கோனேரிக் கூத்தா!

கோனேரிக் கூத்தா!
வானேறி ஏன் சென்றாய்?
　　
கோத்த மணியாகக் கோலக் கவிதைகளை
யாத்த இசைக்கவியே எங்குற்றாய்? - கூத்தின்
இருப்பாய் இருந்தனையே! உன்பிரிவைக் கேட்டு
நெருப்பாய்க் கொதிக்கிறது நெஞ்சு!
　　
கோனேரிக் கூத்தா! கொடுமுலகின் துன்பத்தால்
வானேறிச் சென்றாயோ? வாடுகிறேன்! - ஊனேறி
என்றன் உயிரேறி நீ..இருந்தாய்! சொல்லாமல்
இன்றேன் பிரிந்தாய் இயம்பு?
　　
ஓங்கி ஒலித்த குரலெங்கே? ஒண்டமிழைத்
தாங்கித் தழைத்த தலையெங்கே? - வீங்கிப்
புகழ்கொண்ட தோளெங்கே? பொங்கியழும் எம்மூர்
அகங்கொண்ட அன்பால் அதிர்ந்து!
　　
ஒப்பனை வண்ணங்கள் உன்நினைவால் இங்குருகும்!
இப்பனை மார்பனை ஏன்பிரிந்தோம்? - அப்பப்பா
கூத்திடம் குன்றும்!நம் கோனேரி பாட்டின்றிப்
பாத்திரம் காணும் பழி!
　　
பேச நினைத்தேன் பெருங்கவியே உன்னோடு!
பாசக் குயிலே! பறந்தனையே! - மோசத்
துயரில் முழுகுகிறேன்! தோழா!உன் பேரை
உயிரும் முனங்கும் உடைந்து!
　　
பாட்டரசர் கி. பாரதிதாசன்
10.07.2018

கையறுநிலை

முனைவர் அ. அறிவுநம்பி கையறுநிலை
　　
ஏனோ பிரிந்தனையோ? இங்குப் பிறந்ததும்
வீணோ எனமனம் வெந்தனையோ? - வானோரும்
அந்தமிழை நாடினரோ? அ.அறிவு நம்பியே!
எந்தமுளம் தேடுமுனை இங்கு!
　　
ஆழ்ந்த உரையெங்கே? அன்பு மனமேங்கே?
சூழ்ந்த புகழெங்கே? துாய்மையுடன் - வாழ்ந்தவுன்
ஆற்றலறம் எங்கே? அருமறிவு நம்பியே!
கூற்றுவனைக் கொண்டதேன் கூறு
　　
கம்பன் கவியாய்ந்தாய்! கன்னல் குறளாய்ந்தாய்!
இம்மண் உவக்க எழுத்தீந்தாய்! - நம்மொழி
ஆள அகங்கொண்டாய்! அ.அறிவு நம்பியே!
மீளாப் பிரிவேன் விரைந்து?
　　
இளங்கோ இசையுணர்ந்[து] ஈந்த அரும்நுால்
வளங்கோ வகுத்தவழி வார்க்கும்! - விளக்கமினி
யாரிடம் யாம்பெறுவோம்? அ.அறிவு நம்பியே!
ஓரிடம் உன்னிணை ஓது?
　　
எழுத இதழூண்டாம்! ஏற்றபணி யுண்டாம்!
தொழுத கலையுண்டாம்! தொன்மை - மொழிண்டாம்!
எல்லாம் உனைத்தேட, இன்னறிவு நம்பியே!
சொல்லாமல் சென்றாய் துணிந்து!
　　
ஆழ்ந்த துயருடன்
　　
பாட்டரசர் கி. பாரதிதாசன்
தலைவர்:
கம்பன் கழகம் பிரான்சு
உலகத் தொல்காப்பியத் தலைமை மன்றம்