lundi 4 mars 2013

காதல் ஆயிரம் [பகுதி - 42]



காதல் ஆயிரம் [பகுதி - 42]


411.
காலை விடியல் கருத்தைக் கவர்ந்திழுக்கும்!
மாலைப் பொழுதும் மனங்கமழும்! - சோலையெழில்!
பாளைச் சிரிப்பு! பசும்வயல்! என்னரசி
ஆளை அசத்தும் அழகு!

412.
பனிபோல் உருகும்! பதமாய்க் குளிரும்!
கனிபோல் கவியும் கமழும்! - மனமே
இதுபோல் இனிமை இனிமேல் வருமோ?
மதுபோல் மயக்கிய மாது!

413.
இச்சென்று நீயிட்ட இன்னமுதம் ஏறுதடி
உச்சி முதல்உள்ளங் கால்வரைக்கும்! - கச்சணிந்தும்
நச்சென்று மேல்குத்தும்! நாள்முழுதும் மென்மயக்கம்
வச்சென்னை வாட்டும் வளர்ந்து!

414.
வானம் இடியிடித்து மின்னுதடி! வண்ணவிழி
மீனும் எனையிடித்து மின்னுதடி! - தேன்மழையே!
காதல் பயிர்விளையக் கன்னல் கவியுரத்தை
மாதம் முழுதும் வழங்கு!

415.
மழைபொழிய மண்குளிரும்! மாதவளே முத்த
மழைபொழிய உள்குளிரும்! சந்த - மழைபொழிய
பாயும் தமிழமுதம்! பைந்தமிழே உன்னழகை
ஆயும் மனமே அளந்து!

416.
முத்தமிடும் ஓசை! முடிவின்றி எந்நொடியும்
சித்தமதைத் தொட்டுச் சிரித்தாடும்! - முத்தமிழே!
புத்தமுதை யுண்டு புரளும் புலவனுக்கு
நித்திரை யுண்டோ நிலத்து!

417.
கவிதொடுத்தாய்! காதல் கனிந்த மொழிக்குச்
செவிகொடுத்தாய்! சிந்தை மகிழ்ந்து - தவிக்கச்
சுவைகொடுத்தாய்! சொந்தம் எனச்சொல்லி என்னைத்
துவைத்தெடுத்தாய் நெஞ்சைத் துளைத்து!

418.
துடித்தேன்! மனத்தைத் தொடுத்தேன்! அவளைப்
படித்தேன்! கவிதை படைத்தேன்! - கொடியைப்
பிடித்தேன்! கனியைக் கடித்தேன்! மதுவைக்
குடித்தேன் உதட்டைக் குவித்து!

419.
நெஞ்சிக் குழிமேல் நெகிழக் கொடுத்திட்ட
வஞ்சி மலரிதழ் முத்தங்கள்! - மஞ்சத்தில்
பஞ்சு பறப்பது போல்பறந்து நெஞ்சமோ
கெஞ்சும் அவளைக் கிடந்து!

420.
மாந்தளிர் மேனி! மயக்கும் மதுவிழிகள்!
பூந்தளிர் மேவும் புதுப்பொலிவு! - காந்தமென
ஏந்திழை ஈர்த்தென்னை இன்பம் எழுதுகிறாள்
தீந்தமிழ்த் தேனைக் குழைத்து!

(தொடரும்)

6 commentaires:

  1. யம்மாடி...! மூழ்கி விட்டேன் வரிகளில்...

    வாழ்த்துக்கள் ஐயா...

    RépondreSupprimer
  2. ஆளை அசத்தும் அழகு!கவிதைக்குப் பாராட்டுக்கள்..

    RépondreSupprimer
  3. வார்த்தை ஒவ்வொன்றிலும் தேன் சொட்டுகிறது ஐயா.

    RépondreSupprimer