ஏக்கம் நுாறு [ பகுதி - 14 ]

ஏக்கம் நுாறு [பகுதி - 14]

குதிரைவால் குழலழகு! கவிஞன் என்னைக்

     குதித்தாட வைக்குதடி! வீரம் பொங்கும்

மதுரையாள் எனும்சொல்லை முற்றும் போக்கி

     மதுப்போதை மங்கையுனைச் சுற்றும் மூச்சே!

பதுமைபோல் ஒளிர்கின்றாய்! பார்த்துப் பார்த்துப்

     பைத்தியமாய் அலைகின்றேன்! அன்பே உன்னால்

புதுமைவான் பொலிந்தாடும்! பாடும் எண்ணம்

     புலமை..வான் பறந்தாடும்! பூந்தேன் பெண்ணே! 66

மூக்குக்கு நல்லுவமை எடுத்துக் கூற

     முன்னுாறு கற்பனைகள் முன்னே ஆடும்!

நாக்குக்கு அவள்பெயரைச் சொல்லிச் சொல்லி

     நற்றேனைச் சுரக்கின்ற தன்மை வாய்க்கும்!

வாக்குக்குக் கவிபாடப் பாரீச் சாலை

     வடிவழகை உரைத்திடுவேன்! காந்தம் ஈா்க்கும்

போக்குக்குப் போகின்ற துகளைப் போன்று

     போகின்றேன் போதையிலே அவளின் பின்னே! 67
                                               தொடரும்