தமிழா! நித்திரை கிழித்து..வா!
நெஞ்சினை நிமிர்த்தி..வா!
எத்தனைத் தடைகளோ - உடைத்து
வெற்றியைச் சூடி..வா!
அன்னையை மறப்பதோ? - சோம்பித்
திண்ணையில் கிடப்பதோ?
அன்னிய ஆசையால் - உன்றன்
கண்ணையே இழப்பதோ?
உண்டு உறங்குவதோ? - துயர்
கண்டு நடுங்குவதோ?
நண்டு இழுப்பதுபோல் - செயல்
கொண்டு அழுந்துவதோ?
கேலிப் பொருளாக - பிறர்
காலிற் கிடக்காதே!
தோளிற் பலமுண்டு! - நாள்கள்
தூங்கிக் கழிக்காதே!
சாதிப் பெயர்நீக்கு! - வெறியாம்
சமயப் பகைபோக்கு!
ஆதித் தமிழ்நூல்கள் - ஓதும்
அழகை உனதாக்கு!
தலைவர் தலைவரெனத் - தூக்கித்
தலைமேல் ஆடாதே!
விலையாய் உன்வாழ்வை - விற்று
வெந்து வாடாதே!
நடிகர் நடிகைகளை - வாழ்வாய்
நம்பித் துதிக்கின்றாய்!
விடிவா.. திரையொளியும் - காலம்
வீணில் கழிக்கின்றாய்!
குனிந்து நீ..நின்றால் - உன்மேல்
குதிரை ஏறிடுவான்!
துணிந்து நீ..நின்றால் - பகைவன்
தொடவே அஞ்சிடுவான்!
இம்மண் சுமையாகத் - தமிழா!
என்றும் இருக்காதே!
கும்ப கருணனைப்போல் - தூங்கிக்
கொள்கை மறக்காதே!
மம்மி தாடியெனத் - தமிழ்
மழலை அழைக்குது..பார்!
அம்மா எனும்சொல்லோ - மெல்ல
அழிந்து போகுது...பார்!
தன்னலம் நீக்குகவே! - தாயாம்
தமிழ்நலம் தேக்குகவே!
உன்னரசு ஆட்சியிலே - தமிழை
ஒளிபெற ஏற்றுகவே!
சின்னத் திரைப்பெட்டி - உன்னைத்
தின்னு செரிக்கிறது!
பெண்ணை அடிமையிடும் - பே
ரிழிவு தொடர்கிறது!
ஈரம் தமிழ்வித்து! - புகழ்
ஆரம் குறள்முத்து!
வீரம் நம்சொத்து! - எழுக
கீரனை நீ கற்று!
விழித்துக் காத்திடுக! - சீர்
விளைத்துக் கூத்திடுக!
தழைத்துப் பூத்திடுக! - உலகே
தமிழைப் போற்றிடுக!
RépondreSupprimerநித்திரை நீக்கி நிமிர்ந்து நடைபோட
முத்திரைப் பாக்கள் மொழிந்துள்ளீா்! - சத்தியம்!
இந்தக் பதிவினை ஏந்தும் மனத்துள்ளே
செந்தேன் சுரக்கும் செழித்து!
Supprimerவணக்கம்!
நாட்டின் இழிவழிய, வாட்டும் துயரொழிய,
ஓட்டும் நாிகளைக் காட்டுக்குள்! - தீட்டிடுவோம்
ஓட்டை இலாமல் உயர்சட்டம்! ஒண்டமிழ்க்
கோட்டை அமைப்போம் குளிா்ந்து