விருத்த மேடை - 85
சந்தக் கலிவிருத்தம் - 2
தனதன தனதன தனதன தனதன
ஒவ்வொரு சீரும் நான்கு சந்த மாத்திரை
இறுவன கொடியவை எரிவன இடையிடை
துறுவன சுடுகணை துணிவன மதகரி
அறுவன அவையவை கடவினர் தடிதலை
வெறுமைகள் கெடுவன விழுகுழி கழுதுகள்
[கம்பன், யுத்த. ஆதிகாயன் வதை -
132]
உயர்வற உயர்நலம் உடையவன் யவனவன்
மயா்வற மதிநலம் அருளினன் யவனவன்
அயர்வறும் அமரர்கள் அதிபதி யவனவன்
துயரறு சுடரடி தொழுதெழென் மனனே
[நம்மாழ்வார். திருவாய்மொழி - 1]
துடியொடு சிறுபறை வயிரொடு துவைசெய
வெடிபட வருபவர் எயினர்கள் அரையிருள்
அடுபுலி யனையவர் குமரிநின் அடிதொடு
படுகடன் இதுவுகு பலிமுக மடையே!
[சிலம்பு.வேட்டுவ வரி - 16]
தனதன தனதன தனதன தனதன என்ற சந்த அமைப்பைக் கொண்ட இவ்விருத்தத்தின் ஒவ்வொரு சீரும் நான்கு சந்த மாத்திரைகளைப் பெற்றுள்ளது.
முதல் சீரும் மூன்றாம் சீரும் தந்தன, தானன எனும் சந்தத்திலும் அமையலாம். இரண்டாம் சீர் தந்தன எனவும் நான்காம் சீர் தானன எனவும் வரலாம்.
பாடலின் இறுதி ஒரு சீர் மட்டும் தனனா என்று வருவதும் உண்டு.
திருமொழி யமுதடி! திருவடி மலரடி!
கருவிழி தருமொழி கலைநட மிடுமடி!
அருமொழி யணியடி அகமுறு நினைவடி!
ஒருவழி யிலையினி உறவினை யளியளி!
[பாட்டரசர்]
பொன்மகள் புனைகவி புவியெழில் பருகிடும்!
இன்மகள் தருமொழி எனதுயிர் சொருகிடும்!
மென்மகள் விழியொளி விளைநிலம் பெருகிடும்!
சொன்மகள் உருவொளி உயிருடல் உருகிடும்!
[பாட்டரசர்]
மேற்கண்ட சந்தக் கலிவிருத்தம் ஒன்றே ஒன்று விரும்பிய தலைப்பில் இயற்றுமாறு அன்புடன் வேண்டுகிறேன்.
எளிமையாக எழுதும் முறை
வல்லாற்று இல்லாமல் நான்கு குறிலெழுத்துகளைப் பெற்று வரும் கருவிளமாக அனைத்துச் சீர்களும் அமைந்தால் மிகச் சிறப்பாக இச்சந்தம் இனிக்கும்.
பாட்டரசர் கி. பாரதிதாசன்
கம்பன் கழகம் பிரான்சு
தொல்காப்பியர் கழகம், பிரான்சு
17.12.2022
Aucun commentaire:
Enregistrer un commentaire