காதல் ஆயிரம் [பகுதி - 84]

காதல் ஆயிரம் [பகுதி - 84]

791.

கண்கட்டும் வித்தைகளைக் கற்றவளே! என்னாசை

மண்தொட்டும் விண்தொட்டும் வந்தாடும்! - பொன்கொட்டும்!

பூ..கொட்டும்! ஓங்கிப் புகழ்கொட்டும்! காதலால்

பா..கொட்டும் பாடிப் பற!

792.

சுகமான பாக்களில் சொக்கியே உன்னை

அகமான ஆழ்கடலில் வைத்தேன்! - பகலில்

சோகத்தில் என்னுயிரைச் சுட்டாலும் நல்லிரவில்

மோகத்தில் மூழ்குமே மூச்சு!

793.

பூக்கள் மலர்ந்தாடும்! பொற்பாவைப் புன்னகையில்

பாக்கள் மலர்ந்தாடும்! பாடுமெனை - ஊக்கமுடன்

தாக்கப் பறந்தாடும் தண்ணழகே! இன்பத்தை

ஆக்கப் பறந்தாடும் அன்பு!

794.

செல்வனே! என்னினிய சிந்தை நிறைந்தவனே!

மல்லனே! மாய மனத்தவனே! - வெல்லனே!

கள்ளனே! காதல் கணிப்பவனே! நற்கவிதை

வெள்ளனே! வா!வா விரைந்து!

795.

செல்லமே என்று..நீ சொல்லும் பொழுதெல்லாம்

கொல்லுமே என்னைக் கொடுமாசை! - வல்லவனே!

கல்லுமே மெல்லக் கசிந்துருகும் சொல்லாற்றல்!

கள்ளுமே உன்றன் கவி!

(தொடரும்)