தேனூறும் தமிழே

தேனூறும் தமிழே

எடுப்பு

பூத்தாடும் பூஞ்சோலை பாரு - நெஞ்சைப்

புண்ணாக்கும் பொன்மாலை யோடு

                                    (பூத்தாடும்)

தொடுப்பு

நாத்தாடும் வயல்வெளியாம் மேட்டில் - நாளும்

நாமிருந்தோம் பேரின்ப வீட்டில்

                                   (பூத்தாடும்)

முடிப்புகள்

இரவோடும் மனத்தோடும் விளையாடும் முல்லை - செவ்

விதழோரம் வாய்வைத்தால் சுவைக்கேதாம் எல்லை

அருளோடும் அன்போடும் எனையாளும் நங்கை - நல்

அழகோடும் அறிவோடும் உறவாடும் மங்கை

                                   (பூத்தாடும்)

இனிதான மணம்வீசம் எழிலான மேனி - என்றும்

இயல்பான மொழிபேசும் கலைஞான வாணி

தணியாத மோகத்தைத் தந்தவளே வாநீ - எனைத்

தனியாக வாடவிட்டே ஏன்போனா யோநீ

                                   (பூத்தாடும்)

மலராகும் மதுவாகும் மாதேஉன் முகமே - பவள

மணியாகும் அணியாகும் அன்பேஉன் நகமே

நிலவாகும் ஒளியாகும் அமுதேஉன் அகமே - என்

நினைவாகும் வாழ்வாகும் அழகேஉன் சுகமே

                                   (பூத்தாடும்)

உடலானாய் உயிரானாய் தேனூறும் தமிழே - என்

உணவானாய் உறவானாய் அமுதூறும் அழகே

கடலானாய் நதியானாய் கற்பனையாம் காட்டில் - உயர்

கருவானாய் பொருளானாய் நான்பாடும் பாட்டில்

                                   (பூத்தாடும்)