விருத்த மேடை - 75
கலிவிருத்தம் - 11
காய் + காய் + காய் + மா
தண்ணீரும் நிழற்பாங்கில் சார்ந்திருக்கு மானால்
தண்ணென்னும் குளிர்ச்சியினைத் தான்தாங்கு மன்றோ!
கண்மணியாள் என்மனையாள் கலந்திருக்கும் காலம்
மண்ணுலக இனிமைகளின் மாமலையின் உச்சம்!
கலைமாமணி
கவிஞர் தே. சனார்த்தனனார், புதுவை - 4
வடலுார் வள்ளல்!
வாடுகின்ற பயிர்கண்டு வாடியுளம் நின்றார்!
ஓடுகின்ற உள்ளத்தை உள்ளடக்கி வென்றார்!
பாடுகின்ற அருட்பாவைப் பற்றுடனே தந்தார்!
கூடுகின்ற ஞானவொளி குருவாக வந்தார்!
[பாட்டரசர்]
எண்சீர் விருத்தத்தின் அரையடி, கலிவிருத்தத்தின் ஓரடியாக அமைவதுண்டு.
காய் + காய் + காய் + மா என்ற வாய்பாட்டில் நான்கடிகள் ஓரெதுகையில் அமைய வேண்டும். ஒன்று மூன்றாம்
சீர்களில் மோனை வரும்.
காய் + காய் + காய்+ மா என்ற வாய்பாட்டில் விரும்பிய தலைப்பில் கலிவிருத்தம் ஒன்று இயற்றுமாறு அன்புடன் வேண்டுகிறேன்.
அன்புடன்
பாட்டரசர் கி. பாரதிதாசன்
கம்பன் கழகம் பிரான்சு
தொல்காப்பியர் கழகம், பிரான்சு
16.10.2022
Aucun commentaire:
Enregistrer un commentaire