காதலிலே அவள் குழந்தை
.
காதலிலே - அவள்
குழந்தை!
.
கையில் இருப்பாள்!
மடியில் கிடப்பாள்!
மெல்ல சிரிப்பாள்!
காதலிலே - அவள்
குழந்தை!
.
கழுத்தைக்
கட்டிப் பிடிப்பாள்!
மார்பில்
ஒட்டிக் கிடப்பாள்!
சுவையைக்
கொட்டிக் கொடுப்பாள்!
காதலிலே - அவள்
குழந்தை!
.
கெஞ்சுவாள்!
கொஞ்சுவாள்!
விஞ்சுவாள்!
காதலிலே - அவள்
குழந்தை!
.
என்..கை
கோத்து நடப்பாள்!
புன்னகை
பூத்து மணப்பாள்!
காதலிலே - அவள்
குழந்தை!
.
உப்பு மூட்டை சுமப்பேன் - என்
உயிருள் அவளைச் சுமப்பேன்!
காதலிலே - அவள்
குழந்தை!
.
சிணுங்கு மொழியாள் - எனை
விழுங்கு விழியால்!
காதலிலே - அவள்
குழந்தை!
.
அடம் பிடிப்பாள் - ஆசை
வடம் பிடிப்பாள் - நெஞ்சுள்
இடம் பிடிப்பாள்!
காதலிலே - அவள்
குழந்தை!
.
கண்ணழகும்
கழுத்தழகும்
எனை மயக்கும்!
.
மூக்கழகும்
முடியழகும்
எனை இயக்கும்!
.
காலழகும்
கையழகும்
கவி கொடுக்கும்!
.
பல்லழகும்
சொல்லழகும்
மலர் படைக்கும்!
.
தோளழகும்
துணியழகும்
போதை விளைக்கும்!
.
தொடையழகும்
நடையழகும்
துயர் துடைக்கும்!
.
தொட்டவிடம்
பட்டவிடம்
இன்பம் தழைக்கும்!
காதலிலே - அவள்
குழந்தை!
.
சொல்லிய வண்ணம்
நடப்பாள் - பாடம்
படிப்பாள்! - வந்து
கடிப்பாள்!
காதலிலே - அவள்
குழந்தை!
.
வரவால்
குலஞ்செழிக்கும்!
வடிவால்
உளங்கொழிக்கும்!
காதலிலே - அவள்
குழந்தை
.
பார்க்கப் பார்க்கப்
படரும் இனிமை!
பாவை எழிலைப்
பாடும் என் புலமை!
.
கிள்ளுவாள்
தொல்லை பண்ணுவாள்!
அள்ளிக் கொள்ளுவேன்!
பள்ளி கொள்ளுவேன்!
பாட்டரசர் கி. பாரதிதாசன்,
18.11.2023
Aucun commentaire:
Enregistrer un commentaire