பிரான்சு கம்பன் விழாக் கவியரங்கம்
26.12.2021
கம்பன் புகழ்
1.
பொன்னாக ஒளிவீசும்
பூவாக மணம்வீசும்
இன்பாக மனமூறும் பாட்டு - கம்பன்
எழுத்தெல்லாம் மதுவூறும் கூட்டு!
2.
சந்தங்கள் முந்திவரும்
சந்தனமே ஏந்திவரும்
சொந்தமெனக் கவியுள்ளம் பாடும் - நாளும்
தந்ததன தாளங்கள் போடும்!
3.
கண்கொண்ட இமையாக,
மண்கொண்ட உரமாக,
பண்கொண்ட கவிகம்பன் ஏடு - அது
விண்கொண்ட திருமாலின் வீடு!
4.
முல்லைமலர்க் காடாக
முத்துமணிச் சரமாக
எல்லையிலா வானாகப் புலமை - கம்பன்
ஈந்ததமிழ் என்றுமெழில் இளமை!
5.
வில்லேற்று நின்றவனைச்
சொல்லேற்றுச் சென்றவனைக்
கல்லேற்றுப் பெண்வந்த காதை - ஓர்
இல்லேற்று மண்தந்த பாதை!
6.
கார்மேனித் திருராமன்
போர்மேவி அருள்ராமன்
சீர்மேவிப் பாட்டுக்குள் வாழ்வான் - தமிழ்த்
தார்மேவி நம்நெஞ்சை ஆள்வான்!
7.
கால்வண்ணம் காட்டியவன்!
வால்வண்ணம் மூட்டியவன்!
மால்வண்ணம் தீட்டிநலந் தந்தான் - தமிழ்ப்
பால்வண்ணம் ஊட்டிவலம் வந்தான்!
8.
பகையின்றிச் சீர்வேண்டும்!
நகையின்றிப் பேர்வேண்டும்!
மிகையின்றி எழுத்தாளும் கம்பன் - பழி
வகையின்றி எனையாளும் அன்பன்!
9.
என்றுமுள தமிழாகும்!
இன்பமுள அமுதாகும்!
குன்றுநிகர் வன்மையினைக் கண்டு - செய்தான்
நன்றுபுகழ்த் தமிழோங்கத் தொண்டு!
10.
அன்பேந்தி வாழ்வோங்கும்!
அறமேந்திப் புகழோங்கும்!
பண்ணேந்தி இசையோங்கும் நன்றே - தமிழ்ப்
பண்பேந்திப்
புவியோங்கும் இன்றே!
பாட்டரசர்
கி. பாரதிதாசன்
கம்பன் கழகம் பிரான்சு
தொல்காப்பியர் கழகம் பிரான்சு
Aucun commentaire:
Enregistrer un commentaire