கலிவிருத்தம் - 6
[காய் + காய் + காய் + காய்]
[பெரும்பாலுங் காய் முன் நிரையாகிய கலித்தளை வரும். அருகியே வெண்டளை வரும்]
கங்கையிரு கரையுடையான்! கணக்கிறந்த நாவாயான்!
உங்கள்குலத் தனிநாதற் குயிர்த்துணைவன்! உயர்தோளான்!
வெங்கரியின் ஏறனையான் விற்பிடித்த வேலையினான்!
கொங்கலரும் நறுந்தண்டார்க் குகனென்னும் குறியுடையான்!
[கம்பர், அயோத்தியா. கங்கைகாண் - 25]
வில்லுடையான்! விழியிரண்டில் விரிந்தமலர் அழகுடையான்!
மல்லுடையான்! மணக்கின்ற மனமுடையான்! அமுதுடைய
சொல்லுடையான்! அடியார்தம் தொண்டுடையான்! ஒருத்தியெனும்
இல்லுடையான்! இனிப்புடையான்! இராமனெனும் திருமகனாம்!
[பாட்டரசர்]
கலிவிருத்தம் ஓரடியில் நான்கு சீர்களைப் பெறும். நான்கடிகள் ஓரெதுகையில் அமையும். ஒன்று மூன்றாம் சீர்களில் மோனை வரும்.
காய் + காய் + காய் + காய் என்ற வாய்பாட்டில் அமைந்த கலிவிருத்தம் ஒன்று விரும்பிய பொருளில் இயற்றுமாறு அன்புடன் வேண்டுகிறேன்.
அன்புடன்
பாட்டரசர் கி. பாரதிதாசன்
கம்பன் கழகம் பிரான்சு
தொல்காப்பியர் கழகம், பிரான்சு
22.07.2022
Aucun commentaire:
Enregistrer un commentaire