காதல் ஆயிரம் [பகுதி - 34]

காதல் ஆயிரம் [பகுதி - 34]

331.

போற்றும் புலமை பொலிந்தாடும் பூங்கொடியே!

காற்றும் எனக்கு..நீ! நற்கவிதை - ஊற்றும்..நீ!

தோற்கும் நடையழகில் தூயவெண் அன்னங்கள்!

ஏற்கும் அதனினம் என்று!

332.

அன்னமொன்று மெல்ல அசைந்து நடந்துவர!

என்னவென்று சொல்லிடுவேன் என்னிலையை! - மின்னலொன்று

கண்ணிலொன்றைக் கவ்வியது! காதல் பெரும்சுவையின் 

பண்ணிலொன்றைப் பாடுகிறேன் பார்!

333.

அடைகாக்கும் சிட்டென ஆசைகளைக் காத்தே

நடைகாக்கும் நற்றமிழ் நங்கை! - புடைத்த

உடைகண்டும் மென்மை இடைகண்டும் வாழைத்

தொடைகண்டும் நீங்கும் துயர்!

334.

மாலை மணியெட்டு! மங்கையவள் வந்திடுவாள்!

சோலைக் குளிருற்றுச் சொக்குகிறேன்! - சேலையெழில் 

மூளை முழுதும் பதிவாகி முட்டிடுமே? 

காளை கனவில் கலந்து! 

335.

சின்னவள்! மெல்லச் சிணுங்கும் செயலுயர்ந்து

பொன்னவள் ஆகிப் பொலிகின்றாள்! - பண்ணிசைக்கும்

என்னவள்! இன்பருவப் பெண்ணவள்! ஈடிலாத் 

தென்னவள் சீர்களைச் சேர்த்து!

336.

ஊக்கம் இலாமல், உயிர்பருகும் ஒண்டமிழ்

ஆக்கம் இலாமல் அலைவதுமேன்? - எக்கணமும்

தூக்கம் இலாமல் துவளுக்கின்ற என்னவளே 

ஏக்கம் எதுவோ எழுது!

337..

பாடிக் களிப்பாள்! பசுஞ்கவிஞன் என்னுடன்

ஆடிக் களிப்பாள்! நயனணிகள் - சூடியென்று

கூடிக் களிப்பாள்! இரு..கைகள் கொண்டின்று

மூடிக் களிப்பாள் முகம்!

338.

பொன்னணிக் கூடம்! பொலிபுதையல்! தேனுற்று!

மின்மினிக் கூட்டம்! மிளிர்பட்டு! - கண்மயக்கும்

விண்மினிப் பூக்கள்! வியப்பூட்டும் மத்தாப்பாம்!

என்னுயிர்ப் பெண்ணின் எழில்!

339.

இங்கு நலம்..நீ! இளையவளே! பேரழகே!

அங்கு நலமா..நான்! ஆரமுதே! - செங்கரும்பே!

தங்கு தடையின்றித் தண்டமிழ்ப் பாட்டிசைப்போம்!

பொங்கும் இளமை பொலிந்து!

340.

நினைந்துடல் மெல்ல நெகிழும்! வியர்வால் 

நனைந்துடல் ஆடும் நடனம்! - மணந்தே

இணைந்துடல் சொக்கும்! இளமை துடிக்கும்!

பிணைந்துடல் காணுமே பேறு!

(தொடரும்)