காதல் ஆயிரம் [பகுதி - 114]
951.
பூக்காட்டைச் சூடிப் பொலிக்கின்ற பேரழகே!
பாக்காட்டைச் சூடிப் பயன்தர..வா! - சாக்காட்டைப்
போக்கும் புதுமருந்தே! பொங்கும் தமிழ்விருந்தே!
பூக்கும் புலமைப் பொழில்!
952.
பரவும் நினைவுகளில் பற்றிக் கிடந்தேன்!
விரவும் கனவுகளில் வீழ்ந்தேன்! - விருந்தாய்
இரவில் வருகைதரும் என்னரசே! உன்றன்
உருவில் உருகும் உயிர்!
953.
நித்தம் குரல்கேட்க வேண்டும்! நிலவே!என்
சித்தம் இழந்தேன்! செயல்மறந்தேன்! - கத்திக்
கசியும் கவிமனத்தைக் காணாமல் போனாய்!
வசியம் புரிந்தாய் வளைத்து!
954.
பொன்வேண்டாம்! எந்தப் பொருள்வேண்டாம்! சேர்த்துள்ள
மண்வேண்டாம்! வாழும் வளம்வேண்டாம்! - கண்ணே!உன்
கட்டழகை நான்சுவைக்கும் காலம் கனியட்டும்!
மொட்டழகைப் போர்வையால் மூடு!
955.
குரல்கேட்டு வாயும் குளறும்! இதமாய்
விரல்தொட்டுப் பொன்மேனி வீங்கும்! - திரளாய்
வரும்கனவு நாளும் வளரும்! இனிமை
தரும்உணர்வு நாளும் தழைத்து!
(தொடரும்)
