தென்பசியார்
வாழியவே!
எடுப்பு
தென்பசியார் வாழியவே! - என்றும்
இன்மொழியார் வாழியவே!
[தென்பசியார்]
தொடுப்பு
விண்மழையார் வாழியவே! - சந்தப்
பண்மழையார் வாழியவே!
[தென்பசியார்]
முடிப்பு
வண்ணமுடன் வாழியவே! வள்ளுவனார் தந்தபுகழ்
எண்ணமுடன் வாழியவே! எத்திசையும் ஏத்துகின்ற
அண்ணனுடன் வாழியவே! அருந்தந்தை கொள்கையிலே
திண்ணமுடன் வாழியவே! செந்தமிழின் சீர்முழங்கித்
[தென்பசியார்]
யாப்பேந்தி வாழியவே! எந்நாளும் கவிபூக்கும்
தோப்பேந்தி வாழியவே! தொன்மொழியாம் நம்மொழிக்குக்
காப்பேந்தி வாழியவே! கருத்தெல்லாம் வாழைதரும்
சீப்பேந்தி வாழியவே! தென்னவர்தம் பேர்முழங்கித்
[தென்பசியார்]
குடிசெழித்து வாழியவே! கொல்லைவளர் ஆலெனவே
அடிசெழித்து வாழியவே! அகத்துள்ளே அன்புமலர்க்
கொடிசெழித்து வாழியவே! அந்தமிழின் அரசோங்க
வெடிவெடித்து வாழியவே! வெல்தமிழின் ஏர்முழங்கித்
[தென்பசியார்]
ஊர்போற்ற வாழியவே! உற்றாரும் கற்றாரும்
சீர்போற்ற வாழியவே! திசையாவும் பாடுதமிழ்
வேர்போற்ற வாழியவே! விந்தைமிகு பாட்டுலகில்
தார்போற்ற வாழியவே! தண்டமிழின் மண்முழங்கி
[தென்பசியார்]
பாட்டரசர் கி. பாரதிதாசன்
28.04.2024
