வ.உ.சி

கப்பலோட்டிய தமிழர்

வ.உ.சிதம்பரனார் 

படித்தவர்கள் பரங்கியர்தம் கால்கள் நாடிப்

            பதவிபெறும் அந்நாளில், நாட்டைக் காக்கத்

துடித்தவர்கள் அணியினிலே முன்னே நின்று

            துறந்திட்டார் பதவியினை! நன்றாய்க் கொள்ளை

அடித்தவர்கள் அகன்றிடவே கப்பல் ஓட்டி

            அஞ்சாத வேங்கையென நின்றார்! கண்ணீர்

வடித்தவர்கள் வாழ்வுயர நிலவாய் இங்கு

            வந்துதித்த வ.உ.சி புகழைப் போற்று!

கொழித்தஅயல் நாட்டினரை ஓட்ட, ஆடை

            கொளுத்தும்போர் படைத்திட்டார்! உரிமைச் சங்கை

அழித்தகொடும் தீயவரைப் போக்கச், செல்வம்

            அத்தனையும் இழந்திட்டார்! நாட்டுக் காகச்

செழித்தபுகழ் மேன்மையினை ஈந்து, கூண்டில்

            செக்கிழுத்துத் துயருற்றார்! முதுமை ஏய்திக்

கழித்ததுயர் வாழ்வோடு தமிழை ஆய்ந்து

            கனல்கொடுத்த வ.உ.சி புகழைப் போற்று!