lundi 13 janvier 2020

போகிப் பொங்கல்


போகிப் பொங்கல் பொங்குகவே!
  
பொல்லா நினைவை நெருப்பிடுக!
   பொய்யைப் புரட்டை நெருப்பிடுக!
செல்லாக் காசாய்க் கிடக்கின்ற
   சிறுமைப் போக்கை நெருப்பிடுக!
எல்லாத் திசையும் உறுஞ்சாதி
   இழிவை அள்ளி நெருப்பிடுக!
மல்லா! வில்லை! என்றமிழா!
   மாட்சி பொங்க நெருப்பிடுக!
  
வெறியாம் நெஞ்சைத் தீயிடுக!
   வெற்றுப் பேச்சைத் தீயிடுக!
பொறியாம் ஆசைக் குப்பைகளைப்
   பொசுக்க வேண்டித் தீயிடுக!
அறிவாம் சுடரை ஏற்றிடவே
   அகஞ்சோ் அழுக்கைத் தீயிடுக!
நிறைவாம் உலகைச் சமைத்திடவே
   நேயம் பொங்கத் தீயிடுக!
  
பாட்டரசர் கி. பாரதிதாசன்
கம்பன் கழகம் பிரான்சு
தொல்காப்பியர் கழகம் பிரான்சு
14.01.2020

1 commentaire: