விருத்த மேடை - 19

விருத்த மேடை - 19
　　
அறுசீர் விருத்தம் - 19
[வெண்டைளை விருத்தம்] [நேரசை 18 எழுத்துகள், நிரையசை 19 எழுத்துகள்]
　　
சொல்வது தெளிந்து சொல் [பாரதியின் புதிய ஆத்திசூடி]
　　
கற்றவர் போற்றி மகிழ்ந்திட,
　　　கல்லார் உணர்ந்து நடந்திட,
பெற்றவர் ஏற்று மொழிந்திட,
　　　பிள்ளைகள் பேணித் திகழ்ந்திட,
மற்றவர் சாற்றிப் புகழ்ந்திட,
　　　மாணவர் கற்று வளர்ந்திட,
நற்றவ ஞானியர் சொல்லென
　　　நன்றே தெளிந்து நவில்கவே!
　　
[நேரசையால் தொடங்கி அடிக்கு 18 எழுத்துகளைப் பெற்று வந்தது]
　　
தெளிவுடை நீரின் குளிரென,
　　　தேனடை நல்கும் சுவையென,
வளமுடைத் தோப்பின் உரமென,
　　　மாண்புடைப் பெண்ணின் வடிவென,
களமுடை வீரன் நடையென,
　　　கற்புடை நெஞ்சின் ஒளியென,
உளமடை வண்ணம் தெளிவுடன்
　　　உன்னுரை மின்ன நவில்கவே!
　　
[நிரையசையால் தொடங்கி அடிக்கு 19 எழுத்துகளைப் பெற்று வந்தது]
　　　　　　　　　　　[பாட்டரசர் கி. பாரதிதாசன்]
　　
அடியின் ஈற்றுச்சீர் விளமாகும். வெண்டளை பயின்று வரவேண்டும். அடியின் இறுதிக்கும் அடுத்த அடியின் முதலுக்கும் [வெண்பாபோல்] வெண்டளை கட்டாயமில்லை.
　　
நான்கடிகள் ஓரெதுகை பெற வேண்டும். ஒன்று, நான்காம் சீர்களில் மோனை அமையும்.
　　
நேரசையில் தொடங்கும் ஓரடி 18 எழுத்துகளையும், நிரையசையில் தொடங்கும் ஓரடி 19 எழுத்துகளையும் பெற்றிருக்கும். [இப்பாடலில் விளங்காய் வராது]
　　
ஆத்திசூடி நுாலில் உள்ள ஓரடியைத் தலைப்பாகக் கொண்டு இவ்வகை அறுசீர் விருத்தம் ஒன்றைப் பாடுமாறு பாவலர்களை அன்புடன் வேண்டுகிறேன்.
　　　　　　
"பாவலர் பயிலரங்கம்" என்ற முகநுால் குழுவில் இணைந்து தங்கள் விருத்தத்தைப் பதிவிட வேண்டுகிறேன்!
　　　　
அன்புடன்
பாட்டரசர் கி. பாரதிதாசன்
தலைவர்:
கம்பன் கழகம் பிரான்சு
உலகத் தொல்காப்பியத் தலைமை மன்றம்
09.02.2018