dimanche 21 mars 2021

கிளிக்கண்ணி

கிளிக்கண்ணி


வாய்ச்சொல் வீரர்!

 

அடி: ஆதி தாளத்தில் 2 வட்டணை     
சீர் : நான்மை நடையது

வாக்குப் பொறுக்கிடவே

வாசல் வலம்வருவார்!

நாக்குப் பலவுடையார் - கிளியே!

நம்மின் தலையறுப்பார்!

 

வெள்ளை உடையணிந்து

கொள்ளை அடித்திடுவார்!

இல்லை துளியொழுக்கம் - கிளியே!

எங்கே இனம்சிறக்கும்!

 

வெற்றுப் பயல்கூட்டம்

விழுந்து வணங்கிடுவார்!

சற்றும் இதயமிலார் - கிளியே!

தலைமை நிலையடைந்தார்!

 

கால்கைப் பிடித்திடுவார்!

கடுகேனும் மானமிலார்!

வேல்கைத் தமிழினத்தைக் - கிளியே!

விற்றுப் பிழைத்திடுவார்!

 

மேடை உரைபொழியும்

வெற்றி மறவரவர்!

ஆடை யணிமணிகள் - கிளியே!

ஆயிரம் கோடியடீ!

 

மண்ணின் நலமுரைப்பார்!

மக்கள் வளமுரைப்பார்!

கண்ணில் பணப்புதையல் - கிளியே!

காக்கும் செயல்புரிவார்!

அடிபிடி நெஞ்சகரும்

தடியடி வஞ்சகரும்

குடிவெறி கூட்டிடுவார்! - கிளியே!

குறள்நெறி சாய்த்திடுவார்!

 

ஆட்சி இருக்கையினை

அடைய அணிவகுப்பார்!

மாட்சி அழித்திடுவார் - கிளியே!

மாளாப் பொருளடைவார்!

 

மன்னரின் ஆட்சியினை

மக்களின் ஆட்சியென

இன்னும்..நீ நம்புவதோ? - கிளியே!

எங்கே..நீ வாழுவதோ?

 

பொறுக்கித் திரிபவரும்

பொல்லாக் கொடியவரும்

முறுக்கி உலாவருவார் - கிளியே!

நறுக்கி அவர்..அகற்று!

 

பாட்டரசர் கி. பாரதிதாசன்

07.12.2018

Aucun commentaire:

Enregistrer un commentaire