புதியதோர் உலகம் [பகுதி - 4]

புதியதோர் உலகம் செய்க

நானோ உயா்ந்த பிறப்பென்று

    நீயோ தாழ்ந்த பிறப்பென்று

தானோ தீனோ புளுகெல்லாம்

    சாற்றும் நபரைப் படைக்காதே!

ஆணோ பெண்ணோ இருசாதி!

    ஓளவை தந்த நன்னீதி!

ஊணோ(டு) ஊறிப் பொதுவுடைமை

    ஒளிரும் உலகை அமைத்திடுக!

(தொடரும்)

புதியதோர் உலகம் [பகுதி - 3]

புதியதோர் உலகைச் செய்க!

ஒன்றே இறைவன்! பலவல்ல!

    உள்ளம் கோயில்! உணா்ந்திடுக!

அன்றே இருந்த அருந்தமிழை

    அகில மொழியாய் ஆக்கிடுக!

மன்றே மணக்கும் மதியுரையில்

    மனமே மணக்கும் மாண்புரையில்

நன்றே நடக்கும் புத்துலகை

    நற்றேன் நாதா அமைத்திடுக!

(தொடரும்) 

புதியதோர் உலகம் [பகுதி - 2]

புதியதோர் உலகைச் செய்க!

அறமே ஆள! அமுதுாறும்

    அருளே சூழ! உலகொளிரும்

திறமே மேவ! அறிவொளிரும்

    செயலே ஆழ! செந்தமிழின்

குறளே உலகப் பொதுமறையாய்க்

    கொண்டே செழிக்க! அலகிலா

மறமே! மாலே! மண்ணுலகை

    மாண்பில் மணக்க வடித்திடுக!

(தொடரும்)

புதியதோர் உலகம் [பகுதி - 1]

புதியதோர் உலகைச் செய்க!

புத்தா் பொழிந்த பொன்மொழிகள்

    பூத்து மணக்க! நெஞ்சத்துள்

சித்தா் ஞான மலா்க்காடு

    செழித்து மணக்க! எந்நாளும்

எத்தா்! பித்தா் இல்லாமல்

    இயற்கை மணக்க! பேரழகா!

அத்தா! அரங்கா! புத்துலகை

    அன்பில் மணக்க அமைத்திடுக!

(தொடரும்)

உலகம் அழியட்டும் |பகுதி - 3]

உலகம் அழியட்டும்

இறைவன் பேசும் மொழியென்ன?

    எவா்தாம் அறிவார்? அனைத்துயிருள்

உறைவன் அவனே! உணராமல்

    ஓதும் வெறியால் பயனேது?

பிறையன்! அல்லா! அருள்யேசு!

    பெயா்கள் பலவாம்! எவ்விடத்தும்

நிறைவன் நிலையில் போர்புரியும்

    நிலமே துாளாய் அழியட்டும்!

மனித உயிரைக் பொசுவென்று

    நச்சு மழையைப் பொழிவதுவோ?

கனிய வைக்கும் பொருட்போட்டுக்

    காயைக் கனியச் செய்வதுவோ?

இனிய சொற்கள்! உயிர்நேயம்!

    எங்கே? எங்கே? பொய்க்கூட்டம்

புனித இடமா? புவிப்பந்து

    புடைத்துத் துாளாய் அழியட்டும்!

கற்றுக் களிக்கும் தாய்மொழியைக்

    கணக்குப் போட்டு மேடையிலே

விற்றுக் களிக்கும் வித்தகா்கள்!

    வெற்றுப் பேச்சு வாய்வீரா்

சுற்றும் கதைகள்! புராணங்கள்!

    சற்றும் உதவாத் துயா்க்குப்பை!

முற்றும் கலியின் துன்காலம்

    மோதி உலகம் அழியட்டும்!

இந்த மாதம் வருகின்ற

    இருபத் தொன்றாம் தேதியிலே

அந்தப் பழமை இனத்தவா்கள்

    ஆக்கி வைத்த நாளேட்டில்

தந்த தாள்கள் முடிந்தனவே!

    சாற்றல் மெய்யோ? பெரும்பொய்யோ?

எந்த நிலையோ? ஒருநொடியும்  
    எனக்கு வேண்டாம் இவ்வுலகே!