கட்டி இழுக்கின்றாள் - தன்னுடல்
கட்டில் இழுக்கின்றாள்!
கையைக் கட்டி
மயக்குவதேன்? - கண்ணால்
மையைக் கொட்டி
இயக்குவதேன்?
கயிறால் கட்டிப்
பிணைப்பதுமேன்! - நீண்ட
கண்ணால் முட்டி
அணைப்பதுமேன்?
சடை காட்டிச்
செல்லுவதேன்? - அன்ன
நடை காட்டி
வெல்லுவதேன்?
இடை காட்டிக்
கொல்லுவதேன்? - காதல்
தொடை தீட்டிச்
சொல்லுவதேன்?
மயிலோ? - பேசும்
மணிக்கிளியோ?
மலரோ? - இனிய
மதுக்குடமோ?
சிறுத்த வயிற்றின்மேல்
பெருத்த மலையுற்றாள்!
கருத்த கண்ணன்தன்
கருத்தில் நிலைபெற்றாள்!
மலைகொண்ட
கண்ணனைத் - தவழும்
அலைகொண்ட
வண்ணனை - வெல்லும்
சிலைகொண்ட
நேயனை - மாயக்
கலைகொண்ட
ஆயனை
வலைகொண்ட
பாவை - நெஞ்சுள்
தொளைகொண்ட
பார்வை!
போதை அளிக்கும்!
பாதை மறைக்கும்!
வில்லை உடைத்தவனைச் - சின்ன
விழியால் உடைக்கின்றாள்!
வித்தை நடம்புரிந்து - காதல்
மெத்தை படைக்கின்றாள்!
உலகை அளந்தவன் - கோதை
உடலை அளக்கின்றான்!
அடியளந்தான் - நங்கை
அடியழகில் ஆழ்கின்றான்!
அன்று
உரலில் கட்டுண்டான்!
இன்று
உருவில் கட்டுண்டான்!
நீல மேனியன் - அவளழகில்
நீந்தும் தோணியன்!
நெடியவன் - மீண்டும்
பொடியவன் ஆனதுமேன்?
விடியவன் - அழகின்
அடியவன் ஆனதுமேன்?
அன்பெனும் பிடியில்
அகப்பட்டவன் - காதல்
அணங்கின் கைப்பிடில்
அகப்பட்டதேன்?
காதல்
கடவுளையும் கட்டும்
கவிதைகளைக் கொட்டும்!
காதலைக்
கம்பனும் கண்டான்!
காளிதாசனும் உண்டான்!
கண்ணனும் கொண்டான்!
காதல் வாழி!
கன்னல் தமிழ் வாழி!
பாட்டரசர் கி. பாரதிதாசன்
20.01.2019
Aucun commentaire:
Enregistrer un commentaire