காதல் ஆயிரம் [பகுதி - 87]

806.

மின்னஞ்சல் கண்டவுடன் மீன்போல் மனம்நீந்தும்!

பொன்னஞ்சல் என்றே புகழ்ந்தேத்தும்! - உன்னஞ்சல்

இல்லாத நாள்கள் இருட்டுலகாய் வாட்டுமெனை!

செல்லாத காசாய்ச் சிதைத்து!

807.

ஒருமுத்தம் தந்தாய்! ஒருகோடி வாழ்நாள்

தரும்முத்தம் என்பேன்! தழைத்த - அரும்முத்த

ஓசையினை எண்ணி உடல்நெகிழும்! வானளவு

ஆசையினை அள்ளி அணைத்து!

808.

மையிட்டு வந்த மலா்க்கிளியே! உன்னுடைய

கையிட்டுத் தந்த சிறுகஞ்சி - தையிட்டுப்

பொங்கும் இனிமை! புலவன் உயிர்குளிர

எங்கும் இனிமை எழுது!

809.

பனைத்தோள் புடைத்தெழும்! பாவலன் உள்ளம்

உனைக்கேள் எனவுருகும்! உண்மை! - எனைவெறுத்து

பொய்யிட்டு வாழ்வதோ? போற்றுமுயா் காதலில்

மெய்யிட்டு வாழ்வோம் மிளிர்ந்து!

810.

மாலை  மயக்கம்  மறுநாள் தொடா்ந்துய்யும்!
ஆலை தறியென ஆசைநெய்யும்! -  காலை
உதயத்தில்  உன்குரல்  கேட்டிட,  என்றன்
இதயத்தில் ஊறும் இனிப்பு!

(தொடரும்)