காதல் ஆயிரம் [பகுதி - 119]

காதல் ஆயிரம் [பகுதி - 119]

976.

கழிகிறது ஓர்நொடியும் ஓர்யுகமாய்க் கண்டு!

மொழிகிறது மோகம் முளைத்து! - பழியைப்

பொழிகிறது பொய்யாய்ப் புலவன்மேல்! பொங்கி

வழிகிறது காதல் வளர்ந்து!

977.

தேக்குமரத் தோளழகா! தேவியெனை அப்படியே

தூக்கிவர என்செய்வேன்? சொக்குகிறேன்! - நீங்காத

ஏக்கமுடன் பார்க்கின்றேன்! இன்பக் கவியெழுத

ஊக்கமுடன் பார்க்கின்றேன் ஓர்ந்து!

978.

பொன்னிதயம் பெற்றவளே! பூவே! புலவனின்

இன்னிதயக் கூட்டை இடிப்பதேன்? - உன்னிதய

வாயிலை ஏன்அடைத்தாய்? இன்பக் கவியெழுதும்

கோயிலை ஏன்அடைத்தாய் கூறு?

979.

கொஞ்சுமொழி பேசிய கோதையின் செவ்விதழ்

நஞ்சுமொழி பேசுதல் நாயமோ? - விஞ்சினிமை

வஞ்சிமொழி யாகும்! வருத்தம் எதற்காக?

பஞ்சிமொழி யாளே பகர்!

980.

செல்லமொழி பேசிடுவாள்! செந்தேனில் சொல்கலந்து

மெல்லமொழி பேசிடுவாள்! வெல்மொழியாள்! - வல்லமையாய்

நல்லமொழி பேசிடுவாள்! நற்றமிழில் போட்டியிட

இல்லைவழி என்றும் எனக்கு!

(தொடரும்)