கனிவிருத்தம் - பகுதி 8

கலிவிருத்தம் (அ) கனிவிருத்தம்

36.

பெண்மனத்துள் உள்ளபொருள் பேரிறைவன் அறிவானோ?

பண்மணத்துள் திளைக்கின்ற பாவலன்யான் என்செய்வேன்?

கண்கணத்துள் காட்டுகின்ற காரிகையின் கைப்பற்றித்

தண்மணத்துள் தழைத்தோங்கத் தவமிருக்கும் என்னெஞ்சே!

37.

கற்பனையாம் கடல்குளித்துக் கண்ணமுதக் கவிபடைத்து

நற்பனையாம் தோப்புக்குள் நானிருந்து வாடுகிறேன்!

நற்றுணையாம் குயிலிருக்கு! நடனமிடும் மயிலிருக்கு!

சொற்சுவையாள் இல்லாமல் சுருங்குதடி என்னெஞ்சே!

38.

கோவைநிற உதட்டழகும்! கோர்த்தமணிப் பல்லழகும்!

பாவைவரும் நடையழகும்! பார்வைதரும் வில்லழகும்!

சேவைமனச் செயலழகும்! தேன்பொழியும் சொல்லழகும்!

தேவையெனத் தினங்கெஞ்சித் திண்டாடும் என்னெஞ்சே!

39.

பசுங்கொடியே! பௌர்ணமியே! பளபளக்கும் பொற்பட்டே!

பசும்பாலே! பலாச்சுளையே! பனிப்பூவே! படர்கின்ற

பசும்புல்லே! பண்பமுதே! பழக்குலையே! தேன்பாகே!

பசுங்கிளியே! உனையெண்ணிப் பாடுதடி என்னெஞ்சே!

40.

மையழகு விழிகண்டு! மலரழகு முகங்கண்டு!

கையழகு அணிகண்டு! கருத்தழகு கவிகண்டு!

தையழகு வளங்கண்டு! தமிழழகு உளங்கண்டு!

பையழகு தோட்கண்டு பரவுதடி என்னெஞ்சே!

தொடரும்