காதல் பெருகுதடி!
கம்பன் கவியழகில் - தமிழ்க்
(காதல்)
நாதன் வில்லழகில்
நறுந்தேன் சொல்லழகில் - உயிர்க்
(காதல்)
மோதல் விழியழகில்
மோக மொழியழகில் - உயர்
(காதல்)
ஈதல் கொடையழகில்
சீதை நடையழகில் - வளர்
(காதல்)
ஒவ்வொரு நாளும் அவன்கவிதை – என்
உயிரினில் ஊட்டும் தமிழமுதை!
எவ்வகை இன்பம் தரும்உவமை - இன்ப
ஈடிலாத் தமிழின் தனிப்பெருமை!
(காதல்)
என்மன வீட்டில் குடிபுகுந்தான் - சந்த
இன்கவி எழுதப் படியளந்தான்!
நன்மன இராமன் எழில்புனைந்தான் - கம்பன்
பொன்மழை பொழிந்து புகழடைந்தான்
(காதல்)
அண்ணலும் அவளும் நோக்கியதால் - காதல்
மின்னலும் வந்து தாக்கியதால்
எண்ணிட ஏக்கம் ஊக்கியதால் - ஈருயிர்
ஒன்றிட இன்பம் தேக்கியதால்
(காதல்)
RépondreSupprimerகாதல் பெருகுதடி கன்னல் கவிபடித்துக்
காதல் பெருகுதடி கண்மணியே! - ஓதுகின்ற
வாய்மணக்கும்! வாழ்வின் வளம்மணக்கும்! வண்டமிழ்த்
தாய்மணக்கும் என்றுணர்ந்து சாற்று!
RépondreSupprimerவணக்கம்!
என்மனம் வாழும் இனியதமிழ்க் கம்பனை
இன்மனம் ஏந்தி இசைத்துள்ளேன்! - பொன்மனம்
மேவும்! புலமை விளைந்தோங்கும்! எந்நொடியும
கூவும் கவிதைக் குயில்