே
குணங்கமழும் இன்பம் கொழித்து! பிணைந்தே
மணங்கமழும் பாக்கள் மலர்ந்து!
  
ஈற்றடி முதலடியாய்,
  
மணங்கமழும் பாக்கள் மலர்ந்து! வணங்கும்
பணிகமழும் பாவை படைப்பு! - கணிந்தே
குணங்கமழும் இன்பம் கொழித்து! பிணைந்தே
அணிகமழும் அங்கம் அழகு!
  
ஈற்றடி இரண்டாம் அடியாய்!
  
அணிகமழும் அங்கம் அழகு! வணங்கும்
மணங்கமழும் பாக்கள் மலர்ந்து! - கணிந்தே
குணங்கமழும் இன்பம் கொழித்து! பிணைந்தே
பணிகமழும் பாவை படைப்பு!
    
ஈற்றடி மூன்றாம் அடியாய்!
  
அணிகமழும் அங்கம் அழகு! வணங்கும்
பணிகமழும் பாவை படைப்பு! - கணிந்தே
மணங்கமழும் பாக்கள் மலர்ந்து! பிணைந்தே
குணங்கமழும் இன்பம் கொழித்து!
  
2.
முத்தங்கள் அத்தனை யும்முத்து! வித்தைவிழி
சித்தம்..கள் சேர்த்திடு மே,சீர்த்து! - சித்திரமே!
சத்தங்கள் ஏன்மனத் துள்,சாற்று! தத்தைமொழி
நித்தம்..கள் தந்திடுமே நீண்டு!
  
ஈற்றடி முதலடியாய்,
  
நித்தம்..கள் தந்திடு மேநீண்டு!வித்தைவிழி
சித்தம்..கள் சேர்த்திடு மே,சீர்த்து! - சித்திரமே!
சத்தங்கள் ஏன்மனத் துள்,சாற்று! தத்தைமொழி
முத்தங்கள் அத்தனை யும்முத்து!
  
ஈற்றடி இரண்டாம் அடியாய்!
  
முத்தங்கள் அத்தனை யும்முத்து! வித்தைவிழி
நித்தம்..கள் தந்திடு மே,நீண்டு! - சித்திரமே!
சத்தங்கள் ஏன்மனத் துள்,சாற்று! தத்தைமொழி
சித்தம்..கள் சேர்த்திடுமே சீர்த்து!
  
ஈற்றடி மூன்றாம் அடியாய்!
  
முத்தங்கள் அத்தனை யும்முத்து! வித்தைவிழி
சித்தம்..கள் சேர்த்திடு மே,சீர்த்து! - சித்திரமே!
நித்தம்..கள் தந்திடுமே நீண்டு! தத்தைமொழி
சத்தங்கள் ஏன்மனத் துள்,சாற்று!
  
அடி மறி மண்டில ஆசிரியப்பா போன்றே, இவ்வெண்பாவும் அடிகளை இடம் மாற்றிப் பாடினாலும், பொருள் குன்றாமல், வெண்பாவின் இலக்கணம் குலையாமல் அமைதல் வேண்டும்.
    
விரும்பிய பொருளில் 'அடிமறி நேரிசை வெண்பா' ஒன்றைப் பாடுமாறு அன்புடன் வேண்டுகிறேன்.
  
"பாவலர் பயிலரங்கம்" என்ற குழுவில் இணைந்து அடிமறி நேரிசை வெண்பாவைத் தனிப்பதிவாகப் பதிவிட வேண்டுகிறேன்!
  
அன்புடன்
  
பாட்டரசர் கி. பாரதிதாசன்
தலைவர்:
கம்பன் கழகம் பிரான்சு
உலகத் தொல்காப்பியத் தலைமை மன்றம்
14.08.2018

dimanche 12 août 2018

வெண்பா மேடை - 101

வெண்பா மேடை - 101
  
அடி மறி இன்னிசை வெண்பா!
  
நேரசையில் தொடங்கும் வெண்பா!
  
கற்றிட வேண்டும் கனிந்து கவியமுதை!
பற்றிட வேண்டும் பணிந்து படர்புகழை!
பெற்றிட வேண்டும் பிணைந்து திருவருளை!
ஊற்றிட வேண்டும் உவந்து!
  
மேற்கண்ட வெண்பாவின் முதன் மூன்றடிகளை முன் பின் மாற்றி அமைத்தாலும் பொருளும், யாப்பும் குன்றாமல் வருவதைக் காணலாம். ஈற்றடி முன்னுள்ள மூன்றடிகளின் வந்தமைந்தாலும் பொருளும், யாப்பும் குன்றாமல் வருவதைக் கீழுள்ள வெண்பாக்களின் வாழியாக அறியலாம்.
  
ஈற்றடி முதலடியாய்,
    
ஊற்றிட வேண்டும் உவந்து கவியமுதை!
பற்றிட வேண்டும் பணிந்து படர்புகழை!
பெற்றிட வேண்டும் பிணைந்து திருவருளை!
கற்றிட வேண்டும் கனிந்து!
  
ஈற்றடி இரண்டாம் அடியாய்!
  
கற்றிட வேண்டும் கனிந்து கவியமுதை!
ஊற்றிட வேண்டும் உவந்து படர்புகழை!
பெற்றிட வேண்டும் பிணைந்து திருவருளை!
பற்றிட வேண்டும் பணிந்து!
  
ஈற்றடி மூன்றாம் அடியாய்!
  
கற்றிட வேண்டும் கனிந்து கவியமுதை!
பற்றிட வேண்டும் பணிந்து படர்புகழை!
ஊற்றிட வேண்டும் உவந்து திருவருளை!
பெற்றிட வேண்டும் பிணைந்து!
  
நிரையசையில் தொடங்கும் வெண்பா!
  
கவிபாட வேண்டும் களித்து! தமிழே!
புவிபாட வேண்டும் புகழ்ந்து! தவமே!
செவிகூட வேண்டும் செழித்து! தகையே!
சுவைகூட வேண்டும் சுரந்து!
  
ஈற்றடி முதலடியாய்,
  
சுவைகூட வேண்டும் சுரந்து! தமிழே!
புவிபாட வேண்டும் புகழ்ந்து! தவமே!
செவிகூட வேண்டும் செழித்து! தகையே!
கவிபாட வேண்டும் களித்து!
  
ஈற்றடி இரண்டாம் அடியாய்!
  
கவிபாட வேண்டும் களித்து! தமிழே!
சுவைகூட வேண்டும் சுரந்து! தவமே!
செவிகூட வேண்டும் செழித்து! தகையே!
புவிபாட வேண்டும் புகழ்ந்து!
  
ஈற்றடி மூன்றாம் அடியாய்!
  
கவிபாட வேண்டும் களித்து! தமிழே!
புவிபாட வேண்டும் புகழ்ந்து! தவமே!
சுவைகூட வேண்டும் சுரந்து! தகையே!
செவிகூட வேண்டும் செழித்து!
  
அடி மறி மண்டில ஆசிரியப்பா போன்றே, இவ்வெண்பாவும் அடிகளை இடம் மாற்றிப் பாடினாலும், பொருள் குன்றாமல், வெண்பாவின் இலக்கணம் குலையாமல் அமைதல் வேண்டும்.
  
[வெண்பா மேடை 100, தமிழ்ச் சிறப்பெழுத்து வெண்பா, வெண்பா மேடை 101, அடி மறி வெண்பா, இவ்விரண்டும் என்னுடைய உருவாக்கம்.]
  
விரும்பிய பொருளில் 'அடி மறி இன்னிசை வெண்பா' ஒன்றைப் பாடுமாறு அன்புடன் வேண்டுகிறேன்.
  
"பாவலர் பயிலரங்கம்" என்ற குழுவில் இணைந்து அடி மறி இன்னிசை வெண்பாவைத் தனிப்பதிவாகப் பதிவிட வேண்டுகிறேன்!
  
அன்புடன்
  
பாட்டரசர் கி. பாரதிதாசன்
தலைவர்:
கம்பன் கழகம் பிரான்சு
உலகத் தொல்காப்பியத் தலைமை மன்றம்
12.08.2018

வெண்பா மேடை - 100


வெண்பா மேடை - 100
  
தமிழ்ச் சிறப்பெழுத்து வெண்பா!
  
தாழை மணத்தமிழே! வாழை வளத்தமிழே!
பேழை மணித்தமிழே! பேரழகே! - யாழின்ப
ஆழ்வே! அருண்மொழியே! அன்பெழிலே! ஆர்த்தபுகழ்
வாழ்வே! தொழுமெனை வாழ்த்து!
  
தமிழின் சிறப்பெழுத்தாகிய 'ழகரத்தை' வெண்பாவின் பதினைந்து சீர்களும் பெற்று வரவேண்டும். விருப்பிய பொருளில் 'தமிழ்ச் சிறப்பெழுத்து வெண்பா' ஒன்றைப் பாடுமாறு அன்புடன் வேண்டுகிறேன்.
  
"பாவலர் பயிலரங்கம்" என்ற குழுவில் இணைந்து தமிழ்ச் சிறப்பெழுத்து வெண்பாவைத் தனிப்பதிவாகப் பதிவிட வேண்டுகிறேன்!
  
அன்புடன்
  
பாட்டரசர் கி. பாரதிதாசன்
தலைவர்:
கம்பன் கழகம் பிரான்சு
உலகத் தொல்காப்பியத் தலைமை மன்றம்
11.08.2018

samedi 11 août 2018

வெண்பா மேடை - 99


வெண்பா மேடை - 99

ஒற்றெழுத்து வெண்பா!

அவளின் கண்

வண்ணக்..கண் கொண்டென்றன் வன்னெஞ்சைத் தான்கொன்றாள்!
உண்ணுங்..கண்! ஒட்டுங்..கண்! ஓங்குங்..கண்! - தண்மைக்..கண்!
பண்ணின்கண் நிற்குங்..கண்! எண்ணத்தைப் பற்றுங்..கண்!
கண்டின்..கண் செண்டின்..கண் காண்!

கொஞ்சும்சீர் விஞ்சுங்..கண்! கொட்டுந்தேள் காட்டுங்..கண்!
மஞ்சம்சீர்  மீட்டுங்..கண்! வாட்டுங்..கண்! - நஞ்சைத்தான்
நல்குங்..கண்! வேல்,சேல்,வில் நாட்டுங்..கண்! இன்பத்தேன்
பல்குங்..கண்! வெல்லுங்..கண் பார்!

 [பாட்டரசர் கி. பாரதிதாசன்]

இவ்வெண்பாவில்  2, 4, 6,...... இரட்டைப்படை எழுத்துகள் யாவும் ஒற்றெழுத்தாய் அமையும். விரும்பிய பொருளில் 'ஒற்றெழுத்து வெண்பா'  ஒன்றைப் பாடுமாறு அன்புடன் வேண்டுகிறேன்.

"பாவலர் பயிலரங்கம்" என்ற குழுவில் இணைந்து  ஒற்றெழுத்து வெண்பாவைத் தனிப்பதிவாகப் பதிவிட வேண்டுகிறேன்!

அன்புடன்

பாட்டரசர் கி. பாரதிதாசன்
தலைவர்:
கம்பன் கழகம் பிரான்சு
உலகத் தொல்காப்பியத் தலைமை மன்றம்
10.08.2018

jeudi 9 août 2018

வெண்பா மேடை - 98


வெண்பா மேடை - 98
  
கொம்பும் காலும் இல்லா வெண்பா!
  
அறிவூட்டும்! ஆற்றல் அணியூட்டும்! நல்ல
உறவூட்டும்! மண்ணுலகம் ஓங்கும் - அறமூட்டும்!
ஒன்றி வதியும் உவப்பூட்டும்! நல்வழி
என்றும் தமிழூட்டும் ஏத்து!
  
[பாட்டரசர் கி. பாரதிதாசன்]
  
கொம்புடை எழுத்துகளும் [கெ, ஙெ, செ], கொம்புச்சுழி எழுத்துகளும் [கே, ஙே, சே....] முன்கொம்பு பின் கொம்புக்கால் எழுத்துகளும் [கௌ, ஙௌ, சௌ...] இரட்டைக்கொம்பு எழுத்துகளும் [கை, ஙை, சை...] காலுடைய எழுத்துகளும் [கா, ஙா, சா, டா....], ரகர வருக்க எழுத்துகளும் [ர், ர, ரா, ரீ...] இப்பாடலில் வாரா. இவ்வெழுத்துகள் இன்றி வரும் பாடலைக் கொம்புக்கால் இல்லாப் பாட்டென்பர்!
  
[கொம்புடைய எழுத்துகளும், காலுடைய எழுத்துகளும், ரகர வருக்க எழுத்துகளும் இப்பாடலில் வாரா]
  
விரும்பிய பொருளில் 'கொம்பும் காலும் இல்லா வெண்பா' ஒன்றைப் பாடுமாறு அன்புடன் வேண்டுகிறேன்.
  
"பாவலர் பயிலரங்கம்" என்ற குழுவில் இணைந்து கொம்பும் காலும் இல்லா வெண்பாவைத் தனிப்பதிவாகப் பதிவிட வேண்டுகிறேன்!
  
அன்புடன்
  
பாட்டரசர் கி. பாரதிதாசன்
தலைவர்:
கம்பன் கழகம் பிரான்சு
உலகத் தொல்காப்பியத் தலைமை மன்றம்
09.08.2018

திசைகளை மாற்றிய தென்னவன்!

திசைகளை மாற்றிய தென்னவன்!
  
திருக்குவளை,
தமிழர்களின் கிழக்கு!
அங்குதான்
தமிழர்களின் இருளகற்றும்
சூரியன் தோன்றியது.
  
வங்கக் கடற்கரை,
தமிழர்களின் மேற்கு!
அங்குதான்
தமிழ் ஆதவன்
பள்ளி கொண்டது!
  
அறிவாலயம்
தமிழர்களின் தெற்கு!
அங்குதான்
தமிழன்னை
ஆட்சி புரிந்தாள்!
  
குமரி முனை
தமிழர்களின் வடக்கு!
அங்குதான்
வடவேங்கடனைப் போன்று
ஈரடியால் உலகளந்த
எங்கள்
வள்ளுவர் வாழ்கின்றார்!
  
நேர்வாக்கு இட்ட தலை
பெண்ணுரிமை காத்த
அர்த்தநாரீசர்!
  
தலை முடிகள்!
கதிரவன் கொண்ட கதிர்கள்!
  
மூளை! - தமிழ்ச்
சோலை!
  
நெற்றி!
தமிழரின் விதியை
முற்றும் மாற்றிய சாசனம்!
  
கனல் பறக்கும்
கண்கள்! - அதன்
சூட்டில் பிறக்கும்
முரசொலிக்கும் பண்கள்!
  
மூக்கு!
புலிகளின் குகை!
  
காது!
அறிவுப் பேழையின்
திறவுகோல் துளை!
  
அனல் பறக்கும் திருவாய்!
உலக அதிசயம்!
  
மேடைகள்தோறும் - தமிழ்
ஆடைகள் தைத்ததால்,
அடுக்கு மலைபோல்
பகையைத்
தடுக்கும் உரையைக் கொடுத்ததால்,
வினா முடியும் முன்னே
விடையை அளித்ததால்
அனல் பறக்கும் திருவாய்!
உலக அதிசயம்!
  
வாய்!
பாவலருக்கும்
நாவலருக்கும்
தாய்!
  
நாக்கு!
நற்றமிழ்த் தாய்
அணிந்த மிதியடி!
  
பற்கள்!
சொற்கள்
விளையாடும் கற்கள்!
  
உதடுகள்!
உயர்தமிழ் ஆலயக்
கதவுகள்!
  
தோள்கள்!
பகை தடுக்கம் அரண்கள்!
  
கைகள்!
எழுதிச் சிவந்ததால்
வள்ளலை நிகர்த்தன!
  
விரிந்த விரல்கள்
பரிதியின் புகைப்படம்!
  
நெஞ்சம்!
எதையும் தாங்கும்
இமயத்தை விஞ்சும்!
  
இதயம்!
இன்பத் தமிழ் வாழும்
இல்லம்!
  
வயிறு
மூடப் பழக்கக் கழிவுகளை
முற்றும் வெளியேற்றிய
இயந்திரம்!
  
தாள்கள்!
தமிழ் மண்ணை
உழுத ஏர்கள்!
  
கலைஞர்
எங்கள் நெஞ்சங்களில்
எப்போதும் வாழ்வார்!
தமிழுக்குத் தொல்லையெனில்
உயிர்கொண்டு எழுவார்!
  
பாட்டரசர் கி. பாரதிதாசன்
தலைவர்
கம்பன் கழகம் பிரான்சு
உலகத் தொல்காப்பியத் தலைமை மன்றம்
08.08.2018

வெண்பா மேடை - 97


வெண்பா மேடை - 97
     
காலில்லா வெண்பா
        
கண்புகுந்த செந்தமிழே! கன்னல் கவியென்றன்
பண்புகுந்த பைந்தமிழே! தண்டமிழே! - மண்புகுந்த
புன்வெறியை முற்றும் புதைத்திடவே, திண்மையுடன்
நன்னெறியை நன்றே நவில்!
    
[பாட்டரசர் கி. பாரதிதாசன்]
    
காலுடைய எழுத்துகளும் [கா, ஙா, சா, டா....], ளகர வருக்க எழுத்துகளும் [ள், ள, ளா, ளி...], ரகர வருக்க எழுத்துகளும் [ர், ர, ரா, ரீ...] இப்பாடலில் வாரா. இவ்வெழுத்துகள் இன்றி வரும் பாடலைக் காலில்லாப் பாட்டென்பர்.
    
விரும்பிய பொருளில் 'காலில்லா வெண்பா' ஒன்றைப் பாடுமாறு அன்புடன் வேண்டுகிறேன்.
    
"பாவலர் பயிலரங்கம்" என்ற குழுவில் இணைந்து காலில்லா வெண்பாவைத் தனிப்பதிவாகப் பதிவிட வேண்டுகிறேன்!
    
அன்புடன்
    
பாட்டரசர் கி. பாரதிதாசன்
தலைவர்:
கம்பன் கழகம் பிரான்சு
உலகத் தொல்காப்பியத் தலைமை மன்றம்
09.08.2018

காலில்லா வெண்பா

mardi 7 août 2018

வெண்பா மேடை - 96


வெண்பா மேடை - 96
  
கொம்பில்லா வெண்பா!
  
சித்தமுறும் எண்ணம் சிறப்புறும்! ஈசனிடம்
நித்தமுறும் எண்ணம் நிழல்தரும்! - சத்தியம்!
பாடும் திறன்கூட்டும்! பண்ணின் அமுதுாட்டும்!
ஓடும் உயிருறும் ஊழ்!
  
[பாட்டரசர் கி. பாரதிதாசன்]
  
கொம்புடை எழுத்துகளும் [கெ, ஙெ, செ], கொம்புச்சுழி எழுத்துகளும் [கே, ஙே, சே....] முன்கொம்பு பின் கொம்புக்கால் எழுத்துகளும் [கௌ, ஙௌ, சௌ...] இரட்டைக்கொம்பு எழுத்துகளும் [கை, ஙை, சை...] ஆகிய எழுத்துகள் வாரா. இவ்வெழுத்துகள் இன்றி வரும் பாடலைக் கொம்பில்லாப் பாட்டென்பர்.
  
விரும்பிய பொருளில் 'கொம்பில்லா வெண்பா' ஒன்றைப் பாடுமாறு அன்புடன் வேண்டுகிறேன்.
  
"பாவலர் பயிலரங்கம்" என்ற குழுவில் இணைந்து கொம்பில்லா வெண்பாவைத் தனிப்பதிவாகப் பதிவிட வேண்டுகிறேன்!
  
அன்புடன்
  
பாட்டரசர் கி. பாரதிதாசன்
தலைவர்:
கம்பன் கழகம் பிரான்சு
உலகத் தொல்காப்பியத் தலைமை மன்றம்
04.08.2018

lundi 6 août 2018

அக்கர வருத்தனம்



அக்கர
வருத்தனம்
  
அக்கரம் - எழுத்து, வருத்தனை - பெருக்குதல். எழுத்துகளைப் பெருக்கி மொழியாக்கிப் பொருள் கொள்ளலால் 'அக்கர வருத்தனம்' எனப்பட்டது.
  
அக்கர வர்த்தனம், எழுத்துப் பெருக்கம், எழுத்து வருத்தனம் என்பன ஒருபொருள் குறிப்பன.
  
எழுத்து வருத்தனம் என்பது, ஓரெழுத்தான் ஒரு மொழியாய்ப் பொருள் பயந்து, பின் ஓரெழுத்தைச் சேர்க்கப் பிறிதொரு மொழியாய்ப் பொருள் பயந்து [ஈரெழுத்து ஒருமொழி], அவ்வாறே முறையாக ஒவ்வொரு எழுத்தாகச் சேர்க்க ஒவ்வொரு மொழியாய்ப் பொருள் பயப்பப் பாடுவது.
  
ஓதும் பெயர்குன்றி ஓங்கும் அயற்போதை!
ஓதும் கலிப்பா உறுமீறு! - ஊதும்
இதழ்ச்சந்து! நன்விளக்[கு] ஏற்றும் ஒளிநாள்!
மது,போக்கு, தொள்ளை மதி!
  
[பாட்டரசர் கி. பாரதிதாசன்]
    
ஓதும் பெயர் - ராம்,
ராம் என்ற சொல் குன்றின் 'ரம்' என்று வரும்
ரம் - மது
  
ஓதும் கலிப்பாவில் ஈற்றில் வரும் உறுப்பு - வாரம்
வாரம் - போக்கு, சுரிதகம், அடக்கியல், வைப்பு என்பன ஒரு பொருள் குறிப்பன.
  
ஊதும் இதழ்ச்சந்து, - தொளை
தொளை - தொள்ளை என்றும் பெயர்பெறும்.
  
விளக்கு ஏற்றும் நாள் - வெள்ளி
வெள்ளி - மதி என்றும் பெயர் பெறும்.
  
ரம் என்ற சொல்லுடன் 'வா' எழுத்தைச் சேர்க்க 'வாரம்' என்ற சொல் பெறப்படும். வாரம் என்ற சொல்லுடன் 'து' எழுத்தைச் சேர்க்கத் 'துவாரம்' என்ற சொல் பெறப்படும். துவாரம் என்ற சொல்லுடன் '' எழுத்தைச் சேர்க்க 'ஊதுவாரம்' என்ற சொல் பெறப்படும். [ ஊதுவாரம் - வெள்ளி என்று பொருள் பெறும்]
  
வெண்பாவில் ரம் என்ற சொல் 'மது' என்றும், வாரம் என்ற சொல் 'போக்கு' என்றும், துவாரம் என்ற சொல் 'தொள்ளை' என்றும், ஊதுவாரம் என்ற சொல் 'மதி' என்றும், மாற்றுப் பெயர்களைக் கொண்டிருக்கும்.
  
இப்பாடலின் வழியாக 'ஊதுவாரம்' என்ற சொல் பெறப்பட்டது. [+து+வா+ரம்] [ரம், வாரம், துவாரம், ஊதுவாரம்]
  
[ஓரெழுத்து ஒரு மொழியாய் வரவேண்டும் என்ற விதியிருக்க 'ரம்' என்று ஈரெழுத்தைப் பெற்றது, மெய்யெழுத்துக் கணக்குப் பெறாத நிலையில் ஓரெழுத்து ஒருமொழியாயிற்று என அமைவு கொள்க]
  
பாட்டரசர் கி. பாரதிதாசன்
தலைவர்
கம்பன் கழகம் பிரான்சு
உலகத் தொல்காப்பியத் தலைமை மன்றம்
05.08.2018

வெண்பா மேடை - 95



வெண்பா
மேடை - 95
  
பழமொழி வெண்பா!
  
குறைகுடம் கூத்தாடும்!
  
எல்லாம் தெரியுமென எள்ளி நகையாடும்!
சொல்லால் துயரைச் சுமந்தாடும்! - பொல்லாப்
பொறையுடன் பொங்கிப் புரண்டாடும்! ஆடும்
குறைகுடம் ஒக்கும் குணம்!
  
[பாட்டரசர் கி. பாரதிதாசன்]
  
சிறந்த நெறிகளைப் பழமொழியாக நம் முன்னோர் வழங்கி வந்தனர். வெண்பாவால் பாடப்பட்ட 'பழமொழி நானுாறு' என்ற நுால் தமிழில் உள்ளது.
  
ஒரு பழமொழியின் கருத்தைத் தாங்கி இவ்வெண்பா அமையவேண்டும். 'குறைகுடம் கூத்தாடும்' என்ற பழமொழியை மேற்கண்ட வெண்பா பகர்கின்றது.
  
விரும்பிய பொருளில் 'பழமொழி வெண்பா' ஒன்றைப் பாடுமாறு அன்புடன் வேண்டுகிறேன்.
  
"பாவலர் பயிலரங்கம்" என்ற குழுவில் இணைந்து பழமொழி வெண்பாவைத் தனிப்பதிவாகப் பதிவிட வேண்டுகிறேன்!
  
அன்புடன்
  
பாட்டரசர் கி. பாரதிதாசன்
தலைவர்:
கம்பன் கழகம் பிரான்சு
உலகத் தொல்காப்பியத் தலைமை மன்றம்
05.08.2018