காதல் ஆயிரம் [பகுதி - 66]

காதல் ஆயிரம் [பகுதி - 66]

651.

நலமா நறுந்தமிழே! நாள்கள் இரண்டும்

குலமாய்க் குழப்பின என்னை! - உளம்..மா

துயரில் துவண்டதுவே! நீயின்றி இங்குப்

பெயரில் கிடந்தேன் பிழைத்து!

652.

கடும்சூடு உடல்முழுதும் காய்கிறதா? நெஞ்சம்

விடும்சூடு நாளெண்ணி வேண்டும்! - கொடுமையடி

கொல்லும் குளிர்காலம்! கூடிக் களிக்காமல்

சொல்லும் கவியும் சுடும்!

653.

காய்ச்சல் பறந்தோட என்றன் கவிதைகளைப்

பாய்ச்சல் நடையில் படைக்கின்றேன்! - நோய்க்கண்

படரும் பொழுதெலாம் பாழ்நிலை ஆகுதடி!

உடலும் உயிரும் உறைந்து!

654.

என்னுயிர்ப் பெண்ணே! இனிய தமிழ்ச்சுவையே!

உன்னுயிர் உற்ற துயர்ஒழியப் - பொன்மலர்

மின்னும் இறைவனை வேணடும்! மதுகவி

மன்னும் புலவன் மனம்!

655.

இன்ப மடல்எழுது! என்னுடன் ஒன்றாகி

அன்பின் கடல்முழுகு! ஆருயிரே! - துன்பமெனும்

சொல்லுக்கு இடமில்லை! தூயவளே உன்விழி

வில்லுக்குத் இடரில்லை வீசு!

656.

தலையொளிர் வண்ணம் தமிழொளி வீசச்

சிலையொளிர் பெண்ணே சிரிப்பாய்! - நலமாய்

மலையொளிர் மேனி வடிவொளி பாடக்

கலையொளிர் கண்களைக் காட்டு!

657.

அறஞ்சேர் அழகனிடம் ஆன்மா அடையும்!

மறஞ்சேர் மறவன்நான்! மாதே! - உறவாய்க்

கரஞ்சேர் கனவுகள் கற்பனையை ஊட்டும்

உரஞ்சேர் கவிதைகள் ஊர்ந்து!

658.

நிறைந்தாள் மனத்துள்! நெடுந்தமிழ் பாடி

உறைந்தாள் உணர்வில் உவந்து! - பிறையும்

மறைந்தால் மகிழ்வேது? மங்கையவள் முத்தம்

குறைந்தால் வாடுமென் கூடு!

659.

நடந்தால் நடந்துவரும் என்னிழல் போன்று

நடந்தாள் கவிதை நறும்பெண்! - படர்ந்து

மறந்தால் நினைத்திடலாம்! மாதவள் என்றும்

நிறைந்தாள் மனத்துள் நிலைத்து!

660.

உன்குரல் ஓசை! உணர்வை உசுப்புகின்ற

மென்குரல் ஓசை! வியன்மலரே! - பண்ணிசைக்கும்

இன்குரல் ஓசை! இதயம் இலகுதடி!

பொன்குரல் ஓசை புகுந்து!

(தொடரும்)