விருத்த மேடை - 7

விருத்த மேடை - 7

அறுசீர் விருத்தம்  - 7

[மா + மா + மா + மா + மா + காய்]

ஆண்மை தவறேல்

நேர்மை ஏந்தும் நெஞ்சம் வேண்டும்!

　　　நினைவில் உறுஞ்செயலில்

சீர்மை ஏந்தும் செம்மை வேண்டும்!

　　　சிந்தை உறுங்கவிகள்

கூர்மை ஏந்தும் கொள்கை வேண்டும்!

　　　கொண்ட மனைமறவா

நீர்மை ஏந்தும் நிலைமை வேண்டும்!

　　　நெடியோன் அருளுகவே!

ஓரடியில் முதல் ஐந்து சீர்கள் மாச்சீர்களாகவும், ஆறாம் சீர் காய்ச்சீராகவும் வரவேண்டும். இவ்வாறு நான்கடிகளும் அமைய வேண்டும். நான்கடிகளும் ஓரெதுகை பெற்றிருக்க வேண்டும். ஒன்று, ஐந்தாம் சீர்களில் மோனை அமைய வேண்டும்.
 

இலக்கணம் நுாற்பா
　　
மாச்சீர் ஐந்து காய தொன்று
வண்டார் குழன்மாதே!
　　　　　　- விருத்தப் பாவியல் [7]

ஆத்திசூடி நுாலில் உள்ள ஓரடியைத் தலைப்பாகக் கொண்டு இவ்வகை அறுசீர் விருத்தம் ஒன்றைப் பாடுமாறு பாவலர்களை அன்புடன் வேண்டுகிறேன்.

　　　　
"பாவலர் பயிலரங்கம்" என்ற குழுவில் இணைந்து தங்கள் வெண்பாவைப் பதிவிட வேண்டுகிறேன்!
　　　　　
அன்புடன்
பாட்டரசர் கி. பாரதிதாசன்
17.01.2018