கவிஞா் சீராளன்

கவிஞர் கி. பாரதிதாசன் பதிற்றந்தாதி

நாவடைத்து நிற்கின்றேன் நற்றமிழ் வேந்தராம்
பாவலரின்  பட்டம்  பரிசேற்றே  - ஆவலுடன்
பூவெடுத்து ஆன்மாவால்  கோர்க்கின்றேன்! பண்புடைய
பாவேந்தர் பாதம் பணிந்து!

பணிந்துநான் ஏற்கின்றேன் பாவலரின் பட்டம்!
அணிந்துநான் ஆடுகின்றேன் ஐயா - துணிந்துநான்
இவ்வுலகில் தூயதமிழ் கற்க துணைநிற்பாய்
எவ்விடத்தும் என்னுள் இருந்து!

இருந்தேன் இதுகாறும் இவ்வுலகின் ஓரம்
பெருந்தேன் அடையில் பிணைத்தீர் - மருகா
உனது மனமோ! உயிராளும் மூச்சோ
எனதுள்ளம் கொண்ட எழுத்து!

எழுத்தில் எழிலாட என்குருவே நெஞ்சில்
கொழிக்கவை இன்றமிழ் கோர்த்துச் - செழிப்பான
அந்தாதி சீர்விருத்தம் அத்தனையும் செம்மையுற
வந்தெடுத்து வைப்பேன்நல் வாழ்த்து!

வாழ்த்துகிறேன் பாவலரே! வண்டமிழின் காவலரே!
ஆழ்ந்துறங்கும் வேளையிலும் ஆன்மாவில் - சூழ்ந்திருக்கும்
நல்லுரைகள் சேர்த்துருக்கி நன்றிசொல்வேன் ! நானிலத்தின்
எல்லா இடத்தும் இருந்து!

இருக்கும் வரைக்கும் இருகரம் கூப்பித்
திருவருள் தன்னைத் தொழுது - திருவாய்
கமழும் திருவாச கம்போல்! உருகும்
உமதன்பு போதும் உயிர்க்கு!

உயிரின் முதலோன் உமக்களித்த இன்பப்
பயனில் எமக்கும் பகிர்ந்தீர் - முயன்றிங்குக்
கற்றதனை முன்மொழிவேன் காப்பியமாய்! அவ்வழிக்கே
பெற்றேன் இனிய பிறப்பு!

பிறப்பின் பயன்கண்ட பேரின்ப நாளில்
அறத்தின் வழிநடக்க ஆள்க! - நிறைந்த
நறுமலர்க் காடாய் நனிச்சுவை தேனாய்ச்
சிறப்புறும் என்னுடைச் சீர்!

சீர்பெருகும் இப்புவியில் சீராளன் என்பெயரும்
ஒர்யுகம் வாழ உயிர்தந்த - பார்புகழ்
வீசுகின்ற பாவலர் வாழ்மண்ணும் நன்றெனவே
பேசும் கவிதைகள் பெற்று!

பெற்றேன் பெருமனத்தின் பேறொன்றே! உம்மிடத்தில்
கற்றேன் கவியறிவு காவலரே - நற்றமிழ்ச்
சொல்லெடுத்து நன்றிபல சொல்கின்றேன்! என்னுள்ளம்
நல்லுரையைக் கூறுமென் நா!

கவிஞர் சீராளன்

02.07.2014

----------------------------------------------------------------------------------------------------

வணக்கம்!

சீராளன் அவர்கள் பா புனையும் ஆற்றலையும் பைந்தமிழ்ப் பற்றையும் கண்டு கவிஞர் என்றும் பட்டம் அளித்தேன்.

கவிஞர் சீராளன் அவர்களுக்கு மிக மிக ஏற்புடையது என்பதை அவர் பாடிய பதிற்றந்தாதி சான்று!

கவிஞர் சீராளன் காலம் வெல்க!

காற்றலை போன்று கவிபாடும் உன்னுடைய

ஆற்றலைக் கண்டேன்! அகங்குளிர்ந்தேன்! - போற்றுமுயர்

பட்டம் அளித்திட்டேன்! பைந்தமிழ்ப் பூங்குயிலே

கொட்டும் முரசடித்துக் கூவு!

என்றன் பெயரில் எழுதிய அந்தாதி

இன்றேன் சுரக்கும் இதயத்துள்! - என்றென்றும்

சீருடன் வாழ்க! செழுங்கவிஞர் சீராளன்

பேருடன் வாழ்க பெருத்து!

அருந்தம்பி சீராளன் அந்தமிழ் காக்கும்

பெரும்நம்பி என்றபெயர் பெற்று - வரும்காலம்

ஓங்கட்டும்! வாழ்நலம் தேங்கட்டும்! நற்புகழைத்

தாங்கட்டும் அன்னைத் தமிழ்!

கவிஞர் கி. பாரதிதாசன் 

02.07.2014