காதல் ஆயிரம் [பகுதி - 23]

காதல் ஆயிரம் [பகுதி - 23]

221.

கும்மென்(று) இருக்குதடி போதை! குளிர்விழிகள்

சிம்மென்(று) இசைக்குதடி சீர்ப்பாட்டு! - செம்மலரே!

நம்மென்(று) அரிக்குதடி நண்ணும் உணர்வுகள்!

உம்மென்(று) இருப்பதே னோ!

222.

சிலுக்குடை போடும்,சிங் காரி! மயங்கத்

தளுக்குநடை போடும்,ஒய் யாரி! - குலுக்கிக்

கலக்கும்,கைக் காரி! மலுக்கென்(று) ஒடித்தே

உலுக்கும்,மைக் காரி!தேன் ஊற்று!

223

செல்லமே! செந்தமிழச்; செல்வமே! கெண்டைகள்

துள்ளுமே! நெஞ்சினை அள்ளுமே! - உள்மனம்

சொல்லுமே! தூயபெரு வெள்ளமே! உன்னழகு

வெல்லுமே காதல் விளைத்து!

224.

நன்றி உரைத்தேன் நறுந்தமிழே! வாழ்வில்நீ

இன்றி எனக்கே(து) இனிமையடி! - என்னுயிரை

வென்றிப் படைநடத்தும் வேல்விழியே! உன்னழகில்

ஒன்றிக் கிடக்கும் உணர்வு!

225.

தேர்பெற்ற வேந்தன்! திறம்பெற்ற வீரன்!நல்

பேர்பெற்ற கீர்த்தி! பெருகுமே! - ஊர்வசியே!

நான்பெற்ற வாழ்வினிமை தேன்பெற்ற செல்வியுன்

ஊன்தொட்டு வந்த உயர்வு!

226.

குயிலிருந்து கூவும்! மயிலிருந்து ஆடும்!

ஒயிலிருந்து மின்னும்! ஒளிரும்! - கயலே!

உயிரிருந்து ஏங்கும்! உருகும்!என் காதல்

பயிரிருந்து ஓங்கும் படர்ந்து!

227.

ஒருமுறை சொல்லடி! உள்ளம் குளிர!

திருமுறை போலத் திகழும்! - உருகி

வருநிலை பார்த்து வளர்நிலை செய்யும்

அருமரைப் பெண்ணே அரண்!

228.

சொன்னாள்! சுரந்தூறும் காதலை! இன்சொல்கேட்(டு)

என்னால் இருக்க இயலுமோ? - அந்நாளோ

பொன்னாள்! இதயம் புகுந்த திருநாள்!ஆம்

அன்னாள் அழகின் அணி!

229.

வண்ணத்துப் பூச்சியென வந்து பறக்கின்றாள்!

எண்ணத்துள் நின்றே இசைக்கின்றாள்! - இன்பத்தால்

கன்னத்தைக் காட்டிக் கவிதை படைக்கின்றாள்!

அன்னத்தைக் காட்டும் அழகு!

230.

நந்தவனம் செந்தமிழ்ச் சந்தமிடும்! என்னவளின்

கந்தம் கமழ்கின்ற கால்பட்டு! - செந்தமிழ்போல்

தந்தசுகம் கண்டு தழைக்குதடி அந்தவனம்!

வந்தவுடன் வாடும் வளைந்து!

(தொடரும்)