தமிழ்ச்செம்மல், பாவலர்மணி
வலங்கைமான் இராம. வேல்முருகன் எழுதிய
விருத்தமாயிரம் நுாலுக்குச்
சாற்றுகவி
பாட்டரசர் பயிலரங்கில் விருத்தப் பாக்கள்
பளபளக்க ஆயிரத்தைப் படைத்தார்! வல்ல
ஏட்டரசர் இராம.வேல் முருகர்! ஈடில்
எழில்தஞ்சைப் புகழ்பாடும் இனியர்! அஞ்சாக்
காட்டரசர் அரிமாபோல் மேடை தன்னில்
காட்சிதரும் மாமறவர்! முன்னை வாழ்ந்த
நாட்டரசர் போலிங்குத் தமிழைக் காக்க
நாடோறும் பணிபுரிந்தார்! வாழ்த்து கின்றேன்!
பகலென்ன இரவென்ன எழுத்து வேலை
பயன்கருதா நோக்கமுடன் செய்தார்! வண்ணப்
புகழ்மின்ன இராம.வேல் முருகர் இப்பார்
புரட்டுகின்ற விருத்தங்கள் நெய்தார்! வாழ்வின்
நிகரென்ன நிறையென்ன நன்றே ஆய்ந்து
நிலமோங்க நல்வழிகள் சொன்னார்! போற்றும்
அகமின்னப் புறமின்ன அளித்த பாக்கள்
அமுதன்ன சுவையூட்டும்! வாழ்த்து கின்றேன்!
முகநுாலில் தமிழ்வளர்க்குந் தொண்டால், என்றன்
அகநுாலில் பதிவான மொழியின் செல்வர்!
தகைநுாலில் இராம.வேல் முருகர் நற்பேர்
தழைத்தோங்கும்! தனித்தோங்கும்! தமிழே யோங்கும்!
தொகைநுாலில் மனமொன்றி நன்றே கற்றுத்
தொடர்நுால்கள் படைக்கின்ற ஆற்ற லோங்கும்!
பகைநுாலில் அருஞ்சீர்கள் இருக்கு மென்றால்
பாராட்டுங் குணமோங்கும்! வாழ்த்து கின்றேன்!
என்செய்வார் எதுசெய்வார் எண்ணும் முன்னே
இனிக்கின்ற விழாச்செய்வார்! பாடும் பாட்டுள்
பொன்செய்வார்! பொழில்செய்வார்! புதுமை செய்வார்!
புதுக்கவிஞர் வளர்ந்திடவே வழிகள் செய்வார்!
முன்செய்வார் பின்செய்வார்! நலமே செய்வார்!
முத்தமிழே மணக்கின்ற தொண்டே செய்வார்!
மின்செய்வார் எழுத்துக்குள்! உலகே பாட
விண்செய்வார் பண்ணுக்குள்! வாழ்த்து கின்றேன்!
மண்செழிக்கும் தஞ்சையிலே மரபைக் காத்துப்
பண்செழிக்கும் பணிகொண்டார்! பண்பே பூண்டார்!
தண்செழிக்கும் இராம.வேல் முருகர் வாழ்வில்
தமிழ்செழிக்கும்! தகைசெழிக்கும்! கற்றுக் கற்றுக்
கண்செழிக்கும்! கவிசெழிக்கும்! கால மெல்லாங்
கற்றோரின் கனிவாழ்த்துச் செழிக்கும்! வெற்றி
எண்செழிக்கும் வண்ணத்தில் புகழாம் நற்றேர்
எண்டிசையும் ஆளட்டும்! வாழ்த்து கின்றேன்!
பாட்டரசர் கி. பாரதிதாசன்
தலைவர்
கம்பன் கழகம் - பிரான்சு
உலகத் தமிழ்ச் சிறகம்
தொல்காப்பியர் கழகம் - பிரான்சு.
பாவலர் பயிலரங்கம் - பிரான்சு
28.07.2024
Aucun commentaire:
Enregistrer un commentaire