ஒற்றுமையைப் பொங்குக!

ஒற்றுமையைப் பொங்குக!

பொங்குகவே! பொங்குகவே! பூந்தமிழின் மாட்சி!

     புவிமலர்ந்து பூத்தாடத் திருக்குறளின் ஆட்சி!

தங்குகவே! தங்குகவே! தண்டமிழின் மாண்பு!

     தடையுடைக்கும் தமிழ்வன்மைக் கீணையாமோ வேம்பு!

மங்குகவே! மங்குகவே! மடடையிருள் போக்கு!

     மதம்;;..சாதி இவைநீக்கிப் பொங்கலினை ஆக்கு!

தொங்குகவே! தொங்குகவே தமிழ்அடியை வேண்டி!

     சொல்லுகவே வாழ்த்தொலியை உலகலவைத் தாண்டி!

காத்துவரும் நன்னெறியில் கடமையினை ஆற்று!

     கமழ்ந்துவரும் திசையெட்டும் தமிழிசைக்கும் காற்று!

பூத்துவரும் பேரழகாய்ப் பாதையினை மாற்று!

     புகழ்மணக்கும் பொற்றமிழின் புத்தாண்டைப் போற்று!

கூத்துவரும்! பாட்டுவரும்! பொதுவுடைமை சாற்று!

     கூடிவரும்! கொழித்துவரும்! நன்வளங்கள் நோற்று!

மூத்துவரும் இனிமையிலே பன்னூல்கள் நூற்று!

     மொழியுலகை ஆளவேண்டும் முத்தமிழே வீற்று!

எல்லாரும் எல்லாமும் ஏற்றுயரக் காட்டு!

     எளியவரும் செழித்தவரும் ஒப்புநிலை மீட்டு!

கல்லாரும் தெளிவுபெற அறிவொளியைக் கூட்டு!

     கலையொளிரக் கவியொளிர வாழ்வுதனைத் தீட்டு!

நல்லாரும் வல்லாரும் பாடிவைத்த பாட்டு!

     நாளைவரும் தலைமுறைக்கு நறுந்தமிழைக் சூட்டு!

பொல்லாரும் பொடியாக வைத்திடுவோம் வேட்டு!

     புவித்தமிழர் ஒற்றுமையாய் இணைந்துநடை போட்டு!