நெஞ்சமே கோயில்

நெஞ்சமே கோயில்! நினைவே மந்திரம்!

வல்லோன் வகுத்த வழியை அறிய

எல்லா உயிரும் இன்பம் அடைய

அன்பாம் அமுதை அளிக்கும் குருவை

என்றும் நாடி உண்மை உணர்க!

இருளைப் போக்கி, அருளைத் தேக்கி,

மருளை நீக்கி மகிழ்வை நல்கும்

குருவே வாழ்வு! குருவே உலகும்!

குருவே இறையின் உருவம் காண்க!

ஆசை அழிவாம் பாதை! ஓம்எனும்

ஓசை உலகின் தொடக்கம்! இறைவன்

எங்கும் நிறைந்து இருப்பதைக் காணப்

பொங்கும் மனத்தைப் பொலியச் செய்க!

ஐம்புலன் அடக்கி ஆணவம் போக்கிச்

செம்பொன் சுடரின் சிறப்பை ஓதுக!

குருவடி தொழுக! குறைகள் அகலும்!

திருவடி போற்றித் தேறுக! தேறுக!

முன்னை வினையால் அன்னைக் கருவில்

எண்ணிலாப் பிறவிகள் எய்திய ஆன்மா

தன்னை அறிந்து, தவவொளி மேவப்

பொன்னை நிகர்த்த நற்குரு புராணம்

நல்வழி காட்டும்! நம்மின் வாழ்வு

செல்வழி காட்டும்! சீரினை ஊட்டும்!

நெஞ்சமே கோயில்! நினைவே மந்திரம்!

தஞ்சம் குருவின் தண்மலர் அடிகளே!

குரு புராணம் இதழ் - 26-01-2005