காதல் ஆயிரம் [பகுதி - 21]

காதல் ஆயிரம் [பகுதி - 21]

201.

மீட்டுதடி பொன்வீணை! மின்னுதடி உன்பருவம்!

கூட்டுதடி காதல் கொதிப்பினையே – வாட்டமுறத்

தீட்டுதடி ஆசைகளைத் தேவியே! கார்காலம்

மூட்டுதடி மோகம் முனைந்து!

202.

கொடைகொடுத்த பாரிபோல் கொஞ்சுதமிழ்ச் சீா்போல்

தொடைதொடுத்துப் பாடும் சுவைபோல் - கடைக்கண்

படைதொடுத்து வெல்லும்பூம் பாவையுனை நல்ல

நடைதொடுத்துப் பாடுவேன் நான்!

203.

பூத்துக் குலுங்கும் பொழில்களிலே உன்னுருவைப்

பார்த்துக் மகிழும்நற் பாவலன்நான்! – சேர்த்துயிர்

வேர்த்துக் ஒழுகும்! விரைந்தெனக்கு இன்னமுதை

வார்த்து வழங்கும் வடிவு!

204.

வசந்தமே வந்தாட! வண்டுபறந் தாட!

அசைந்து மலராட! அன்பால் - இசைந்து

மதுவூற! உண்டு மனமாட! வேறே

எதுகூற வேண்டும் இனி?

205.

ஓராயி ரம்பாட்டில் உன்னழகை நான்பாடச்

சீராயி ரம்தருவாள் செந்தமிழாள்! - கூரறிவால்

பார்..ஆயி ரம்முறை! பைங்கொடியே! காதலின்

பேராயி ரம்சொல்லும்! பேணு!

206.

சீருலாப் போகும் பொழுது! சிரித்தாடி

யாரிலா நேரம் எதிர்ப்பார்த்துச் – சேர்ந்துளம்

பார்..உலாப் பைந்தமிழைப் பாடிப் பறந்தனமே

காருலா வானில் களித்து!

207.

கூடை சுமந்து, குழலில் மலர்முடித்து

ஆடை நெகிழ்ந்தே, அழகொளிர - வாடிடச்

சாடை புரிந்தென்னைத் தாக்கும் தளிர்க்கொடியே!

கோடை தணியும் குளிர்ந்து!

208.

மார்கழிப் பூக்கள் மலர்ந்தாடும்! என்னுடைய

ஊர்வழி எங்கும் ஒளிகோலம்! - தேர்வரும்

சீர்வழிப் பாதையில் சின்னவள் செல்கிறாள்!

கூர்விழித் தாக்கம் கொடுத்து!

209.

பனியின் விடியல்! பளிச்சிடும் புற்கள்!

கனியின் சுவைகொடுக்கும் காலை! - இனியாள்

அணியின் அழகில் அடியேன் உருகத்

தணியும் மனத்தின் தவிப்பு!

210.

கண்ணுள் இருந்தே கவிதை படிக்கின்றாய்!

இன்னூல் இயம்பி இனிக்கின்றாய்! - பெண்ணணங்கே!

பொன்னூல் பொலிவே! புதையலே! உன்னழகு

என்னுள் இயங்கும் இணைந்து!

(தொடரும்)

காதல் ஆயிரம் [பகுதி - 20]

காதல் ஆயிரம் [பகுதி - 20]

191.

கொட்டுதடி நம்மிளமை கும்மி! குளிர்ந்தாடி

எட்டுதடி நம்மிளமை இன்னுலகை! – நுட்பமுடன்

கற்குதடி நம்மிளமை! காமனெழில் கோட்டையைப்

பற்றுதடி நம்மிளமைப் பாட்டு!

192.

பாவை விளக்கே! தமிழ்த்தாய் நடைபயிலும்

நாவை உடையவளே! நற்றேனே! – தேவையடி

கோவை இதழ்கொடுக்கும் முத்தம்! கவியெழுதச்

சேவை புரியும் சிறந்து!

       

193.

பித்தம் தெளிந்ததடி! சித்தம் செழித்ததடி!

நித்தம் நெகிழ்ந்ததடி! வெண்ணிலவே! – முத்தமிடும்

சத்தம் ஒளிக்குதடி! தந்ததன போடுதடி!

மொத்தம் மயங்குதடி மூச்சு!

194.

முத்த மழைபொழிந்து மோகப் பயிர்வளர்ந்து

அத்தை மகளே! அருஞ்சுவையே! – புத்தமுத

முத்தைச் சுவைத்து முடிமுதல் கீழ்வரையில்

வித்தை புரிவோம் வியந்து!

195.

ஒவ்வொரு முத்தமும் செவ்விதழ் தேன்கொடுக்கும்!

கவ்விடும் கண்கள் கவிபடைக்கும்! - தவ்விடும்

தாவிடும் நெஞ்சம் தமிழிசைக்கும்! பூந்தாது

தூவிடும் காமன் துணை!

196.

காதல் திருக்கோயில்! கன்னல் வழிபாடு!

மோதல் விழிகளின் போர்நிறுத்தம்! - ஓதும்நல்

வேதம் தரும்இன்பம்! விண்ணமுதம்! முத்தங்கள்

ஊதல் தரும்மிசை ஊற்று!

197.

அத்தை மகளே! அருந்தமிழே! வெண்பஞ்சு

மெத்தை நிகர்த்தஎழில் மேனியடி! – செத்தைக்

குடில்அமைத்துச் கூட்டாஞ் சோறாக்கி! சொர்க்கப்

படியமைப்போம் இன்பம் பகிர்ந்து!

198.

வாடும் பொழுதெலாம் வஞ்சியே உன்னினைவு

சூடும் இனிமையை! நற்றுணிவை! – நாடும்!என்

வீடும் புகழ்ந்திடப் பாடும் இளையவளே!

ஈடும் உனக்குளதோ இங்கு!

199.

ஈருயிர் சேர்ந்திட! இன்பம் சுரந்திட!

சீருயிர் தோற்றம் சிறப்பெய்த! – ஆருயிரே!

பேருயிர் என்றேநாம் பெற்றிடும் முத்தங்கள்

தேருயிர் ஏறும் திரண்டு!

200.

ஒருமுத்தம் நல்கும்ஓ ராயிரம் பாக்கள்!;

திருமுத்தம் நல்கும்செந் தேனை! – தருஞ்சீர்

அரும்முத்தம் நல்கும் அமுதக் கடலை!

பெரும்முத்தம் நல்கும் பிறப்பு!

                                                                                                                             

(தொடரும்)

காதல் ஆயிரம் [பகுதி - 19]

காதல் ஆயிரம் [பகுதி - 19]

81. 

முகம்கண்டேன்! முல்லை மலர்கண்டேன்! மின்னும் 

அகங்கண்டேன்! இன்னறம் கண்டேன்! – பகையாம்  

நகங்கண்டேன்! வற்றா நலங்கண்டேன்! காதல் 

சுகங்கண்டேன்! என்னவளைச் சூழ்ந்து! 

182.

தனந்தவழும் முத்துச் சரங்கண்டேன்! என்றன்

மனந்தவழும் பொன்னிதழுங் கண்டேன்! – மணஞ்சேர்

இனந்தவழும் இன்பத் தமிழ்கண்டேன்! பூத்த

வனந்தவழும் மங்கை வடிவு!

183.

வண்ண மதிகண்டேன்! சொன்ன மொழியிலே

கன்னல் நதிகண்டேன்! கண்மணியே – அன்னநடை

மின்னல் இடைகண்டேன்! என்னவளை யான்பெறவே

என்ன தவம்செய்தேன் இங்கு!

184.

பூங்குயில் கண்டேன்! புதுமை எழிற்கண்டேன்!

மாங்குயில் கண்டேன்! மனம்மகிழ்ந்தேன்! - நீங்கிடா

வேங்குழல் கண்டேன்! விருந்து நலங்கண்டேன்!

ஏங்குயிர் கொண்டேன் இனித்து!

185.

வண்டும் மலரும் இணைந்து பிறந்ததைக்

கண்டு வியக்கும் கவிமனம்! - தொண்டனாய்

நின்று நெடியவனைக் கண்டு நெகிழ்வதுபோல்

என்றும் இனிப்பாள் இவள்!

186.

எண்ணும் எழுத்தும் இருவிழிகள் என்றவளே!
உண்ணும் உணவாய் உயா்தமிழைக் - கொண்டவளே! 

கண்ணும் கொடுக்கும் கவிகோடி! உன்வரவால்

மண்ணும் மணக்கும் மலர்ந்து!

187.

எத்தனை வண்ணங்கள் என்னவள் பார்வையில்!

சித்தனைக் கூடக் சிலிர்ப்பேற்றும்! - முத்தாக

மின்னுகின்ற பல்லழகும் மீட்டும் இசையாகப்

பின்னுகின்ற சொல்லழகும் பீடு!

188.

வெண்பா முடிவழகு! என்பா வடிவழகு!

நன்..பா விருத்த நடையழகு! - பொன்பாவாம்

ஒண்பா குறளழகு! உன்பாச் சுவையழகு!

கண்..பார் பெருகும் கவி!

189.

சிந்திய முத்தங்கள் சிந்தனை மன்றத்தில.

குந்தி யிருந்து கூத்திசைக்கும் - செந்தமிழே!

முந்தி யிருந்து முகம்காட்டி, ஆசைகளைப்

பந்தி படைத்தாய் பசித்து

190.

ஒத்தையடிப் பாதை! ஒளிரும் மலர்ப்பந்தல்!

மெத்தையடி மென்தழைகள்! சிட்டுகளின் - வித்தையடி!

கொஞ்சுதடி பூங்குயில்கள்! கூடுதடி நம்மிதழ்கள்!

விஞ்சுதடி முத்தங்கள் வென்று!

                                                                                                                               

(தொடரும்)

காதல் ஆயிரம் [பகுதி - 18]

காதல் ஆயிரம் [பகுதி - 18]

171.

தேரோடும் வீதியிலே தேவியுனைக் கண்டமுதல்

போராடும் என்னுயிர் போதையிலே! - நீரோடும்

ஏரோடும் என்னுள்ளே தேனோடும்! நெஞ்சத்தை

வேரோடு கவ்வும் விழி!

172.

முத்தொளிரும் பல்லாக்கு முன்வரும்! நற்காதல்

பித்தொளிரும் பல்லாக்குப் பின்வரும்! - முத்தமிழே!

கற்றொளிரும் காரிகையே! எப்பிறப்பும் உன்மேலே

பற்றொளிரும் நன்றே படர்ந்து!

173.

பாதை மணக்கும்!கைப் பட்ட இடம்செழிக்கும்!

போதை கொடுக்கும்! புலமைதரும்! – கோதையவள்

கீதை எனக்கு! கிடைத்தற் கரியவள்!

சீதை நிகர்த்த சிறப்பு!

174.

நடந்தால் நடனம்! நறுமலர்த் தோப்பில்

கிடந்தால் சிலையொளிர் கீர்த்தி! – கொடிபோல்

படர்ந்தால் தமிழ்ப்பாக்கள்! பாவையவள் கைபிடித்துத்

தொடர்ந்தால் சுரக்கும் சுகம்!

175.

புலியாட்டம் போட்டுப் புகழ்ஈட்டும் வீரன்

எலியாட்டம் போடல் இனிதா? – கிளியே!

மயிலாட்டம் கண்டு மனதாட்டம் காணும்!

குயிற்றோட்டம் நம்மனக் கூடு!

176.

நொண்டி விளையாட்டில் நோக்கம் செலுத்தாமல்

சண்டி புரியும் சதியென்ன? – கன்னியே!

உண்டி சுருங்க உயர்மார்(பு) அழகினிலே

ஒன்றிக் கிடக்கும் உயிர்!

176.

மலரோடு சேர்த்தென் மனங்கட்டும் பெண்ணே!

வளமோடு வாழ வழிசெய்! – நிலவே

நிலமோடு சேரும் நெகிழ்யொளி போல

உளமோடு சேரும் உறவு!

177.

முன்னே நடைநடந்து பின்னே கணைதொடுக்கும்

என்னே எழிற்பெருக்கு! ஏங்குகிறேன்! - இன்மழைசேர்

விண்ணே! மதன்நூல் விரிவுரையே! அன்பமுதக்

கண்ணே! கருணையைக் காட்டு!

178.

ஓர விழிப்பார்வை ஓதும்! சுகவுணர்வு

ஆர இறங்க அமுதூறும்! - ஈரவிழி

ஏற இறங்கக்கூர் மூக்கிசைக்கும்! வாய்பார்க்கும்!

மாறன் கலையை மகிழ்ந்து!

179.

செவியில் செழுந்தமிழைச் செப்புகின்ற உன்றன்

கவியில் கரைந்தான் கவிஞன்! - குவிந்த

மணியாடும் காதழகில் என்மனம் ஆடும்

அணியாடும் மார்பழகில் ஆழ்ந்து!

180.
கொதித்த மனத்தைக் குளிரூட்டும் வண்ணம்

பதித்த கனிமுத்தப் பாவாய்! - உதித்த

மதியென மின்னும் மலர்முகம் கண்டால்

கதியென மின்னும் கவி! 

(தொடரும்)

காதல் ஆயிரம் [பகுதி - 17]

காதல் ஆயிரம் [பகுதி - 17]

161.

ஈக்கள் பலவும் எழில்மலர் என்றெண்ணும்!

பூக்கள் பலவும் மனம்புழுங்கும்! – ஆக்கிடும்

பாக்கள் பலவும் படைத்த பயன்மேவும்!

ஏக்கம் பெருக்கும் எழில்

162.

என்னுள் இருக்கிறாய்! உன்னுள் இருக்கிறேன்!

இன்னும் எனையேன் வெறுக்கிறாய்! - கண்களால்

இன்னூல் மொழிகிறாய்! பொன்னூல் புனைகிறேன்!

மண்ணில் மணக்கும்நம் வாழ்வு!

163.

இறவா திருக்க இளைப்பார்! உலகில்

பிறவா திருக்கப் பிடிப்பார்! – மறையே

மறவா திருக்க மதி..தா. அவளின்

உறவோ டிருக்க உதவு!

164.

குறையாத செல்வம் கொடுவென்று கேட்பார்

மறையோதும் மாந்தர் மகிழ்ந்தே! – இறைவா!

நிறைவாக என்னவளை நெஞ்சுள் நிறுத்தி  

உறவாட வைப்பாய் உவந்து!

165.

ஒருபாகம் ஆளும் உமையாள்! மனமாம்

அரும்பாகம் ஆளும் மலராள்! – பெருமை

தரும்பாகம் ஆளும் தளிர்கொடியே! நீ..என்

பெரும்பாகம் ஆளும் பிறப்பு!

166.

காதி நிறத்துள்ளம்! கன்னல் மொழிவெல்லும்!

மோதிக் கயல்துள்ளும்! முத்தொளிரும்! - தூதெனச்

சோதி கவிதைகள் சொல்லும்!உன் பேரழகு

போதி மரமெனப் பூத்து!

167.

சாதி சமயங்கள் சாற்றும் தடைகளை

மோதி மிதித்து முறித்திடுவோம்! – நீதியொளிர்

ஆதித் தமிழ்நெறியில் ஆழ்ந்திடுவோம்! வாழ்வினில்

பாதி.நீ! பாதி...நான்! பாடு!

168.

பந்தாடும் வேளையிலே என்னுயிரைப் பந்தாடிச்

சிந்தாடும் சின்னவளே! சிந்தையை - உந்தியே

தந்தாடும் ஆசைகளைக் கொண்டாடத் தேன்குடமே!

வந்தாடு பக்கம் மகிழ்ந்து!

169.

மலராடும் சோலையில் மஞ்சள் வெயிலில்

நிலவாடும் வண்ண நினைவில் - நிலைமை 

தளராத மார்பில் தலைசாய்ந்து கண்ணே!

உளமார உண்பேன் உனை!

170.

பின்னிய மல்லிகை பேசுதே என்னிடம்!

மின்னிய மெல்லிடை மீட்டுதே! – கண்விசை

பன்னிய கூத்துக்கள் பற்றிப் படருதே!

புண்ணிய காதல் புனைந்து!

(தொடரும்)