காதல் ஆயிரம் [பகுதி - 4]

காதல் ஆயிரம் [பகுதி - 4]

 

31.

தேன்வதியும் பூவைத் தினம்வண்டு சுற்றுதே!

வான்மதியும் சுற்றுதே மண்ணுலகை - மீன்விழியே!

உன்னையான் சுற்றல் ஒருகுறை யாகுமோ?

பொன்மனத் தாளே புகல்!

32.

பார்த்தும்..நீ பாராமற் போவதுவும் உன்அன்பைச்

சேர்த்தும்..நீ சேராமற் செல்வதுவும் - ஆர்த்தபுகழ்

அற்புதமே ஏனடி? ஆரமுதே! என்னுயிர்க்

கற்பகமே! உன்கருணை காட்டு!

33.

கல்லும் இரும்பும் கரைந்திளகும்! உன்புருவ

வில்லின் எழுவேல் விழிபட்டால்! - கொல்லுமெனை

உன்றன் கருவிழிகள்! ஊர்வசியே தீர்க்க..வா

என்றன் துயரெலாம் ஈங்கு!

34.

தேனிருக்கும் தேவி மொழியினிலே! நீந்திடும்

மீனிருக்கும் கூர்வேல் விழியினிலே! - மானிருக்கும்

மங்கை மருட்சியிலே! வான்தோய் மதியிருக்கும்

தங்க முகத்திலே தான்!

35.

கற்பனைக்கு எட்டாத காவியமே! மின்னிடும்

பொற்சிலையே! தேன்தரும் பூந்தளிரே! - அற்புத

வான்மதியே! என்றன் மனத்துள்ளே வாழ்கின்ற

தேன்தமிழே! வந்தெனைச் சேர்!

36.

முதன்முதலில் மங்கை முகம்பார்த்த நாளும்

இதமாகச் சேர்ந்த இடமும் - இதயங்கள்

தஞ்சம் புகுந்தமுன் மஞ்சமும் எந்நாளும்

நெஞ்சுள் கமழும் நினைவு!

37.

இளமை துடிப்பழகும்! இன்பத் தமிழின்

வளமை வடிவழகும்! பொங்கும் - புலமையெழில்

கொஞ்சுந் தமிழேயுன் கோலச் சிரிப்பழகும்

நெஞ்சுள் ஒளிரும் நினைவு!

38.

துன்ப இருளில் துவளும் பொழுதெல்லாம்

அன்பை அளித்தென்னைக் காத்ததுவும் - பொன்மலர்

மஞ்சம் விரித்தென்னை வாரி அணைத்ததுவும்

நெஞ்சுள் நிறைந்த நினைவு!

39.

சிலையை நிகர்த்த திருமேனி! காதல்

வலையை விரித்தகலை வாணி! - அலைமகள்

மிஞ்சும் உருவத்தாள்! கொஞ்சிக் கொடுத்தசுவை

நெஞ்சுள் நிலைத்த நினைவு!

40.

பழகுதற்கு என்றும் இனியவள்! பண்பை

வழங்கும் மலர்மகள்! வண்ண - அழகொளிர்

விஞ்சும் பருவத்தை வென்று விளைத்தசுகம்

நெஞ்சுள் குலவும் நினைவு!

(தொடரும்)