முருகன் தூதர்

முருகன் தூதர்

சொல்லவரும் கருத்தெல்லாம் முருகன் சீரே!

     சுடர்நெஞ்சின் நினைவெல்லாம் தமிழின் வாழ்வே!

நல்லருள்சேர் நெறியெல்லாம் உலகோர் ஏற்க

     நன்குரைத்த பொழிவெல்லாம் இன்பத் தேனே!

அல்லலுறும் புவியோர்தம் துன்பம் தீர

     ஆய்ந்தளித்த நூலெல்லாம் அருளின் மாண்பே!

வல்லதமிழ் வளங்காத்த கிருபா னந்த

     வாரியார்போல் இனியொருவர் காணப் போமோ?

சந்தமொலிர் திருப்புகழைப் பாடிப் பாடி,

     சாந்தமொளிர் அருட்பாவை நெஞ்சிற் சூடி,

எந்தையொளிர் கம்பனவன் கவியிற் கூடி,

     இன்பமொளிர் நல்லுரைகள் தந்தார் கோடி!

கந்தனொளிர் புகழ்பரப்ப வந்த தூதர்!

     கந்தமொளிர் செயல்படைக்கப் பிறந்த தொண்டர்!

சிந்தையொளிர் அருண்மணக்கும் கிருபா னந்த

     வாரியார்போல் சீருலகில் காணப் போமோ?

06-11-2002