காதல் ஆயிரம் [பகுதி - 29]

காதல் ஆயிரம் [பகுதி - 29]

 

281.

வண்ணக் கவிதை வளமாய் வடிக்கின்ற

என்னவளே வாழ்க இனிதோங்கி! – என்றென்றும்

எண்ணம் முழுதும் எழுத்தாய்த் திகழ்கின்ற 

சின்னவளே வாழ்க செழித்து!

282.

எல்லாத் துயரும் எனைவாட்டும்! அத்தனையும்

நில்லா(து) ஒழியும் உனைநினைத்தால்! - நல்லவளே!

கல்லாக் கலைகளைக் கண்ணால் உரைப்பவளே!

சொல்லாக் கதைகளைச் சொல்லு!

283.

எண்ணும் பொழுதெல்லாம் இன்பத் தமிழ்போலச்

கன்னல் சுரந்தூறும் கட்டழகே! - உன்கவிதை

பன்னும் பொழுதெல்லாம் பைந்தமிழ்த் தேன்சொற்கள்

மின்னும் எனக்குள் மிகுந்து

284.

எதுவரை காதலின் எல்லையோ? ஆம்!ஆம்!!

அதுவரை போகலாம் ஆழ்ந்து! – புதுமை

இதுவரை எண்ணினோம்! இன்றுநாம் கூடிப்

புதுவரை செய்வோம் புணர்ந்து

285.

உனக்கொன்(று) எனில்என் உளம்வாடும்! அன்பே

கணக்கொன்(று) இலாமல்உள் காயும்! - துணையாய்

எனக்கென்று வந்து பிறந்தவளே! இன்பம்

மணக்கின்ற வாழ்வை வழங்கு!

286.

உன்கண் கலங்கினால் உள்ளம் உடைந்துவிடும்!

என்..பொன் மயிலே! இளையவளே - என்னுயிர்

மண்மீ(து) இருக்கும்! மலரே உனைப்பிரிந்தால்

விண்மீ(து) இருக்கும் விரைந்து!

287.

காய்ச்சலெனச் சொன்னாய்! கவிஞனின் பாக்களிலே

பாய்ச்சல் குறைந்ததடி! பாநயம் - ஓய்ந்ததடி!

சாய்ந்துவரும் மாலை சதிபுரிந்து தாக்குதடி!

தோய்ந்துவரும் மாலைத் துயர்!

288.

எண்ணம் இனிக்கும்! எடுத்தெழுதும் இன்றமிழ்

வண்ணம் இனிக்கும்! வடிவாக - மின்னிடும்

கன்னம் இனிக்கும்! உயிர்கலந்து கட்டுகின்ற

சின்னம் இனிக்கும் சிவந்து!

289.

எழுதும் கவிதையை என்னவளே! நாளும்

தொழுது படித்தே சுவைப்பாய்! - அழகே

விழுது பிடித்து விளையாடிக் காதல்

உழுது விளைப்போம் உறவு!

290.

இவைகொடுக்கும் என்றே எனதுள்ளம் ஏங்க

அவைகொடுத்து ஆளும் அழகே! - புவியில்

சுவைகொடுக்கும் உன்றன் சுடர்மிகு பா..போல்

எவைகொடுக்கும் இன்பம் எனக்கு!

(தொடரும்)