காதல் ஆயிரம் [பகுதி - 71]
701.
நடித்தேன் பகலில்! நலிந்தேன் இரவில்!
படித்தேன் இளமையின் பாடம்! - கிடந்து
துடித்தேன்! துவண்டேன்! துணிந்தேன்! அழகாய்
வடித்தேன் கவியில் வகுத்து!
702.
சுடர்..மை உடைய படர்தமிழ்ப் பாவே!
இடர்..மை விழியிரண்டும் ஏங்கும்! - தொடர்ந்து
கடமை கவியெழுத்தைக் கட்டியதா? வாடும்
மடமை மகளின் மனம்!
703.
சும்மா கிடைக்குமா உம்மா உனக்கிங்கே!
எம்மா என..நீ இறைஞ்சுகவே! - செம்மறவா!
இம்மான் மயங்கிடவே இன்பக் கவிபாடு!
செம்மாங் கனிசுவை சேர்த்து!
704.
கலைபேசி! கன்னல் கவிபேசி! காதல்
நிலைபேசி! நெஞ்சமொழி பேசி! - மலரே!
இலைபேச்சு என்றவுடன் இச்..இச்..இச் முத்தம்!
தொலைபேசி செய்யும் துணை!
705.
காதலனே! கன்னங் கரியவனே! நான்வாழும்
மாதவனே! நற்றமிழ் மன்னவனே! – காதலின்
வேதவனே! உன்னெழுத்தை வேண்டுகிறேன்! பாட்டுலகின்
ஆதவனே செய்வாய் அருள்!
706.
தூக்கம் முழுதும் தொலைந்ததடி! என்னுயிரைப்
போக்கும் செயல்கள் புரிந்ததுமேன்? - தாக்கும்
இடிபோல் நினைவோங்கும் என்செய்வேன்? பூத்த
கொடிபோல் இருப்பவளே கூறு?
707.
பொய்விழிப் பார்வை புலவனெனைக் கொல்லுதடி!
மெய்வழி என்று விடிந்திடுமோ? - செய்யவள்போல்
உய்யவழி செய்தாய் எனஇருந்தேன்! நெஞ்சத்தை
நய்யவழி செய்தாய் நடித்து!
708.
பொல்லாச் செயற்புரிந்து பூகம்பம் வந்ததுபோல்
எல்லாம் அழித்தனையே! என்செய்வேன்? - சொல்லடி!
கல்லோ உனக்கிதயம்? காதல் உயிர்குடித்தாய்!
முள்ளோ? புதரோ? முடிவு?
709.
சின்ன குழந்தையிடம் வண்ண இனிப்புகளை
உண்ணக் கொடுத்தே ஒடுக்குதல்போல் - எண்ணமெலாம்
கன்னல் மழைபொழிந்து காதல் பயிர்வளர்த்துப்
பெண்ணவள் போனால் பிரிந்து!
710.
கழுவும் பொழுது நழுவிடும் மீன்போல்
பழகும் மதியொளி பாவாய்! - பழமாய்
வழங்கும் மொழியுடையாய்! வாடி வதங்கிப்
புழுங்குமென் நெஞ்சம் புரண்டு!
(தொடரும்)
ஐயா...
RépondreSupprimerஎன் வணக்கமும் வாழ்த்துக்களும்!
நீங்கள் பாக்களைப் பாடப்பாட எம்மனத்தில் தமிழ்ப்பூக்களாய் பூக்கின்றதையா...
சிந்தை முழுதும் சிறந்தஉம் பாக்களால்
விந்தை மிகவாக வியப்பு மேலோங்குதே
எங்கள் தமிழன்னை எமக்களித்த வரமன்றோ
மங்காப் புகழோடு மாண்புற்று நீர்வாழ்கவே!
பேசி பேசி - பலமுறை ரசித்தேன் ஐயா... (704)
RépondreSupprimerவாழ்த்துக்கள்...
எல்லா வரிகளுமே அருமை !...வாழ்த்துக்கள் ஐயா .
RépondreSupprimerமிக்க நன்றி பகிர்வுக்கு .