இதழ் அகல் வெண்பா

இதழ் அகல் வெண்பா

செங்கனியே! செந்தேனே! சித்திரைத் தேரழகே!

தங்கக் கலசத் தகையாளே! தாரகையே!

எங்கே..நீ சென்றனை? ஏங்கிடச் செய்தனை?

இங்கே..நீ இன்னலிடல் ஏன்?

இதழ் அகல் குறட்பா

இதழ்கள் இனிக்க இளங்கிளியே என்னை

இதயத்தின் ஏட்டில் இணை!

சின்ன கயற்கண்கள் என்னைச் சிறையிட

என்ன..நான் செய்ய இனி?

கன்னல் கனியெனக் காரிகைச் சீரினிக்க

இன்னல் எனக்கிங் கிலை!

சின்ன இடையழகில் சிக்கிக் கிடக்கின்றேன்

என்ன அழகின் இயல்?

தங்க அணியழகைச் சந்த நடையழகைச்

சங்கக் கலையழகைத் தா!

சிரிக்கின்ற தேனிதழ்கள் சேர்ந்தென்னைக் காதல்

தரிக்கின்ற காலத்தைத் தா!

எதிர்த்த செயல்நீக்கிச் சேர்ந்திட எண்க

இதய அறையில் எனை!

அழகே! அணியிழையே! ஆரணங்கே! என்றன்

நிழலெனத் தென்றலென நீ!

சிந்தை செழிக்கின்ற சிங்காரி கண்ணழகால்

கந்தையென ஆனதைக் காண்!

நங்கை நடையழகில் நாராய்க் கிழிகின்றேன்

கங்கை நதியாளே கா!

இலக்கணம்

உதடுகள் குவியாமலும் ஒட்டாமலும் பாடும் கவிதை.

இப்பாட்டில் வரக்கூடா எழுத்துக்கள்,

உகர எழுத்துக்களும், ஊகார எழுத்துக்களும் வரக்கூடா,

(உ, கு, சு, து, டு, ....)(ஊ, கூ, சூ, தூ, டூ....)

ஒகர எழுத்துக்களும், ஓகார எழுத்துக்களும் வரக்கூடா,

(ஒ, கொ, ஙொ, சொ, டொ....) (ஓ, கோ, ஙோ, சோ, டோ....)

ஓளகார எழுத்துக்கள் வரக்கூடா,

(ஓள, கௌ, ஙௌ, சௌ....)

ப, ம, வ, வர்க்க எழுத்துக்கள் வரக் கூடா,

(ப, பா, பி, பீ, பு, பூ......)

(ம, மா, மி, மீ, மு, மூ......)

(வ, வா, வி, வீ, வு, வூ......)

15.12.2013