காதல் ஆயிரம் [பகுதி - 56]

காதல் ஆயிரம் [பகுதி - 56]

551.

தோளிரண்டும் ஓட்டுதடா தூக்கத்தை! வன்மைசேர்

காலிரண்டும் கூட்டுதடா கற்பனையை! - மாலழகா!

நூலிரண்டும் காட்டுதடா நோக்கத்தை! நீயிருந்த

நாளிரண்டும் வாட்டுதடா நன்கு!

552.

பூக்கும் உணர்வுகள் போராடும்! கண்ணுக்குள்

ஏக்க உணர்வுகள் தாளமிடும்! - பாக்களை

ஆக்கும் உணர்வுகள் ஆடிவர! கொல்லிரவே

தாக்கும் உணர்வுகளைத் தள்ளு!

553.

ஆசை முகம்பார்த்தே ஆறுஏழு வாரங்கள்

ஓசை இலாமல் உருண்டனவே! - வாசமிலாச்

சோலைபோல் வாழ்வு சுருங்குதடி! மூடிய

ஆலைபோல் தூங்கும் அகம்!

554.

கொஞ்சும் கொலுசொலிக்குக் கோடிக் கவிதைகளை

நெஞ்சம் இசைத்து நெகிழ்ந்துருகும்! - வஞ்சியே!

கெஞ்சும் இரவுகளைக் கீழ்த்தள்ளி உன்கனவு

விஞ்சும் இனிமை விளைத்து!

555.

கொலுசொலி கேட்டு நிலம்..குளிர் எய்தும்!

இளசொளிர் புற்கள் எழும்பும்! - களத்தில்

முரசொலி கேட்ட முறுக்குடலை உன்கால்

உரசொலி வெல்லும் உடைத்து!

556.

இன்னும் சிலநாள்கள் என்னவளே சோலையில்

மின்னும் மலர்க்கூட்டம்! மென்குயில்கள் - இன்னிசைக்கும்

எண்ணும் பொழுதினிலே இன்பம் சுரக்குமடி!

கண்ணும் சொருகும் கனிந்து!

557.

எண்ணும் பொழுதினிலே இன்பம் சுரக்கின்ற

பண்கள் படைத்திடும் பாவலனே - முன்னே

பலநாள்கள் பாழாய்க் கழிந்தனவே! இன்னும்

சிலநாள்கள் தேவையா சொல்!

558.

மறந்தால் நினைக்க! மலரே கவிதை

சிறந்தால் உனதருள் சீராம்! - குறைந்த(து)

ஒருகோடி எண்ணளவில் உன்னை நினைந்து

தெருக்கோடியில் உள்ளேன் திரிந்து!

559.

என்னடி செய்கிறாய் ஓரெழுத்து நீஎழுத

முன்னடி தோன்றுமே இன்னலகு! - என்னவளே!

எங்கே இருந்தாலும் என்னுயிர் உன்னிடம்

பொங்கி வருமே புகழ்ந்து!

560.

அன்பே! அமுதே! அருந்தமிழே! ஈடிலா

இன்பே! எழிலே! இளையவளே! - என்மனம்

ஏங்கும் நிலையை எடுத்துரைக்கச் சொல்லேது?

தேங்கும் துயரம் திரண்டு!

(தொடரும்)