lundi 30 janvier 2023

சந்தக் கலிவிருத்தம் - 5

 

விருத்த மேடை - 88

 

சந்தக் கலிவிருத்தம் - 5

 

தாதன + தனதன + தனதன + தனனம்

[ஒவ்வொரு சீரும் 4  சந்த மாத்திரை]

 

கோதைகள் சொரிவன குளிரிள நறவம்

பாதைகள் சொரிவன பருமனி கனகம்

ஊதைகள் சொரிவன உறையுறு மமுதம்

காதைகள் சொரிவன செவிநுகர் கனிகள்

 

[கம்பன், பால. நாட்டு - 51]

 

முதல் 3 இடங்களில் தனதன மிகுதியாய் வரும். தந்தன, தாந்தன, தாதன அருகி வரும். 4 ஆம் இடத்தில் தனன,  தனனா இவற்றின் ஈற்றில் மெய் பெற்றவை மிகுதியாய் வரும் இப்பாடலில் வருவன எல்லாம் 4 சந்த மாத்திரைச் சீர்களே. மோனை 1, 3 ஆம் சீர்களில் அமையும்.

 

கனிமழை பொழிவன கவிமகள் விழிகள்!

பனிமழை பொழிவன பண்மகள் மொழிகள்!

தனிமழை பொழிவன தமிழ்மகள் வழிகள்!

இனிமழை பொழிவன எழிலவள் இணையோ?  

 

மணிவிழி தருமொழி மதுமழை பொழியும்!

அணிவழி யிதுவென அவணடை மொழியும்!

பணிவழி மணமுறு படர்கவி புனையும்!

பிணிவழி யினியிலை பெயர்புகழ் விளையும்!

 

[பாட்டரசர்]

 

மேற்கண்ட சந்தக் கலிவிருத்தம் ஒன்றே ஒன்று விரும்பிய தலைப்பில் இயற்றுமாறு அன்புடன் வேண்டுகிறேன்.

 

பாட்டரசர் கி. பாரதிதாசன்

கம்பன் கழகம் பிரான்சு
தொல்காப்பியர் கழகம், பிரான்சு

29.01.2023

jeudi 19 janvier 2023

தென்பரைத் தமிழன்பன்

 


சாற்றுகவி

 

தென்பரையின் தமிழன்பன் சிந்தைக் குள்ளே

        செந்தமிழாள் குடியிருக்கக் கண்டேன்! போற்றும்

இன்னிரையின் வண்ணத்தில் இனிக்கும் இந்நுால்

        இன்பத்தின் பொன்னுாஞ்சல்! நற்றேன் ஊற்று!

மென்மரையின் பேரழகும் வியப்பும் கூட்டும்!

        விடிவெள்ளிக் கதிராக வழியே காட்டும்!

வன்பறையின் முழக்கங்கள் உரிமை மூட்டும்!

        வாழ்த்துகிறேன் பாட்டரசன் பல்லாண்[டு] இங்கே!

 

சீர்மணக்கும் தாய்மொழியை இதயம் சூடித்

        தென்பரையின் தமிழன்பன் திகழக் கண்டேன்!

வேர்மணக்கும் கனியாகச் சுவைக்கும் இந்நுால்

        விழிமயக்கும் பொன்னுாஞ்சல்! வீசும் தென்றல்!
ஏர்மணக்கும் ஊராச் செம்மை பூக்கும்!

        எந்நாளும் தமிழ்மரபை ஏந்திக் காக்கும்!

பார்மணக்கும் புகழேந்தி நிலைத்து வாழப்

        பாட்டரசன் பாடுகிறேன் பல்லாண்[டு] இங்கே!

 

சேற்பார்வை வண்ணமெனப் பாடும் ஆற்றல்

        தென்பரையின் தமிழன்பன் புலமை கண்டேன்!

நாற்பாவைத் தலைசூடி நடக்கும் இந்நுால்

        நலமளிக்கும் பொன்னுாஞ்சல்! நல்லோர் வாக்கு!

வேற்பார்வை எழிலுண்டு! விண்மீன் மின்னும்

        விரிவுண்டு! விடையுண்டு! வெற்றி வேந்தர்

ஆற்பாதை நிழலுண்டு! வாழ்த்து கின்றேன்

        அன்புளத்தால் பாட்டரசன் பல்லாண்[டு] இங்கே!

 

பாட்டரசர் கி. பாரதிதாசன்

தலைவர்
கம்பன் கழகம் பிரான்சு

தொல்காப்பியர் கழகம் பிரான்சு

பாவலர் பயிலரங்க முகநுால் குழுமம்

18.01.2023

சாற்றுகவி

                                    சாற்றுகவி


நெஞ்சொளிர் தமிழைச் சூடி

         நிறைமதி நீல மேகம்

பஞ்சொளிர் வெண்பா யாப்பில்

         படைத்துள இந்நுால் வாழி!

மஞ்சொளிர் மணிகள் விஞ்சும்!

         மதியொளிர் அணிகள் கொஞ்சும்!

நஞ்சொளிர் ஈசன் காக்க!

         நன்மலர் உமையாள் காக்க!

 

நெடும்புகழ்க் குடியில் வந்த

         நிறைமதி நீல மேகம்

இடும்புகழ் நெறிகள் ஏந்தி

         இனித்திடும் இந்நுால் வாழி!

தொடும்புகழ் வழிகள் காட்டும்!

         தொடர்புகழ் மொழிகள் சூட்டும்!

நடும்புகழ் கண்ணன் காக்க!

         நறுமலர்க் கண்ணி காக்க!

 

நிழறரும் ஆலம் போன்று

         நிறைமதி நீல மேகம்

குழறரும் இசையைக் கூட்டிக்

         குழைத்திடும் இந்நுால் வாழி!

பொழிறரும் வாசம் வீசும்!

         புவியுறு நேசம் பேசும்!

எழிறரும் முருகன் காக்க!

         இளங்கொடி வள்ளி காக்க!

 

நிலமருள் பசுமை யாக

         நிறைமதி நீல மேகம்

கலமருள் பாடம் கற்றுக்

         கனிந்துள இந்நுால் வாழி!

நலமருள் புலமை பொங்கும்!

         நற்றவ வளமை தங்கும்!

பலமருள் இராமன் காக்க!

         பன்மலர் சீதை காக்க!

 

நீதிசேர் இதயங் கொண்ட

         நிறைமதி நீல மேகம்

காதிசேர் வெண்பா யாப்பில்

         கமழ்ந்திடும் இந்நுால் வாழி!

சாதிசேர் மடமை போக்கும்!

         சமமெனும் பொதுமை பூக்கும்!

சோதிசேர் வள்ளல் காக்க!

         தொன்மொழி யன்னை காக்க!

 

பாட்டரசர் கி. பாரதிதாசன்

தலைவர்
கம்பன் கழகம் பிரான்சு

தொல்காப்பியர் கழகம் பிரான்சு

பாவலர் பயிலரங்க முகநுால் குழுமம்

19.01.2023

 

 

dimanche 15 janvier 2023

தமிழ்ப் புத்தாண்டு

 


வணக்கம்

 

திருவள்ளுவர் ஆண்டு 2054

தமிழ்ப் புத்தாண்டுப் பொங்கல் வாழ்த்துக்கள்!

 

நேரிசை வெண்பா!

 

குலமோங்க, கொள்கைக் குணமோங்க, வாழ்க்கை

நலமோங்க வேண்டுகிறேன் நாளும்! - வளமோங்கப்

வண்ணமிகு புத்தாண்டு வந்ததுவே! வாழ்த்துகிறேன்

எண்ணமிகு அன்பால் இனித்து!

 

அறுசீர் விருத்தம்!

 

உலகத் தமிழர் புத்தாண்டாம்

..........உயர்ந்த தைந்நாள் போற்றிடுவோம்!

திலக மிட்டு மலரிட்டுச்

..........சேர்ந்து தொழுகை புரிந்திடுவோம்!

இலகு தமிழில் கவிபாடி

..........இன்றேன் வாழ்த்தை யிசைத்திடுவோம்!

அலகில் புகழ்சேர் தாய்மொழியின்

..........அமுதைப் பருகிக் களித்திடுவோம்!

 

அகமும் புறமும் கற்றிடுவோம்!

..........அறமும் அருளும் பெற்றிடுவோம்!

புகழும் பணிகள் செய்திடுவோம்!

..........புவியே போற்ற நடையிடுவோம்!

முகமும் மலரும் ஒப்பென்று

..........மொழியும் வண்ணம் வாழ்ந்திடுவோம்!

திகழும் தமிழர் புத்தாண்டுச்

..........சீரைப் பாடி மகிழ்ந்திடுவோம்!

 

தொன்மை மிக்க தமிழ்நாடு!

..........துணிவே மிக்க தமிழ்நாடு!

நன்மை மிக்க தமிழ்நாடு!

..........நறுமை மிக்க தமிழ்நாடு!

வன்மை மிக்க தமிழ்நாடு!

..........வாய்மை மிக்க தமிழ்நாடு!

முன்மைத் தமிழின் புத்தாண்டை

..........முழங்கி ஒளிரும் தமிழ்நாடு!

 

பாட்டரசர் கி. பாரதிதாசன்

தலைவர்
கம்பன் கழகம் பிரான்சு

தொல்காப்பியர் கழகம் பிரான்சு

15.01.2023

சந்தக் கலிவிருத்தம்

 


கவிதைப்பெண்

சந்தக் கலிவிருத்தம்

[முதல் மூன்று சீர்கள் 6 சந்த மாத்திரை + இறுதிச்சீர் 4  சந்த மாத்திரை]

 

இறைமாதவள் எனைநாடிட இனியாவையும் நலமே!

நிறைமாண்பவள் மனைநாடிட நிலையாகிடும் புகழே!

மறையானவள் இணையாகிட மதுவாகிடும் இரவே!

முறையானவள் அணையானவள் மொழியானவள் அவளே!

 

மணியானவள் மழையானவள் மலரானவள் கனவால்

பிணியோடிடும் பிழையோடிடும் பெயர்கூடிடும் உறவால்!

துணிவானவள் துணையானவள் சுவையூறிடும் அழகாம்!

அணியானவள் அமுதானவள் அறமானவள் அவளே!

 

பஞ்சானது பிஞ்சானது பண்பானவள் உருவம்!

வஞ்சானது வண்டாடுது வளமானவள் பருவம்!

நெஞ்சானது கவிபாடுது நினைவாலது உருகும்!

விஞ்சேகிட வியனேகிட விழியானவள் அவளே!

 

உடலானவள் உயிரானவள் உலகானவள்! இன்பக்

கடலானவள் கலையானவள் கனவானவள்! வாழ்வின்

சுடரானவள் சுவையானவள் சுகமானவள்! முன்னைத்

தொடரானவள் துடியானவள் துதியானவள் அவளே!

 

அருளானவள் அரணானவள் அகமானவள்! பாடும்

பொருளானவள் பொழிலானவள் பொலிவானவள்! என்றும்

வரமானவள்! வழியானவள் வடிவானவள்! காதல்

உரமானவள் ஒளியானவள் உறவானவள் அவளே!

 

பட்டானவள் பனியானவள் பற்றானவள்! இன்றேன்

மெட்டானவள் மொட்டானவள் பிட்டானவள்! மாயக்

கட்டானவள் காற்றானவள் கழையானவள்! வண்ணச்

சிட்டானவள் செம்பாலவள் செயமானவள் அவளே!

 

பாட்டானவள் உணர்வேயெழும் பண்ணானவள்! என்றன்

கூட்டானவள் உலகேதொழும் கூத்தானவள்! காக்கும்

பூட்டானவள் நெஞ்சேயொளிர் பொன்னானவள்! என்றும்

காட்டானவள் வாழ்வேயொளிர் கண்ணானவள் அவளே!

 

நாற்றானவள் நலமானவள்! நன்றேகவி நல்கும்

ஊற்றானவள் உயர்வானவள்! மூச்சேயென அவள்பூங் 

காற்றானவள் கனியானவள்! கண்ணேமகிழ் தமிழாய் 

நேற்றானவள் இன்றானவள் பின்னானவள் அவளே!

 

விண்ணானவள்! நேரேசெல விதியானவள்! விளையும்

மண்ணானவள்! மனமேயொளிர் மாண்பானவள்! இனிமைத்

தண்ணானவள்! தமிழானவள்! தகையானவள்! கவிதைப்

பெண்ணானவள்! தவமேயருள் பேறானவள் அவளே!

 

தேனானவள் தினையானவள் திருவானவள் அவளே!

மானானவள் மயிலானவள் மரையானவள் அவளே!

மீனானவள் மிகுசீரவள் விளைவானவள் அவளே!

வானானவள் மதியானவள் வாழ்வானவள் அவளே!

 

பாட்டரசர் கி. பாரதிதாசன்

08.01.2023