காதல் ஆயிரம் [பகுதி - 64]

 காதல் ஆயிரம் [பகுதி - 64]

631.

பட்டென்(று) ஒருகவிதை பாடிடச் சொன்னவளே!

சட்டென்(று) ஒருமுத்தம் தந்திடுக! - கட்டழகே

கொட்டென்று கொட்டும் கவிமழை! சேர்ந்தாடச்

சிட்டென்று மெல்லச் சிணுங்கு!

632.

முத்துமழை முன்பொழிய முத்தமழை நீ..பொழிய

சொத்துமழை என்றெண்ணிச் சொக்குகிறேன் - முத்தமிழாய்க்

கொட்டுமழை கொட்டுமடி! கோகுலமே செந்தேனில்

இட்டுமழை கொட்டுமடி ஈங்கு!

633.

அவளரு ளாலே அவளெழில் உண்டு

சுவைகவி சூட்டினேன் சொக்கி! - இவை..கவி

என்றுலகம் போற்றும்! இளமையின் வேதமென

நின்றுலகம் போற்றும் நினைந்து!

634.

தலைவலி என்ன? கயல்விழி கண்டால்

மலைவலி கூட மடியும்! - சிலைபோல்

கலையொளிர் பெண்ணின் கவியொளிர் சொற்கள்

இலையெனில் வாழ்வே இலை!

635.

சித்தரும் பக்தரும் உன்முகம் கண்டவுடன்

பித்தராய் ஆகிப் பிதற்றிடுவார்! - சத்தியம்

சித்திரை நிலவே!உன் சிற்றிடை மெல்லசைவால்

நித்திரை இல்லா நிலை!

636.

முத்திரைப் பொன்னே! முழுமதிப் பேரழகே!

இத்திரை நீக்கி எனைப்பாராய்! - வித்தையிடும்

சித்திரை வந்ததடி! கத்தரி காய்த்ததடி!

நித்திரை போகுதே நீத்து!

637.

புத்துரை நூலே! புரட்டுகின்ற பக்கமெலாம்

கொத்துரை போன்று குளிருட்டும்! - வித்தகியே!

சித்திரைத் திங்கள் சிரித்தெனை வாட்டுதடி!

நித்திரை இல்லை நினைந்து!

638.

இத்தரை ஏனோ எனக்கு வெறுக்குதடி!

பித்துறை நெஞ்சாய்ப் பிதற்றுதடி! - முத்தழகே!

சித்தரைத் திங்கள் திரண்டெழும் காதலினால்

நித்திரை நீங்கும் நினைத்து!

639.

முத்தமொன்று தந்துவிடு! மோகத்தில் நீந்தவிடு!

மொத்தமாக இன்பத்தை மூட்டிவிடு! - புத்தமுதே!

சொத்தாக வந்துவிடு! சுற்றுகின்ற கால..முள்

பத்தாகப் போகுதடி பார்!

640.

கற்பனை என்னும் கலமேறி ஆடுகிறேன் 

நற்றுணை நல்குக! இல்லையெனில் - பொற்கொடியே!

கற்புடை நாயகியே! கன்னல் கனிச்சாறே!

விற்படை கொண்டெனை வீழ்த்து!

(தொடரும்)