காதல் ஆயிரம் [பகுதி - 94]

காதல் ஆயிரம் [பகுதி - 94]

841.

பெரும்சிற்பி நுட்பமுடன் பெற்ற சிலையே!

கரும்பேந்தி நிற்கும் கலையே! - விருந்தொன்றைக்

கண்டுவக்கும் ஏழையெனக் காதல் கவிஞன்யான்

கொண்டுவக்கும் பூங்குயிலே கொஞ்சு!

842.

தொடுகின்ற காலத்தில் துாயவனே உன்..கை

இடுகின்ற இன்பத்தை ஆ..ஆ..! - மடு..மோதிப்

பாய்ந்தோடும் வெள்ளமெனப் பாய்விரித்து மஞ்சத்தை

ஆய்தோடும் ஆசை அலை!

843.

கூட்டிப் பெருக்குகிறாள்! கொள்ளை அழகாலே

வாட்டி வதைக்குகிறாள்! வண்ணவிழி - காட்டி

மயக்குகிறாள்! பேசி மடக்குகிறாள்! என்னை

இயக்குகிறாள் இன்பம் இசைத்து!

844.

கண்களில் நின்றாடும் காரிகையே! இவ்வுலகப்

பெண்களில் நீ..மின்னும் பேரழகி! -  பண்களில்

உன்னைப் படைக்கின்றேன்! ஊறும் நினைவுகளில்

என்னை மறக்கின்றேன் இங்கு!

845.

குளிர்ஊட்டும் கோதையே! கொஞ்சுதமிழ்  போன்று 

மலா்ஊட்டும் போதையே! வாழ்வை - வளமாக்கும்

வஞ்சியே! இன்கவி மாரியே! உன்னழகில்

நெஞ்சியே ஏங்கும் நெகிழ்ந்து!.

(தொடரும்)