கம்பன் விழா வெளியீடு

26.09.2015 - 27-09.2015 ஆம் நாள்

பிரான்சு கம்பன் கழகம் நடத்தும் 

பதினான்காம் ஆண்டுக் கம்பன் விழாவில் வெளியிடப்படும் நுால்கள் 

தொல்காப்பிய மன்றம்

உலகத் தொல்காப்பிய மன்றம்

தொடக்க விழாவும்

முதல் கலந்துரையாடல் கூட்டமும்

நாள்: 27.09.2015 இடம்: பாரிசு (பிரான்சு)

தமிழில் கிடைத்துள்ள முதல் இலக்கண நூல் தொல்காப்பியமாகும். 1847 இல் மழவை மகாலிங்க ஐயர் அவர்கள் தொல்காப்பிய நூலை ஓலைச்சுவடியிலிருந்து அச்சுவடிவில் முதன்முதல் பதிப்பித்தார். எழுத்ததிகாரம், சொல்லதிகாரம், பொருளதிகாரம் என மூன்று அதிகாரங்களாக உள்ள இந்த நூலில் 1600 நூற்பாக்கள் இடம்பெற்றுள்ளன. இதில் உள்ள இலக்கணச் செய்திகளும், மொழியியல் செய்திகளும் உலக மொழியியல் வல்லுநர்களால் பெரிதும் வியந்து பார்க்கும் தரத்தில் உள்ளன. இந்த நூல் குறித்துத் தமிழறிஞர்களும், அயலகத்து அறிஞர்களும் சிறந்த ஆய்வுகளை நிகழ்த்தியுள்ளனர். தொல்காப்பியத்தை அடிப்படையாகக் கொண்டு தமிழாய்வுகள் தொடர்ந்து நடைபெற்று வருகின்றன.

தொல்காப்பியத்தின் உண்மைப் பொருளையும் நுண்மைப் பொருளையும் காட்டும் வகையில் உரையாசிரியர்கள் உரை வரைந்துள்ளனர். தொல்காப்பியத்தை வழிமொழிந்து பல இலக்கண நூல்கள் தமிழில் வந்துள்ளன. தொல்காப்பியம் பிறமொழிகளிலும் மொழிபெயர்க்கப்பட்டுள்ளது. தொல்காப்பியம் பாடநூலாகக் கல்லூரிகளிலும் பல்கலைக் கழகங்களிலும் வைக்கப்பட்டுள்ளது. தொல் காப்பியம் குறித்த ஆய்வுகள், பதிப்புகள் தொடர்ந்து வெளிவந்த  வண்ணம் உள்ளன.

தொல்காப்பிய ஆய்வுகளை உலக அளவில் நடத்தும் வகையிலும், உலகெங்கும் உள்ள தொல்காப்பிய ஆய்வறிஞர்கள், பற்றாளர்கள், இலக்கிய, இலக்கண ஆர்வலர்களை ஒன்றிணைக்கும் வகையிலும் உலகத் தொல்காப்பிய மன்றம் என்ற அமைப்புத் தொடங்கப்பட உள்ளது. இந்த அமைப்புத் தொல்காப்பியத்தைப் பரப்புவதை முதன்மை நோக்கமாகக் கொண்டுள்ளது. உலகத் தொல்காப்பிய மன்றத்தில் தமிழ் படித்தவர்கள் மட்டும் என்று இல்லாமல் தமிழார்வலர்கள், எழுத்தாளர்கள், பேச்சாளர்கள், கணினி வல்லுநர்கள், பொறியாளர்கள், மருத்துவர்கள், ஆசிரியர்கள், வழக்கறிஞர்கள், அரசியல் ஈடுபாட்டாளர்கள், மாணவர்கள் எனத் தமிழறிந்த அனைவரும் இணைந்து பணிபுரியலாம்.

தொல்காப்பிய மன்றம் பிரான்சைத் தலைமையிடமாகக் கொண்டு செயல்பட உள்ளது. ஒவ்வொரு நாட்டிலும் தொல்காப்பிய மன்றத்திற்குரிய கிளைகள் தொடங்கப்பட்டுத் தக்க ஆய்வறிஞர்களால் வழிநடத்தப்பட உள்ளன.

தொல்காப்பியம் குறித்த மாநாடுகளை ஆண்டுதோறும் நடத்தித் தொல்காப்பிய ஆய்வினை வளர்த்தெடுப்பது தொல்காப்பிய மன்றத்தின் முதன்மை நோக்கமாகும். மேலும் தொல்காப்பியப் பதிப்புகள், தொல்காப்பிய ஆய்வறிஞர்கள், தொல்காப்பியம்  குறித்த கட்டுரைகள், தொல்காப்பிய மொழிபெயர்ப்புகள் என அனைத்து விவரங்களையும் ஒன்றுதிரட்டி உலகத் தமிழர்களின் பயன்பாட்டுக்கு இணையத்தில் வைப்பது என்னும் நோக்கிலும் செயல்பட உள்ளது. தொழில்நுட்பத்தைப் பயன்படுத்தித் தொல்காப்பியச் செய்திகள் எளிமையாக வெளிவர உள்ளன.

தொல்காப்பிய ஆய்வில் ஈடுபட்டவர்களையும், தொல்காப்பியப் பரவலில் துணைநின்றவர்களையும் அறிஞர்கள்குழு அடையாளம் கண்டு ஒவ்வொரு ஆண்டும் பரிந்துரைசெய்யும். அதன் அடிப்படையில், மலேசியாவில் வாழ்ந்த தொல்காப்பிய அறிஞர் சீனி நைனா முகமது அவர்களின் பெயரில் உலக அளவிலான விருது வழங்கித் தக்கவரைப் போற்ற உலகத் தொல்காப்பிய மன்றம் எண்ணியுள்ளது.

தமிழார்வமும் இலக்கண, இலக்கிய ஈடுபாடும் கொண்டு, செயலுக்கு முதன்மையளிக்கும் தமிழ்மக்கள் இம்மன்றத்தில் இணைந்து பணிபுரியலாம். தொல்காப்பிய நூலில் புலமையும், தமிழ்மொழி வளர்ச்சியில் ஆர்வமும்கொண்ட முனைவர் பொற்கோ (சென்னைப் பல்கலைக்கழக மேனாள் துணைவேந்தர்), பேராசிரியர் அ.சண்முகதாஸ் (இலங்கை),  முனைவர் இ.பாலசுந்தரம் (கனடா), முனைவர் சுப. திண்ணப்பன்(சிங்கப்பூர்), சிங்கப்பூர் சித்தார்த்தன், ம. மன்னர் மன்னன் (மலேசியா) ஜீன் லாக் செவ்வியார் (பிரான்சு), பேராசிரியர் இ. மறைமலை, முனைவர் சு. அழகேசன், புலவர் பொ.வேல்சாமி, சிவச்சந்திரன்(இலண்டன்), உள்ளிட்டவர்கள் இந்த மன்றத்தின் மூதறிஞர் குழுவில் இடம்பெற்றுள்ளவர்களுள் குறிப்பிடத்தக்கவர்கள்

பிரான்சு நாட்டின் தலைநகர் பாரிசில் 2015 செப்டம்பர் மாதம் 27 இல் உலகத் தொல்காப்பிய மன்றத்தின் தொடக்க விழாவும், முதல் கலந்துரையாடல் கூட்டமும் நடைபெற உள்ளன. இக்கூட்டத்தில் இந்தியா, இலங்கை, கனடா, சிங்கப்பூர், மலேசியா, பிரான்சு, இங்கிலாந்து, சவுதி அரேபியா உள்ளிட்ட நாடுகளிலிருந்து பேராளர்கள் கலந்துகொண்டு கலந்துரையாட உள்ளனர். தொல்காப்பியத்தைப் பரப்பவும், தொல்காப்பிய ஆய்வுகளை முன்னெடுக்கவும், தொல்காப்பியம் குறித்த செய்திகளைத் திரட்டவும் ஆர்வமுடையவர்கள் உலகத் தொல்காப்பிய மன்றத்தினரை tolkappiyam@gmail.com என்ற மின்னஞ்சலில் தொடர்புகொள்ளலாம்.

தொல்காப்பிய மன்றத்தின் உலக அளவிலான பொறுப்பாளர்களாகப் பிரான்சில் வாழும் கி.பாரதிதாசன் (பிரான்சு), மு.இளங்கோவன் (இந்தியா), ஆம்பூர் மணியரசன் (செர்மனி), ஹரிஷ் (இலண்டன்), சந்தன்ராஜ் (சிங்கப்பூர்), வாணன் மாரியப்பன்(மலேசியா), அரவணைப்பு கு.இளங்கோவன் (குவைத்து), பழமலை கிருட்டினமூர்த்தி (குவைத்), த.சிவ பாலு(கனடா), சுரேஷ் பாரதி (சவுதி), அருள் பாலாசி வேலு(தைவான்), அன்பு ஜெயா (ஆத்திரேலியா), கிருட்டினமூர்த்தி (அந்தமான்), ஆகியோர் இணைந்து பணிசெய்ய உள்ளனர்.

தமிழ்ப்புலவர்களின் கையில் இருந்த தொல்காப்பியம் உலகம் முழுவதும் பரவியுள்ள தமிழர்களின் கவனத்திற்குச் செல்ல உள்ளமை மொழியார்வலர்களுக்கு இனிப்பான செய்தியாகும்.

தொடர்புக்கு:

கவிஞர் கி. பாரதிதாசன் 0033 139931706 kambane2007@yahoo.fr

முனைவர் மு.இளங்கோவன் 9442029053 muelangovan@gmail.com

 

கவியேறு காவடிச் சிந்து

கவியேறு வாணிதாசன் காவடிச் சிந்து

1.

வாணி தாசர்புகழ்         பாடு - துள்ளி

                         யாடு - மகிழ்

                         வோடு - அவர்

வார்த்த தமிழ்க்கிலை     ஈடு - நாம்

வளமேபெறும் திறமேபெற நலமேபெறும் மறமேபெற

வாழ்வெல்லாம் தொண்டினைச் கொண்டார் - நம்

தாழ்வெல்லாம் போக்கிடக் கண்டார்!

கேணி தரும்சுவை        நீராய் - பழத்

                         தாராய் - கவி

                         யேறாய் - தமிழ்க்

காணி விளைத்தார்நற்     சீராய் - மண்

கேடேஅறும்! பீடேவரும்! நாடேபுகழ் பேறேவரும்!

ஞானியாய்ச் சிந்தனை நெய்தார் - பூந்

தேனியாய்ப் பாட்டடை செய்தார்!

2.

வள்ளுவர் வாய்மறை     யேற்று - பணி

                         யாற்று - அதைப்

                         போற்று - உடன்

வாடி ஓடும்வினைக்       கூற்று - என்றும்

வண்ணம்பல தந்தகவி! எண்ணம்தனில் நின்றகவி

மண்வாழ வண்டமிழ் வார்த்தார் - தமிழ்ப்

பண்வாழ ஒண்டமிழ் சேர்த்தார்

தௌ்ளிய நன்னடை       உண்டு - சுவை

                         கொண்டு - தினம்

                         கண்டு - மனம்

தேனுண்டு ஆடிடும்       வண்டு - பூந்

தென்றல்தரும் மென்மைச்சுகம் அன்னைத்தமிழ் அன்பைத்தரும்

தென்மொழி செல்வராய் வாழ்ந்தார் - நாளும்

பன்மொழி நூல்களை ஆய்ந்தார்!

3.

கொஞ்சும் இயற்கையைத் தீட்டித் - தேன்

                         கூட்டி - இசை

                         மீட்டி - புகழ்

கொண்டார் கொள்கைக்கொடி நாட்டி - இங்குக்

கோலத்தமிழ் காதற்றமிழ் ஞானத்தமிழ் மானத்தமிழ்

கொட்டியே நன்முர(சு) இட்டார் - பகை

வெட்டியே தீயிட்டுச் சுட்டார்!

விஞ்சும் எழில்நலம்       பூட்டி - உணர்

                         வூட்டி - துயர்

                         ஓட்டி - நமை

வெல்லச் செய்யும்வழி    காட்டி - துள்ளி 

வெற்றிநடை கொட்டும்படை! கற்றதமிழ் பற்றும்புகழ்

வீரத்தை நாள்தோறும் மொழிந்தார் - கலை

ஈரத்தை நாள்தோறும் பொழிந்தார்!

4.

பாவேந்தர் நண்பராய்      நின்று - பகை

                         வென்று - புகழ்

                         குன்று - வாழும்

பார்அவர் பாக்களைத்     தின்று - தமிழ்ப்

பற்றேமிகும் சத்தேபெறும்! முத்தேயொளிர் சித்தேபெறும்!

பண்பொளி வீசியே வாழ்ந்தார் - நாளும்

பண்ணொளிர் இன்பத்தில் ஆழ்ந்தார்!

நாவேந்தர் போற்றிடும்    உள்ளம் - தமிழ்

                         இல்லம் - கவி

                         வெள்ளம் - அவர்

நாவினில் சந்தங்கள்      துள்ளும் - நான்

நற்றேன்என உற்றேன்தமிழ்! பொற்கோவென நட்டேன்தமிழ்!

நற்றிறம் பெற்றிட வைத்தார் - என்னுள்

சொற்றிறம் மின்னிடத் தைத்தார்!

5.

பாடித் தொடுத்திட்ட       நூல்கள் - மொழியின்

                         கால்கள் - அறிவின்

                         வேர்கள் - அவை

பாவலர் கையேந்தும்      வேல்கள் - கொண்ட

பகையேஅறப் பயனேஉறப் புவியேநமைப் பணிந்தேதொழப்

பாங்குற நற்பணி புரிந்தார் - வண்ணப்

பூங்கொடி போல்மணம் செரிந்தார்!

நாடி நரம்புகள்            புடைக்க - இருள்

                         துடைக்க - நலம்

                         கிடைக்க - பாரில்

நம்மினத் தொன்மையைப்  படைக்க - இந்

நாட்டில்உள காட்டின்நரி ஓட்டும்படி மூட்டும்பறை

நாளெல்லாம் பாட்டுக் குழைத்தார் - தீட்டும்

தாளெல்லாம் செந்தேன் குழைத்தார்!

26.07.2015

வெண்பாக் கொத்து!

வெண்பாக் கொத்து!

குறள் வெண்பா

எங்கும் தமிழை இசைத்து மகிழ்ந்திட்டால்

பொங்கும் புவியிற் புகழ்!

நேரிசைச் சிந்தியல் வெண்பா

எங்கும் இருக்கின்ற ஏற்ற இறக்கத்தைக்

கங்கு கடலில் கரைத்திடுவோம்! - சங்கமிடும்

பொங்கல் சுவையாய்ப் புகழ்!

இன்னிசைச் சிந்தியல் வெண்பா

எங்கும் எரித்திடுவோம்! என்றும் எதிர்த்திடுவோம்!

சுங்கி நமைப்புரிக்கும் சாதியெனும் சூதினை!

பொங்கலெனப் பொங்கும் புகழ்!

நேரிசை வெண்பா

எங்கும் தமிழர் இணைந்து செயற்பட்டால்

தங்கும் வளங்கள் தழைத்தோங்கும்! - சிங்கமெனக்

காக்கும் திறமுற்றால் காலத்தை வென்றோங்கிப்

பூக்கும் புவியுட் புகழ்!

இன்னிசை வெண்பா

எங்கும் தமிழாய் எதிலும் தமிழாய்..நாம்

இங்குறச் செய்திட்டால் இன்னல் அகன்றோடும்!

இன்பம் நிறைந்தாடும்! இவ்வுலகே வாழ்த்துரைக்கப்

பொன்னாய்ப் பொலியும் புகழ்!

பஃறொடை வெண்பா

எங்கும் இருக்கும் இறைவன் எழிலுணர்க!

தங்கத் தமிழின் தகையுணர்க! - சங்கப்

புலவர் புகன்ற நெறியுணர்க! இன்பம்

குலவும் குறளமுதைக் கொள்க! - உலகினில்

உள்ள அனைவரும் உற்ற உறவாக

அள்ளி அணைக்கும் அகம்பெறுக! - உள்ளத்துள்

உண்மை ஒளியேற்றி ஒண்மை மறையறிக!

வண்கை வழங்கும் மகிழ்வுறுக! - வெண்மைக்

கவியுள் கதைத்த கருத்தை தெளிந்தால்

புவியுட் பொலியும் புகழ்!

இலக்கண விளக்கம்

வெண்பா கொத்தெனும் இப்பாட்டில் குறள் வெண்பா, நேரிசைச் சிந்தியல் வெண்பா, இன்னிசைச் சிந்தியல் வெண்பா, நேரிசை வெண்பா, இன்னிசை வெண்பா, பஃறொடை வெண்பா இடம்பெறவேண்டும்.

அனைத்து வெண்பாக்களிலும் முதல் சீர் ஒன்றாக வரவேண்டும். ஈற்றுச்சீரும் ஒன்றாக வரவேண்டும்.

மேல் உள்ள வெண்பாக்கள் 'எங்கும்', என்ற சீரை முதல் சீராகக் கொண்டுள்ளன. 'புகழ்' என்ற சீரை ஈற்றுச் சீராகக் கொண்டுள்ளன.

01.07.2015

குளக வெண்பா!

போற்றுவேன் உன்னைப் புகழ்ந்து!

குளக வெண்பா! 

சல்லடைபோல் என்னெஞ்சை முள்விழிகள் ஓட்டையிட!

சொல்..அடைபோல் வந்து சுவைகொடுக்க! - கள்ளுருக!

அள்ளிக் குடிக்க அலைபாயும் எண்ணங்கள்

துள்ளிக் குதிக்கத் தொடர்ந்து!

கண்டு களிக்கக் கவிதை பலபடைக்க

உண்டு களிக்க! உயிர்உருக! - வெண்மதியே!

ஏற்ற பிறவியெலாம் என்னோடு நீயிருக்கப்

போற்றுவேன் உன்னைப் புகழ்ந்து!

இலக்கண விளக்கம்

ஒரே வினைமுடிவு கொள்ளும் வெண்பாக்கள் குளகம் எனப்படும்.முதல் வெண்பா முழுவதையும் வினையெச்சத்தில் அடிக்கி; அடுத்த வெண்பாவில் வினையைப் பெய்து  
எழுத வேண்டும்.

முதல் வெண்பாவில் மூன்றாம் நான்காம் அடிகளில் வினைமுற்று, வியன்முற்று, ஏவல் வினைமுற்று செய்யுமெனும் வாய்ப்பாட்டு முற்று, பயன் நிலையாக அமையும் பெயர்ச்சொல்  
போன்றவற்றைத் தவிர்த்தல் நலம்.

09.07.2015