விருத்த மேடை - 77
கலிவிருத்தம் - 13
மா + மா + மா + காய்
கரையு லாவு கதிர்மா மணிமுத்தம்
திரையு லாவு வயல்சூழ் திருப்புன்கூர்
உரையி னல்ல பெருமான் அவர்போலும்
விரையி னல்ல மலர்ச்சே வடியாரே!
[திருஞான சம்பந்தர், தேவாரம் - 286]
பாலு நெய்யுந் தயிரும் பயின்றாடித்
தோலு நுாலுந் துதைந்த வரைமார்பர்
மாலுஞ் சோலை புடைசூழ் மடமஞ்ஞை
ஆலுஞ் சோற்றுத் துறைசென் றடைவோமே!
[திருஞான சம்பந்தர், தேவாரம் - 265]
புகழ் சேர்ப்போம்!
முன்னைத் தமிழர் மொழிந்த மறமேற்போம்!
அன்னை யள்ளி யளித்த அறமேற்றோம்!
பொன்னைப் போன்று பொலியும் அகமேற்போம்!
பின்னை யுலகம் பேணப் புகழ்சேர்ப்போம்!
[பாட்டரசர்] 21.06.2022
கலிவிருத்தம் ஓரடியில் நான்கு சீர்களைப் பெறும். நான்கடிகள் ஓரெதுகையில் அமையும். ஒன்று மூன்றாம் சீர்களில் மோனை வரும். காய் வரும் இடத்தில் அருகி விளம் வரும்.
மா + மா + மா + காய் என்ற வாய்பாட்டில் விரும்பிய தலைப்பில் கலிவிருத்தம் ஒன்று இயற்றுமாறு அன்புடன் வேண்டுகிறேன்.
அன்புடன்
பாட்டரசர் கி. பாரதிதாசன்
கம்பன் கழகம் பிரான்சு
தொல்காப்பியர் கழகம், பிரான்சு
29.10.2022
