காணும் பொங்கல் வாழ்த்து

 

தமிழ்ப் புத்தாண்டுப் பொங்கல் வாழ்த்து

திருவள்ளுவர் ஆண்டு - 2057

போகித் திருநாள் வாழ்த்து

 

காணும் பொங்கல்

 

மாட்டுப் பொங்கல்

 

பொங்கல் திருநாள்

 

போகித் திருநாள்

 

தமிழ்ப் புத்தாண்டு

 

வணக்கம்

 

திருவள்ளுவர் ஆண்டு 2054

தமிழ்ப் புத்தாண்டுப் பொங்கல் வாழ்த்துக்கள்!

 

நேரிசை வெண்பா!

 

குலமோங்க, கொள்கைக் குணமோங்க, வாழ்க்கை

நலமோங்க வேண்டுகிறேன் நாளும்! - வளமோங்கப்

வண்ணமிகு புத்தாண்டு வந்ததுவே! வாழ்த்துகிறேன்

எண்ணமிகு அன்பால் இனித்து!

 

அறுசீர் விருத்தம்!

 

உலகத் தமிழர் புத்தாண்டாம்

..........உயர்ந்த தைந்நாள் போற்றிடுவோம்!

திலக மிட்டு மலரிட்டுச்

..........சேர்ந்து தொழுகை புரிந்திடுவோம்!

இலகு தமிழில் கவிபாடி

..........இன்றேன் வாழ்த்தை யிசைத்திடுவோம்!

அலகில் புகழ்சேர் தாய்மொழியின்

..........அமுதைப் பருகிக் களித்திடுவோம்!

 

அகமும் புறமும் கற்றிடுவோம்!

..........அறமும் அருளும் பெற்றிடுவோம்!

புகழும் பணிகள் செய்திடுவோம்!

..........புவியே போற்ற நடையிடுவோம்!

முகமும் மலரும் ஒப்பென்று

..........மொழியும் வண்ணம் வாழ்ந்திடுவோம்!

திகழும் தமிழர் புத்தாண்டுச்

..........சீரைப் பாடி மகிழ்ந்திடுவோம்!

 

தொன்மை மிக்க தமிழ்நாடு!

..........துணிவே மிக்க தமிழ்நாடு!

நன்மை மிக்க தமிழ்நாடு!

..........நறுமை மிக்க தமிழ்நாடு!

வன்மை மிக்க தமிழ்நாடு!

..........வாய்மை மிக்க தமிழ்நாடு!

முன்மைத் தமிழின் புத்தாண்டை

..........முழங்கி ஒளிரும் தமிழ்நாடு!

 

பாட்டரசர் கி. பாரதிதாசன்

தலைவர்
கம்பன் கழகம் பிரான்சு

தொல்காப்பியர் கழகம் பிரான்சு

15.01.2023

போகித் திருநாள்

 

போகித் திருநாள் வாழ்த்துக்கள்!

 

தேவி தேவி யெனவேண்டித்

..........       தென்னந் தமிழை வணங்கிடுவோம்!

கூவிக் கூவிச் சந்தமுடன்

..........       குரவைக் கூத்தும் ஆடிடுவோம்!

துாவித் துாவி விதைத்தவரின்

..........       தொண்டைப் போற்றிப் பாடிடுவோம்!

தாவித் தாவி வரும்புலியாய்த்

..........       தமிழர் ஆண்டே வந்திடுவாய்!

 

மொழியைக் காக்கும் அறிஞர்க்கும்

..........       மோனை காக்கும் கவிஞர்க்கும்

வழியைக் காக்கும் மறவர்க்கும்

..........       மண்ணைக் காக்கும் உழவர்க்கும்

விழியைக் காக்கும் இமையாக

..........       விரைந்து காக்கும் உறவர்க்கும் 

பொழிலைக் காக்கும் பூங்கவியாற்

..........       போகித் திருநாள் வாழ்த்துக்கள்!

 

பாட்டின் அரங்கப் பாவலரே!

..........       பண்பிற் சிறந்த பாவையரே!

நாட்டின் நிலையைத் தினமெண்ணி

..........       நலத்தை முழங்கும் நாவலரே!

ஏட்டின் சிறப்பை உலகுணர

..........       எழுதிக் குவிக்கும் வல்லவரே!

காட்டில் கமழும் மலர்சேர்த்துக்

..........       கன்னல் வாழ்த்துப் படைக்கின்றேன்!

 

பாட்டரசர் கி. பாரதிதாசன்

தலைவர்
கம்பன் கழகம் பிரான்சு

தொல்காப்பியர் கழகம் பிரான்சு

14.01.2023

இயற்றமிழ்ப் பொங்கல்

திருவள்ளுவர் ஆண்டு 2051 தைத்திங்கள் 4
18.01.2020
　　
இயற்றமிழ்ப் பொங்கல் பொங்குகவே!
　　
ஏடு மணக்கும் இயற்றமிழை
　　　ஏந்தும் பொங்கல் வாழியவே!
பீடு மணக்கும் நன்னுாலும்,
　　　பெருமை மணக்கும் நல்லுரையும்,
நாடு மணக்கும் நலஞ்சூட்டும்!
　　　நன்மை மணக்கும் வழிகாட்டும்!
வீடு மணக்கும் வண்ணத்தில்
　　　விளித்துப் பொங்கல் பொங்குகவே!
　　
ஈடு மணக்கும் சொல்யாவும்
　　　இனிமை மணக்கும் கற்றிடுவீர்!
நீடு மணக்கும் நன்னெறியால்
　　　நெஞ்சு மணக்கும்! எந்நாளும்
மேடு மணக்கும் சான்றோரை
　　　மேவி மணக்கும் செயல்வாழ்க!
காடு மணக்கும் வண்ணத்தில்
　　　கமழும் பொங்கல் பொங்குகவே!
　　
ஈடு - திருவாய்மொழி உரைநுால்
மேடு - பெருமை
　　
பாட்டரசர் கி. பாரதிதாசன்,
கம்பன் கழகம், பிரான்சு,
தொல்காப்பியர் கழகம், பிரான்சு.

மாட்டுப் பொங்கல்

திருவள்ளுவர் ஆண்டு 2051 தை 2
16.01.2020
　　
உழவர் திருநாள் வாழ்த்துக்கள்!
　　
மாட்டுப் பொங்கல் பொங்குகவே!
　　
உழவே உலகின் அச்சாணி!
　　　உறவே வயலை உழுகாளை!
தொழுமே குறளை எத்திசையும்!
　　　தொண்டே இனத்தின் அடையாளம்!
விழுதே போன்று குடிதாங்கும்
　　　வீறே தமிழர் வியன்மாட்சி!
அழகே! அமுதே! தைப்பெண்ணே!
　　　அறமே இனிக்கப் பொங்குகவே!
　　
ஏறு துள்ளும் கலத்தினிலே
　　　இளமை துள்ளும் வளமேந்தி,
ஆறு பாயும் நிலமாக
　　　அன்பே பாயும் அருளேந்தி,
ஊறு மகத்துள் எந்நாளும்
　　　உயர்ந்த கவிதை சுவையேந்தி,
வேறு வேறாய் நிற்காமல்
　　　வேராய் வன்மை பொங்குகவே!
　　
பாட்டரசர் கி. பாரதிதாசன்
கம்பன் கழகம் பிரான்சு
தொல்காப்பியர் கழகம் பிரான்சு

பொங்கல் திருநாளே பொங்கு!

பொங்கல் திருநாளே பொங்கு!

1.
எல்லோரும் இன்புற்று வாழ்கவே! அன்பொளிரும்

சொல்லோடு மன்பதை சுற்றுகவே! - நல்லமுதாம்

சங்கத் தமிழ்மணக்கச் சந்தக் கவியினிக்கப்

பொங்கல் திருநாளே பொங்கு!

2.
ஒற்றுமை ஓங்கி ஒளிருகவே! நல்லொழுக்கம்

பற்றுனைப் பற்றிப் படருகவே! - நற்றுணையாய்த்

திங்கள் தரும்நலமாய்த் தென்றல் கமழ்மணமாய்ப்

பொங்கல் திருநாளே பொங்கு!

3.
உழைப்பே உயர்வுதரும்! உண்மையொளி யூட்டும்!

இழைப்பே பொலிவுதரும்! எங்கும் - குழையாமல்

தங்க மனமேந்தித் தந்த வளமேந்திப்

பொங்கல் திருநாளே பொங்கு!

4.
மாண்பெனும் சோலை மலருகவே! வண்டமிழ்

ஆண்டெனத் தைமகளை வேண்டுகவே! - பூண்டொளிரும்

மங்கை அணியழகாய் மாலை மதியழகாய்ப்

பொங்கல் திருநாளே பொங்கு!

5.
செய்யும் தொழிலையே தெய்வமென எண்ணிடுக!

உய்யும் வழியுணர்க! ஒண்டமிழ் - நெய்கின்ற

வங்கக் கடல்புதுவை வாழும் புலமையெனப்

பொங்கல் திருநாளே பொங்கு!

6.
துணிவே துணையெனக் கொண்டிடுக! நெஞ்சுள்

பணிவே உயர்வுதரும் பண்பாம்! - பணிசிறக்க!

செங்கதிர் முற்றிச் செழித்துள்ள பொன்னிலமாய்ப்

பொங்கல் திருநாளே பொங்கு!

7.
ஒழுக்கம் உயிரினும் ஓம்பிடுக! கற்றோர்

பழக்கம் பயனுறுக! பாரே - செழித்தாட

மங்கலம் நல்கும் மலர்த்தமிழ் வாய்மறையைப்

பொங்கல் திருநாளே பொங்கு!

8.
அன்பொன்றே இவ்வுலகை ஆட்படுத்தும்! பேராற்றல்

ஒன்றென்றே ஓதி  உணர்வுறுக ! - நன்றாடித்

தொங்கும் மனக்குரங்கைத் தங்கும் வழிகாட்டிக்

பொங்கல் திருநாளே பொங்கு!

9.
கடமையும் கண்ணியமும் நற்கட்டுப் பாடும்

உடமையாய்ப் பெற்றே ஒளிர்க! - குடியோங்கித்

தங்கி மகிழ்விருக்கத் தாள இசையொலிக்கப்

பொங்கல் திருநாளே பொங்கு!

10.
எண்ணமே வாழ்வாகும்! என்றென்றும் உண்மையொளிர்

வண்ணமே ஆன்ம வளமாகும்! - மண்ணுலகம்

எங்கும் இனிமையுற ஏற்ற நெறிகளைப்

பொங்கல் திருநாளே பொங்கு!

தமிழர் புத்தாண்டு 2045

வணக்கம்!

திருவள்ளுவா் ஆண்டு 2045

இனிய தமிழ்ப்புத்தாண்டு வாழ்த்துக்கள்

பொங்கல் திருநாள் பொழியட்டும் நல்வளங்கள்

தங்கத் தமிழ்போல் தழைத்து!

பொங்கல் திருநாள் புலரட்டும் பன்னலங்கள்

திங்கள் ஒளிபோல் திகழ்ந்து!

பொங்கல் திருநாள் பொலியட்டும் பொன்மலராய் 

உங்கள் மனமும் ஒளிர்ந்து!

பொங்கல் திருநாள் புகழட்டும் பூந்தமிழை

எங்கும் இனிமை இசைத்து!

பொங்கல் திருநாள் புனையட்டும் புத்துலகைச்

சங்கத் தமிழாய்ச் சமைத்து!

பொங்கல் திருநாள் புடைக்கட்டும் வேற்றுமையை!

கங்குல் நிலையைக் கழித்து!

பொங்கல் திருநாள் பொருத்தட்டும் ஒற்றுமையை!

எங்கும் பொதுமை இசைத்து!

பொங்கல் திருநாள்  புதுக்கட்டும் சாதிமதம்
தொங்கும் உலகைத் துடைத்து! 

பொங்கல் திருநாள் புகுத்தட்டும் வாய்மறையை! 

தங்கும் அறங்கள் தழைத்து!

பொங்கல் திருநாள் புசிக்கட்டும் சீா்கம்பன்

செங்கனித் தோப்பில் திரிந்து!

14.01.2014