பாவலர்
சரளா விமலராசா
புகழ்ப் பதிற்றந்தாதி!
உலகு மகிழ்ந்தேத்த, ஓங்குநலஞ் சூழ,
அலகில் அகத்தன்பே ஆழக், - குலஞ்செழிக்க,
என்றைக்கும் பேர்நிலைக்க, இன்சரளா செந்தமிழாம்
அன்னைக்[கு] அரும்பணி ஆற்று!
ஆற்றல் தமிழ்ப்பெண்ணின் ஆளுமை நல்விருதை
ஏற்றுச் சிறந்த எழில்சரளா - போற்றுகிறேன்!
வண்ணக் கவியுலகில் மின்னும் மதியானாய்!
அண்ணல் அளித்த அருள்!
அருள்கமழும் உள்ளம், அறங்கமழுஞ் சிந்தை,
பொருள்கமழும் பாட்டின் புதையல், - உருள்திகழுந்
தேரழகு செய்கை, செழித்தோங்குந் தென்சரளா
பேரழகு பேணும் பிறப்பு!
பிறப்பின் பயனும் பெரியோர்தம் வாழ்த்தும்
சிறப்பின் தொடரும் செழிக்கும் - அறத்தினைக்
காக்குந் தமிழ்ச்செல்வி கன்னல் மொழிச்சரளா
பூக்கும் புதுமைப் பொழில்!
பொழின்மணக்கும் பாட்டும் புகழ்மணக்கும் தொண்டும்
எழின்மணக்கும்
தோற்றமும் ஏந்தி - மொழிமணக்கும்
பற்றுப் படர்ந்தோங்கிப் பண்பார் பயன்சரளா!
கற்றுக் கமழுங் கவி!
கவியே உயிராகும்! கற்பே..வே ராகும்!
புவியே உறவாகும் பூத்துச் - செவியிரண்டும்
நல்ல தமிழ்கேட்டு நாளினிக்கும் நற்சரளா!
வல்ல மதியின் மகள்!
மதியின் மகளென்பார்! வாழ்வு கொழிக்கும்
நிதியின் மகளென்பார்! நெஞ்சம் - நதியென்பார்!
வள்ளல் மகளென்பார்! வண்ண மிகுசரளா
மள்ளல் மகளென்பார் வாழ்த்து!
வாழ்த்து மலையாகும்! வாழ்வு கலையாகும்!
காத்து மரபைக் கடனாற்றும்! - சாத்து
மணிச்சரமாய் மாண்பழகு வாய்த்த சரளா
அணிச்சரமாய் மின்னும் அறிவு!
மின்னும் அறிவொளியை மேவி நிலம்வாழப்
பின்னும் படைப்புகள் பேறருளும்! - என்றென்றும்
ஈசன் திருவடியை ஏத்தும் அருஞ்சரளா
பாசப் பொழிவெனப் பாடு!
பாடு நெறிசிறக்கும்! பண்பு வழிபழுக்கும்!
தேடு
பொருள்கொழிக்கும்! சீர்செழிக்கும்! - நீடுபுகழ்
நீதி நிறைகொடுக்கும் நெஞ்சச் சரளாவை
ஓதி
மகிழும் உலகு!
பாட்டரசர் கி. பாரதிதாசன்
16.10.2022
Aucun commentaire:
Enregistrer un commentaire