தொடுத்தலும் விடுத்தலும்

தொடுத்தலும் விடுத்தலும்

திருமிகு அம்பாளடியாள் தொடுத்த தொடர் பதிவுக்கு இன்றுதான் விடை அளிக்கக் காலம் கமழ்ந்தது. வினாவுக்கான விடை நேரிசை வெண்பாவில் வடித்துள்ளேன். வெண்பாவில் முதல் இரண்டு அடிகள் வினாவும், அடுத்த இரண்டு அடிகள் விடையும், தனிச்சொல் மகடூஉ முன்னிலையாகவும் அமைதுள்ளன.

1. உங்களுடைய 100ஆம் பிறந்தநாளை எப்படிக் கொண்டாட விரும்புகிறீர்கள்?

உன்னுடைய நூற்றாண்டு நன்னாள் நிகழ்வுகளைக்

கன்னல் கவியே கதைத்திடுக? - என்தோழி!

அன்னைத் தமிழ்காத்த அன்பர் தமையழைத்துப்

பொன்னை அளிப்பேன் புகழ்ந்து!

2. என்ன கற்றுக் கொள்ள விரும்புகிறீர்கள்?

சொற்கள் மணக்கும் சுடர்கவி வாணரே!

கற்க விரும்பும் கலையென்ன? - பொற்கொடியே!

ஓவியப் பாட்டெழுதி ஒப்பில் தமிழொளிரக்

காவியம் செய்தற் கடன்!

3. கடைசியாகச் சிரித்தது எப்போது?

இறுதியாய் வாய்வலிக்க என்று சிரித்தீா்?

உறுதியாய் இங்கே உரைப்பீா்! - நறுங்கொடியே!

வான்வெடி போன்றதிரும் வண்ணச் சிரிப்பென்று

தேன்மொழி சொன்னாள் திகைத்து!

4.  ஒருநாள் முழுவதும் மின்சாரம் இல்லையெனில் நீங்கள் செய்வது என்ன?

மின்சாரம் இன்றி விளைந்த ஒருநாளை

இன்சாரம் கூட்டி இயம்பிவீா்! - மென்கொடியே!

சிந்தை ஒளிர்கின்ற செந்தமிழ்ச் சீர்விளக்கில்

விந்தை புரிவேன் விழைந்து!

5.  உங்கள் செல்வங்களின் திருமண நாளில் சொல்ல விரும்புவது என்ன?

உங்கள் திருமகன் உற்ற திருமணத்தில்

தங்கள் உரைக்கும் தகையென்ன? - செங்கரும்பே!

தங்கக் குறள்நெறியைத் தாங்கி வளங்காணப்

பொங்கும் புலமை பொலிந்து!

6. உலகத்தில் உள்ள சிக்கலை உங்களால் தீர்க்கமுடியும்

என்றால் எந்தச் சிக்கலைத் தீர்க்க விரும்புகிறீர்கள்?

உன்னால் முடியுமெனில் ஓங்கும் உலகத்தில்

என்ன படைப்பீர் இசைத்திடுவீா்? - அன்பொளியே!

என்னைக் கொடுத்தேனும் என்னுயிராம் செந்தமிழ்

அன்னைக்கு அமைப்பேன் அரசு!

7. நீங்கள் யாரிடம் அறிவுரை கேட்பீர்கள்?

தொல்லை அகன்றோடத் தூய தமிழ்க்கவியே

எல்லையை யாரிடம் கேட்டிடுவீர்? - நல்லமுதே!

தந்தையும் தாயும் தமிழ்தந்த ஆசானும்

சிந்தையுள் வாழ்வார் சிறந்து!

8. உங்களைப் பற்றிய தவறான தகவல் பரப்பினால்

என்ன செய்வீர்கள்?

பொல்லார் பலர்கூடிப் பொய்யுரைஉன் மேலுரைத்தால்

நல்லார் நெறியுடையீா் நாடுவதென்? - நல்லியளே!

அஞ்சா மனமேந்தி ஆற்றல் மதியேந்தித்

துஞ்சா திருப்பேன் துணிந்து!

9. உங்கள் நண்பரின் மனைவி இறந்தால் அவரிடம் என்ன சொல்வீர்கள்?

வாழ்வின் துணையிழந்து வாடும்நன் நண்பனுக்குத்

தாழ்ந்து தருகின்ற சொல்லென்ன? - சூழ்புகழாய்!

மல்கும் பிறவிகள் மண்ணில் கணக்குளதோ?

சொல்லித் துடைப்பேன் துயர்!

10. உங்கள் வீட்டில் தனியாக இருந்தால் என்ன செய்வீர்கள்?

இனிமை பொழிகின்ற இன்றமிழா? வீட்டில்

தனிமையில் என்செய்வீா் சாற்றும்? - கனிமொழியே!

என்றும் இதயத்துள் ஈடில் தமிழணங்கு!

மன்னும் கவிதை மலை!

15.07.2014

-------------------------------------------------------------------------------------------------------

உரைநடை வினாவில் இருந்த அயற்சொற்களைச் தமிழாக்கியே பதில் அளித்துள்ளேன்.

பவர்கட்  - மின்சாரம் துண்டிப்பு

பிரச்சனை - சிக்கல்

அட்வைஸ் - அறிவுரை