காலக் கவிதை [பகுதி - 1]

பட்ட அடிகளும் பாடிய கவிகளும்

என்னை அடித்துப் போட்டாலும்

       என்றன் குருதி தமிழ்பேசும்!

மண்ணைச் சுமக்கும் பொழுதென்மேல்

       மலரும் பூக்கள் கவிபாடும்!

விண்ணை அடைந்தே என்னுயிரும்

       விஞ்சும் தமிழின் புகழ்கூறும்!

அன்னைத் தமிழின் சீர்காக்க

       அருமைக் கண்ணன் எனைச்செய்தான்!

26-11-2002

-----------------------------------------------------------------------------------

கற்ற கல்வி கையளவாம்

       கற்கா அளவோ பெருங்கடலாம்!

பெற்ற கல்வி அதிகமென

       பேராணவம் சூழ் வாழ்வழிவாம்;!

மற்ற வர்தம் நுண்மதியை

       மதியா(து) இழிதல் தீவினையாம்!

சிற்றம் பலனே! என்னரசே!

       சிறந்த நெறியை அருளுகவே!

27-11-2002

-----------------------------------------------------------------------------------

இன்பத் தமிழை வளர்த்திடவே

       இருவர் இணைந்து செயற்பட்டார்!

ஒன்றாய்ச் சேர்ந்த அவர்மனத்துள்

       ஓங்கக் கண்டேன் தன்னலமே!

ஒன்றை ஒன்று கடித்திங்கே

       ஓடும் நாயாய் அவரானார்!

கொன்றை மாலை அம்பலனே

       கொழிக்கும் நட்பை அருளுகவே!

27-11-2002

-----------------------------------------------------------------------------------

நாற்றம் அடிக்கு மீன்களையே

       நறுக்கி எடுத்தே உருட்டியுடன்

மாற்றம் இன்றி என்னெதிரே

       மங்கை இனிதே சாப்பிட்டாள்!

ஆற்றில் இருக்கும் மீனாக

       அவளின் உருவம் தெரிந்ததுவே!

காற்றின் வேகக் கவிபாடிக்

       கற்போர் களிக்க வைத்தனனே!

30-11-2002

-----------------------------------------------------------------------------------

 

எண்ணும் எண்ணம் கவியாகும்

       எழுதும் ஏடு நூலாகும்!

மின்னும் இயற்கைக் காட்சியெலாம்

       என்னை எழு(து)என் முன்னாடும்!

விண்ணும் மண்ணும் என்னுள்ளே

       விளைத்த இன்பம் பலகோடி!

பண்ணும் பாட்டும் என்னுடைய

       பசியைத் தீர்க்கும் உணவன்றோ!

6-12-2002

-----------------------------------------------------------------------------------

 

வெள்ளைக் காரர் முகத்தினிலே

    வீர மீசை இல்லையடா!

முல்லைப் பெண்ணைக் கொஞ்சிடவே

    முகத்தில் மீசை தொல்லையடா!

எல்லை யில்லாக் காதலிலே

    இணைந்து மகிழம் அன்னவர்கள்

கொள்ளை இன்பங் கண்டவுடன்

    கூட்டை மாற்றி ஓடுவதேன்?

7-12-2002

-----------------------------------------------------------------------------------

அன்பே இன்றி அறுஞ்சுவையை

    அளிக்கும் விருந்து சுவைதருமோ?

பண்பே இன்றிச் செயல்செய்தால்

    பயனை வாழ்வில் அடைவோமோ?

இன்றே சிலர்தம் பொய்வாழ்வாம்

    ஏற்றம் அடைதல் உயர்வாமோ?

நன்றே இவைகள் தாம்ஆய்ந்து

    நல்லோர் வழியை நாடுகவே!

9-12-2002

-----------------------------------------------------------------------------------

உடையும், உடலும் வெள்ளையென

    உலவும் வண்ண எழில்பெண்ணே!

நடையில் ஏனோ திமிர்கொண்டு

    நல்லோர் தூற்றச் செல்கின்றாய்!

கடையின் கீழாய்க் கிடந்ததனால்

    கருப்பாய் உள்ளம் பெற்றனையே!

முடையாம் நாற்றம் போக்காமல்

    முகத்தில் வண்ணம் பூசுவதேன்?

12-12-2002

-----------------------------------------------------------------------------------